1 Luker 7

Solomon ogero odi me gang kale

1Solomon lacen doki ocako gero ode kikome ma orii pi mwaka apar wiye adek, ka dong otyeko gero ode ducu kakare.

2Solomon omiyo kigero ot ma kicako nyinge ni Bunga me Lebanon. Bore romo puti miya acel ki pyere abic, lace romo puti pyere abiro wiye abic, ki bore tung malo romo puti pyere angwen wiye abic; kigero ote ocung iwi lwak wir yat cedar muryeyo latyenge adek, ki rii bao cedar ma kiriyo iwigi. 3Dok kiguro bao cedar me umu wi rii ma kiriyo iwi wir pyere angwen wiye abic, ma guryeyo apar wiye abic i tyeng acel acel. 4Dok kiketo wang dirica ma guryeyo latyeng adek, kun dirica gikeme ki luwotgi ma guryeyo latyeng adeki. 5Dogola ducu ki dirica ducu kitiyogi latwoke angwen, kun dirica kemo dirica wadgi i tyeng adek.

6Dok otiyo ot mukene ma oketo iye wir mapol. Bore romo puti pyere abiro wiye abic, ki lace romo puti pyere angwen wiye abic; dok tye ki latin ot ma i dogola me donyo, ma oryeyo iye wir bene, ki bolo matye inyime.

7Ka dok ogero ot mukene pi komker kama en bingolo iye kop, en aye kicika me ngolo kop kikome. Kiguro bao cedar ki umu kwede kom kicika ot, cake ki i dye ot piny nio kwede wa i kwori dan ot. 81

Dok ode kikome ma en bedo iye, matye i dyekale mukene ma inge ot ngolo kop, kigero lakite acelu. Solomon dok ogero ot macalo odi mukenenu pi nya pa Parao ma en onyomoni.

9Odi magi ducu kigerogi ki godi me wel ma ki payogi muporo kit por ma kimito, kun kibaro ki mucumeno, kipayo ngegi ki igi gubed mapwot, cake ki ikom guti ot nio kwede wa ikom godi ma kiriyo i wiye. 10Guti ot obedo godi mabeco me wel, godi madongo mada ma ditogi romo puti apar wiye aryo ki apar wiye abic. 11Iwi guti ot bene kiketo iye godi me wel ma kipayogi muporo kit bor ma kimito, kacel ki bao cedar. 12Cel me dyekal me gangkal madit bene kiryeyo iye godi apaya latyeng adek ma gurumu dyekal woko, ki bao cedar tyeng acel, calo kit ma kitiyo kwede dyekal Ot pa Rwot.

Tic pa Kuram i Ot pa Lubanga

13Rwot Solomon ocwalo kwena ci kikelo Kuram ki i Turo. 14En onongo wod pa dato mo ma i kaka pa Naputali, wone aye dano me Turo ma ladiro tic me teto jami mola. Kuram dano ma laryeko mada, dok ladiro tic bene, ma ceng obino pi tiyo gin ducu ma dok ikom tic ki mola. En obino bot rwot Solomon, ci Solomon okete me neno dog tic malubu tic ki mola ducu ikare me gedo.

Wir mola aryo

(2 Tek 3:15-17)

15Kuram oliyo wir mola aryo. Wir acel acel bore romo puti pyere aryo wiye abiro. Kipimo kore ki tol ci dite oromo puti apar wiye aboro, kun iye twolo, kome ducu kinong maromo nyig cing angwen. 16En dok otiyo lalukana wigi ki mola ma kiliyo me aketa iwi wir aryo ducu. Lalukana acel acel bore romo puti abiro ki nucu. 17Dok otiyo obwo aryo ma kikedogi ki nyor pi lalukana aryo ducu ma gitye iwi wir; otiyo obwo acel pi lalukana acel, ki acel pi lalukana mukene bene. 18En dok otiyo cal okwer pomegranat bene kitmeno. Ka otiyogi, ci odwalogi ikom nyor latyeng aryo ikom obwo me laum kom lalukana ma kicibo iwi wir; otimo lalukana mukene bene kitmeno. 19Lalukana ma gitye iwi wir ma i kicika ot ma i dogolani bocogi romo puti abicel, ma kitiyo calo ature lenga. 20Kiketo lalukana aryo ducu iwi wir aryo, iwi doge ma kilulu ma ka nget obwo ma kiumu kwede ni; onongo tye iye cal okwer pomegranat miya aryo, ma kidwalo latyeng aryo; ki lalukana mukene bene tye ki mere marom meno. 21Kuram ocibo wir inyim kicika ot ma i dogola me donyo i Ot pa Lubanga. Oketo wir acel tung kupiny, ci ocako nyinge Jakin, ka dok oketo wir mukene tung kumalo, ci ocako nyinge Boaj. 22Kiketo cal ature lenga iwi wir aryo ducu. Ci tic ikom wir otum kumeno.

Lagwok pii me nyonyo bronze

(2 Tek 4:2-5)

23Kuram dok otiyo lagwok pii ki nyonyo bronze ma kiliyo. Otwode adunu ma lace romo puti apar wiye abic cake idoge tungcel nio idoge tung mukene; bore tung malo romo puti abiro ki nucu. Kipimo doge ki tol ci oromo puti pyere angwen wiye abic. 24Ki idoge ki piny tye iye cal keno munyak ma orumu kom lagwok pii ducu, maromo puti pyere angwen wiye abic; cal keno kiryeyo latyeng aryo. Ikare ma kiliyo lagwok pii, kiliyo ki cal keno ikome lawangacel. 25Kicibo lagwok pii ocung iwi cal twoni dyangi apar wiye aryo. Kiketo twoni adek guneno tung kumalo, adek guneno tung kupotoceng, adek guneno tung kupiny, ki adek guneno tung kunyango. Kicibo lagwok pii ocung ikom cal twoninu kun doggi ducu odok tung iye. 26Kome kinong maromo incic adek; doge kitiyo macalo dog kikopo, marom ki ature lenga; dok piine romo lita alip pyere angwen.

Lutino gadigadi

27Kuram dok otiyo lutino gadigadi apar me mola. Acel acel bore puti abicel, lace bene puti abicel, ki bore tung malo puti angwen ki nucu. 28Man aye kit ma kitiyo kwede gadigadi ma tinoni: kipeto mola ma apada i bute ducu, ma okube ki rii. 29Ikom mola ma apada ma okube ki riini kigoro iye cal labwor, cal twoni dyangi, ki cal lukerubi. Rii mola bene kideyo doggi ki cal nyor mudwale ka wi labwor ki dyangi, ki katyen gi bene. 30Latin gadigadi acel acel obedo ki lawala mola angwen ki bolti me mola. Ka dok i twoke angwen ducu tye iye laten otako. Laten magi kiliyo aliya kun kidwalo cal nyor i butgi. 31Doge ongame ki i gin mulunge ma ocung malo, kun bore romo puti acel ki nucu. Dogeni otwode atwoda macalo kitiyo tedi te gin moni, tute romo puti aryo ki incic. Dogeni kideyo kun kigoro iye cal, dok mola apada ma kipeto ikom lutino gadigadini obedo latwoke angwen, pe otwode atwoda. 32Lawala angwen tye ite mola apadani; bolti pa lawala gukube ki gadigadi; bor pa lawala romo puti aryo ki incic. 33Kitiyo lawalane macalo lawala me gadigadi lweny; boltigi, ki doggi, ki cilikigi, ki abugi kiliyogi aliya. 34Kiketo latyele angwen i twoke angwen ma ikom gadigadi acel acel; latyele ducu okube kacel ki gadigadi. 35Ki iwi gadigadi kiketo iye gin mulunge ma bore tung malo romo incic abongwen; dok tung wi gadigadi latyele ki mola ma apadane gukube kacel kwede. 36Ikom latyele ki ikom mola ma apada kigoro iye cal lukerubi, cal labworgu, ki cal yadi otit, kama romo gorone, ki cal nyor mudwale ingetgi. 37Kuram otiyo kit gadigadi macalo meno apar; gin ducu kiliyogi marom, kun ditogi rom, calgi bene tye marom. 382

Ka dok otiyo otako mola apar, kun otako acel acel kitwero onyo iye pii maromo lita miya aboro. Otako mola acel acel lace romo puti abicel. Kuram dok otiyo otako mola acel acel me aluta i gadigadi mola apar ducu. 39En oryeyo gadigadi abic inget Ot pa Lubanga tung kupiny, ki abic tung kumalo ka oketo lagwok pii i twok Ot kama bute tung kupiny ki bute tung kunyango gurwate iye.

Nying jami ducu ma kitiyo ki Ot pa Lubanga

(2 Tek 4:11—5:1)

40Kuram dok otiyo lwak agulu ki akwaya latoke ki becen bene. Kitmeno en otyeko tic ducu ma ikom Ot pa Rwot pi rwot Solomon. 41Otiyo wir aryo, ki lalukana aryo ma olunge macalo agulu ma kiketo iwi wir, ki obwo aryo me umu kom lalukana aryo ma olunge ma obedo iwi wiri. 42Dok otiyo cal okwer pomegranat miya angwen pi obwo aryo meno, kun cal okwer pomegranat kiryeyo latyeng aryo ikom obwo acel acel me umu kom lalukana aryo ma olunge ma obedo iwi wiri. 43Dok otiyo lutino gadigadi apar ki otako mola apar ma kilutu i gadigadi; 44ki lagwok pii acel, ki cal twoni dyangi apar wiye aryo ma kiketo lagwok pii ocung ikomgi.

45Lwak agulu ducu, ki akwaya latokegu, ki becengu, jami magi ducu ma i Ot pa Rwot, ma Kuram otiyogi pi rwot Solomon, obedo me mola ma kijwayo maleng. 46Rwot Solomon omiyo kiliyo mola meno i pwor kulu Jordan, kama lobo agulu tye iye, ikin Cukot ki Jaretan. 47Solomon oweko jamini ducu kitiyo ma pe kipimo pekgi, pien onongo jami dwong tutwal, omiyo pek me nyonyo ma kitiyo kwede pe kingeyo. 483

Kitmeno bene Solomon omiyo kitiyo jami ducu ma mite i Ot pa Rwot, gin aye ene: keno tyer me jabu, meja me jabu pi mugati me aketa inyim Rwot, 494okar mac me jabu ma kiliyo maber ma kiryeyogi inyim Kabedo Maleng Makato ma i tyelo abic, tung kupiny ki abic tung kumalo; ki lwak cal ature ki laputgu, ki boyi lakar mac, ducu me jabu; 50ki kikopogu, magacgu, becengu, atabo me odok eceta ki wee me wango mac, ducu me jabu ma kiliyo maber; ki pata jabu ma kiketo ikom kika me donyo i kicika ma i tyelo, en aye Kabedo Maleng Makato ducu, ki ikom kika me kicika madite ma i Ot pa Lubanga. 515

Tic ducu ma rwot Solomon otiyo ikom Ot pa Rwot otum kitmeno, Solomon dok okelo iye jami ducu mayam wone Daudi odyerogi bot Rwot; ci okelo ryal ki jabu ki jami mukenegu ducu, ma ceng okanogi i ot kano lim ma i Ot pa Rwot.