1 Luker 6

Solomon ogero Ot pa Lubanga

(2 Tek 3:1-14)

1I nge mwaka miya angwen ki pyere aboro cake ma jo Icrael gua iye ki i lobo Ejipt, i mwaka me angwene me ker pa Solomon ma en tye kaloyo jo Icrael, i dwe Jib, ma en aye dwe me aryone ikit me kwano mwaka pa jo Icrael, en aye obedo kare ma Solomon ocako gero iye Ot pa Rwot. 2Ot man ma rwot Solomon ogero pi Rwot Lubanga onongo bore romo mita pyere aryo wiye abiro, ki lace tye mita abongwen ki bore tung malo romo mita apar wiye adek ki nucu. 3Kicika ot ma a ki i dogola me donyo, bore romo mita angwen ki nucu, ki lac me kicika ma inyim ot romo mita abongwen, marom ki lac me Kabedo Maleng kikome. 4Solomon bene oketo lwak dirica ma lac ki iye ento ding ki tung kuwoko. 5En bene omedo gedo goropwa ma okube adekadek mukene ikom cel ma orumu kwede kicika Ot pa Lubanga ducu tung kungeye ki i butebute. Bor pa goropwa acel acel me cito malo tye puti abiro ki nucu. 6Kicika odi ma tino ma pinye lacgi romo puti abiro ki nucu, kicika odi ma idyere lacgi romo puti abongwen, ki me adeke lacgi romo puti apar ki nucu; pien nongo ojwiko kicika ot ki woko kun bwoto kama rii me kicika odi matino butu iye, wek rii pe odony i kicika kor ot kikome.

7Ikare ma kigero Ot, kibedo ka gerone ki godi ma kiyubu woko cut ki i bur kama kipayogi iye; ma omiyo ikare ma kitye ka gero Ot pa Lubangani, nyol ki latong ki jami tic ducu me nyonyo pe guwinye iye wa ki acel.

8Dogola me donyo i kicika odi matino matye piny onongo tye tung kupiny ka i donyo i Ot pa Lubanga, ci kidonyo i goropwa ma idyere kun ki ito ki rwom, ka dok kia ki i goropwa ma idyere ki ito i me adeke. 9Kitmeno Solomon ogero ot ci otyeko. Ogoyo dan ot ki rii bao cedar ma kipeto ki bao cedar bene. 10Kadok gugero gedo mukene ki woko ma orumu Ot ducu. Goropwane acel acel bore ki malo romo puti abiro ki nucu; ma kikubu ikom ot kikome ki rii bao cedar.

11Ikare meno dok Rwot Lubanga olok lok man bot Solomon kun waco ni, 12“Pi Ot ma itye ka gerone, kace ibilubu cika, kun ilubu kit ma aciko ducu, kun itiyo maber inyima, ci abimiyo loka moko ikin an ki in, kit mayam aloko kwede bot woru Daudi. 13Dok abibedo ikin jo Icrael, pe abibwoto jona jo Icrael.”

Jami me i Ot pa Lubanga

(2 Tek 3:1-14)

14Solomon ogero ot kitmeno ci otyeko. 15Ki i ot oguru kor kicika ot ki bao yat cedar, cake ki i dye ot piny nio kwede wa i kwori dan ot; opeto kicika ot me i ot ki bao kumeno, dok opeto dye ot piny ki bao ciprec. 161 Dong gin gugero kicika ot ma i tyelo ki bao cedar, cake ki i dye ot piny nio kwede wa i kwori dan ot, kun bor me Ot meno romo puti pyere adek. Kigero man ki i ot wek obed Kabedo Maleng ma i tyelo, ma en aye Kabedo Maleng makato ducu. 17Ci kicika madite, ma en aye dye ot ma inyim Kabedo Maleng ma i tyeloni, bore romo puti pyere abicel. 18Bao cedar ma i ot ki goro iye cal keno munyak ki cal ature. I ot ducu obedo bao cedar keken, ma kom got pe nen. 19Kiyubu Kabedo Maleng i ot, i tyelo ot kikome, me keto Canduk me Gicike pa Rwot. 20Kabedo Maleng ma i tyeloni bore romo puti pyere adek, ki lace puti pyere adek, ki bore tung malo bene romo puti pyere adek; ci gumwono kome woko ducu ki jabu ma kiliyo maber. Ka gutiyo bene keno tyer me bao cedar. 21Ci Solomon ociko pire omiyo kimwono i ot woko ki jabu ma kiliyo maber, dok oketo nyor jabu ma ongolo dye ot arii inyim Kabedo Maleng ma i tyelo, ka kimwono kome woko ki jabu. 222 En oweko kimwono kom ot woko ducu ki jabu, nio ka kom ot ducu otum maber. Ki keno tyer ma i Kabedo Maleng Makato ma i tyelo bene en owaco ni kimwon kome woko ducu ki jabu. 233

Ka dok en ociko pi payo cal lukerubi aryo ki yat jeituni, ma kiketogi i Kabedo Maleng Makato ma i tyelo; lakerubi acel acel bore romo puti apar wiye abic. 24Ki bwom lakerubi muyare, bwome acel romo puti abiro ki nucu, ki bwome mukene bene romo puti abiro ki nucu; cake ikom lano wi bwome tungcel nio wa i lano wi bwome tung mukene lacgi romo puti apar wiye abic. 25Lukerubi aryo ducu bocogi romrom, ki komgi bene rom. 26Bor kom lakerubi acel acel romo puti apar wiye abic. 27Oketo Lukerubi aryo ducu i kicika ma i tyelo ot, kun bwom lukerubi aryo ducu guyaro woko wek bwom ngat acel ogud kom kicika ot tungcel, ki bwom lakerubi me aryone bene ogud kom kicika ot tung mukeneni; ki bwomgi mukene lano wigi rwate ki i dye ot. 28Ci kimwono kom lukerubi woko ki jabu.

29Ogoro cal i kor kicika ot orumu woko ducu, cal lukerubi, cal yadi otit, ki cal ature; ki bene ogoro cal i kor kicika ot ma i tyelo ki kicika madite. 30En ceng oweko kimwono dye ot ducu ki jabu, wa i kicika madite ma i tyelo bene kumeno.

31Dogola me donyo i Kabedo Maleng Makato ma i tyelo otiyo kikane aryo ki bao jeituni; rii me dogola ki okar dogola ryoryo ducu gubedo latwoke abic. 32En omiyo kiumu kom kika aryo me bao jeitunini ki cal ma kigoro pa lukerubi, cal yadi otit, ki cal ature. Ka kimwono komgi woko ki jabu, ka olilo jabu ikom cal lukerubi ki ikom cal yadi otit ducu.

33En bene ceng ociko ni kitii okar dogola me bao jeituni pi dogola me donyo i kicika madite; ma kitiyogi obedo latwoke angwen. 34Ka dok kitiyo kika aryo ki bao ciprec; ma kika aryonu ducu gibane abana. 35Ogoro cal lukerubi ikomgi, cal yadi otit, ki cal ature. Ka kimwono kom kika woko ki jabu ma kilenyo, ka olilo mapwot ikom cal ma kigoro ikomgini ducu. 36Kigero dyekal ma idyere ki godi apaya latyeng adek, ki bao cedar tyenge acel.

37Kiketo guti me Ot pa Rwot Lubanga i mwaka me angwen me loc pa Solomon i lobo Icrael i dwe Jib ma en aye dwe me abic. 38Ka dok i mwaka apar wiye acel me loc pa Solomon, i dwe Bul, ma en aye dwe me aboro, en aye kityeko iye tic ikom Ot pa Lubanga ducu, kun onongo lubu kit mayam ki poro kwede. Gerone otero mwaka abiro.