1 Luker 5

Solomon oyube me gero Ot pa Lubanga

(2 Tek 2:1-18)

1Kiram laloc me Turo ocwalo lutice bot Solomon ikare ma owinyo ni kiwire ki moo me bedo rwot ma oleyo katyen wone, pien Kiram obedo ki mar madit ikom Daudi nia wa con. 2Ci Solomon ocwalo lok bot Kiram ni, 3“Ingeyo ni wora Daudi pe yam ogero Ot pi nying Rwot Lubangane, pien pol kare obedo kalweny ki mony pa lumerok ma gurume omiyo gerone oloye, nio ka Rwot omiyo en oloyogi ducu. 4Ento i kareni Rwot Lubanga dong omiya yweyo i kabedo ducu; i kareni lamonewa mo dong peke, kadi wa peko mo. 51Pieno omiya atamo pi gero Ot pi nying Rwot Lubangana, kit mayam Rwot owaco bot wora Daudi ni, ‘Wodi ma abiketo i komkeri aye bigero Ot pi nyinga.’ 6Eyo in, dong icik pi tonga lwak yadi cedar me Lebanon. Lutica bene gibiribe ki lutici, ci an abiculi lim me mucara pa lutici kit ma iyubu; pien ingeyo maber ni pe tye dano mo ma ikinwa ma ngeyo tongo yadi macalo jo Cidon.”

7Ka Kiram owinyo lok pa Solomon, ci loke okweyo cwinye matek tutwal, ci owaco ni, “Kipak Rwot Lubanga ikare man, ma dong omiyo bot Daudi wode ma laryeko me bedo lalo roke man madit tutwali.” 8Kiram dok ocwalo lok bot Solomon kun waco ni, “Atyeko winyo kwenani ma i cwalo bota; an atye ma atere atera pi tiyo gin ducu ma imito ikom lok ma dok kom bao yat cedar ki bao yat ciprec. 9Lutica aye bikelogi i dog nam nia ki i Lebanon; ka dong wabitweyogi kacel ci ki kwangogi iwi pii macalo bwoda nio i kabedo ma ibinyuta, ka dong wabigonyo kin gi woko ka in dong ibigamogi ki kunu; ci ibimiya cam pi jo ma i oda kit ma abimito kwede.” 10Kiram ocwalo lwak bao cedar ki ciprec bot Solomon kit ma en mitoni, 11ci Solomon omiyo bot Kiram ngano ma nyige maromo guniya alip pyere abicel me acama pa jone ma i ode, ki moo nyig jeituni ma ki odo maromo debe alip pyere angwen. Solomon obedo kamiyo jami magi ducu bot Kiram mwaka ki mwaka. 12Rwot obedo kamiyo ryeko bot Solomon kit mayam ocike kwede; ci kuc obedo ikin Kiram ki Solomon; gin aryoni guketo gicike ikin gi.

13Ci rwot Solomon ocako nongo muroni pi tiyo tic matek i lobo Icrael ducu; ci ki rono2 dano alip pyere adek pi tic muroni. 143Ci Solomon ocwalogi i lobo Lebanon, kun cwalogi ki alip aparapar dwe ki dwe kun gi loce aloca i dog ticgi. Gibedo kunu i Lebanon dwe acel, ka dok gibedo i paco tugi dwe aryo; Adoniram en aye obedo ladit maloyo lutic muroni ducu. 15Solomon onongo bene tye ki luting yec alip pyere abiro, ki jo ma gipayo godi ma i lobo godi ma giromo alip pyere aboro, 16ka dok imed iye ludito ma giloyo dog tic alip adek ki miya adek ma Solomon oketogi, ma gin lulo lwak ma gitiyo tic. 17Gimuku godi ma dongo me wel, kit ma rwot ociko, me keto guti me te ot ki godi ma kipayo mabeco. 18Kitmeno lugedo pa Solomon ki pa Kiram, kacel ki jo Gebal, gubedo kapayo godi ki yubu bao ki godi me gero Ot pa Rwot Lubangawa.