1 Luker 4

Ludito wi tic pa Solomon ki lulo dul lobo

1Solomon obedo rwot maloyo jo Icrael ducu. 2Dano magi aye gubedo ludito wi lutice:

Ajaria wod pa Jadok en ceng tye ajwaka pa Lubanga; 3Elikorep ki Akija ma gin awobe pa Cica gubedo lukarani; Yekocapat wod pa Akilud obedo laco lok ma time; 4Benaya wod pa Yekoyada obedo ladit me mony; Jadok ki Abiatar aye gubedo ajwaki pa Lubanga; 5Ajaria wod pa Natan aye obedo ladit maloyo lulo dul lobo; ka Jabud wod pa Natan obedo ajwaka ki larem rwot; 6Akica obedo ladit maloyo lutic ma gwoko gangkal; ki Adoniram wod pa Abda obedo ladit maloyo tic muroni.

7Solomon obedo ki lulo dul lobo apar wiye aryo ma giloyo wi Luicrael ducu, ma ticgi obedo me coko cam pi rwot ki jone ducu; dano acel acel miyo cam matwero tyeko dwe acel i mwaka. 8Nyinggi en aye: Ben-kur onongo loyo lobo godi me Epraim; 9Ben-deker onongo loyo Makaj, Caalbim, Bet-cemec ki Elon-bet-kanan; 10Ben-keced oloyo Arubot ki Coko ki lobo Keper ducu; 11Ben-abinadab oloyo Napat-dor ducu. (Onongo dakone obedo Tapat ma nya pa Solomon.) 12Baana wod pa Akilud oloyo Taanak, Megiddo ki Bet-cean ducu matye kanget Jaretan ma i lung me Jejreel, ki cake i Bet-cean nio i Abel-mekola ki nio kwede wa kanget Jokmeam tungcel; 13Ben-geber oloyo Ramot-gilead, ki taun matino pa Jair wod pa Manace ma gitye i lobo Gilead, kacel ki lobo Argob ma i Bacan matye iye taun madito pyere abicel ma kicelo ki cel, ma dogcelgi kicego ki rii nyonyo bronze; 14Akinadab wod pa Iddo oloyo Makanaim; 15Akimaj oloyo lobo Naputali. En onongo ceng bene onyomo Bacemat ma nya pa Solomon. 16Baana wod pa Kucai oloyo Acer ki Bealot; 17Yekocapat wod pa Parua oloyo lobo Icakar; 18Cimei wod pa Ela oloyo lobo Benjamin; 19Geber wod pa Uri oloyo dul lobo Gilead mayam obedo lobo pa Cikon rwot pa Jo Amor ki pa Og rwot me Bacan. Dok onongo tye lalo lobo acel maloyo lobo Juda.

Lonyo ikare me loc pa Solomon

20Jo Juda ki jo Icrael yam gidwong adada marom ki kweyo ma i dog nam; gubedo kacam ki kamat ki yomcwiny. 211Solomon obedo kaloyo ker mapatpat ducu cake ki i kulu Euprate nio wa i lobo pa jo Piliciti, ki nio wa i lobo Ejipt. Jo me ker meno gubedo katyero mot bot Solomon kun gitiyo bote ikare me kwone ducu.

22Cam ma kimiyo bot Solomon pi nino acel acel onongo romo moko kwon mapwote guniya miya acel, moko kwon mukene guniya miya aryo, 23twoni mucwe apar, dyangi pyere aryo ma kikwayogi i olet, romi miya acel, ma pe iribo iye til ki bure ki abur, ki gweni mucwe. 24En onongo bwoyo lobo ducu ma tung kupotoceng cake i kulu Euprate, kun cake ki i Tipica nio wa i Gaja, kun loyo ki luker ducu cake ki i kulu Euprate odok kwede tung kupotoceng; en bene obedo ki kuc i kabedo ducu murumu lobone. 25Ikare meno Juda ki Icrael bene gubedo mot ki kuc cake ki i Dan nio kwede wa i Beer-ceba, kun dano acel acel bedo gire ite oloke ki ite odurune ikare me loc pa Solomon ducu. 262Solomon obedo ki kabedo me gwoko aguragurane ma kiromo gwoko iye aguragura alip pyere angwen pi ywayo gadigadine me lweny, ki lulweny alip apar wiye aryo ma giringo ki aguragura. 27Lulo dul lobo mapatpat gubedo kamiyo cam bot rwot Solomon ki bene pi jo ducu ma gicito kacam bote, kun dano acel acel miyo i dwene; ci pe gumiyo gin mo orem. 28Ki reng cayiri bene ki reng ngano pi cam pa aguragura ki pi aguragura mukene ma gidwire kitero ducu i kabedo ma kimitogi iye, kun ngat acel acel kelo kit ma kiciko.

29Lubanga omiyo Solomon obedo ki ryeko ki niang matut mada; tame lac marom ki kweyo ma oyare i dog nam. 30Kitmeno ryeko pa Solomon okato ryeko pa jo ducu mayam gitye tung kunyango, wa ki ryeko pa jo Ejipt ducu. 313En onongo ryek makato jo mukeneni ducu, en obedo laryeko makato Etan ma jo Jera, ki Eman, ki Kalkol ki Darda ma gin awobe pa Makol; ci nying Solomon oywek oromo i rok ducu ma orumugi. 324En bene obolo carolok maromo alip adek; ki wer ma en ceng ocako romo alip acel ki nyige abic. 33Oloko ikom yadi kun ocako ki ikom yat cedar matye i Lebanon nio kwede wa ikom anyero ma twi dongo ikom cel got; oloko bene wa ikom lee tim, ki ikom winyogu, ki ikom gin ma lakalaka ki pinygu, ki ikom recgu. 34Ci lwak dano ma i rok ducu gubino ikare ma guwinyo pi ryeko pa Solomon, ki dong lwak mapol gua ki bot luker mukene ma iwi lobo wek gibiwiny ki itgi dok ginen kit ryeko man pirgi ken gi.