1 Luker 3

Solomon onyomo nya pa Parao

1Solomon ceng oribe ki Parao laloc me Ejipt ka lacen en dok onyomo nyare; ci otero nya pa Parao i taun madit pa Daudi nio ka dong otyeko gero ode kikome ki Ot pa Rwot, ki cel ma orumu Jerucalem. 2Ento lwak gire gubedo katyero gitum i kabedo me woro Lubanga ma iwi godi, pien onongo peya kigero ot mo pi nying Rwot Lubanga.

Solomon olego pi ryeko

(2 Tek 1:1-13)

3Solomon yam omaro Rwot Lubanga, kun lubu cik pa wone Daudi, en onongo pud tumu gitum dok wango odok eceta i kabedo me woro Lubanga matye iwi godi. 4Inino mo acel Solomon ocito i Gibeon pi tumu gitum kunu, pien meno aye yam obedo kabedo madite me woro Lubanga. Inino meno Solomon otyero gitum awanga alip acel kulu iwi keno tyer. 5Ka Solomon pud tye i Gibeon, Rwot Lubanga onyute bote iwang lek i dyewor, ci owace ni, “Peny gin ma imito ki bota.” 6Ci Solomon ogamo dog Rwot ni, “In yam inyutu mar meri madwong ma pe loke bot wora Daudi ma latici, pien obedo ka kwo inyimi ki gen madwong ki tim ma atir, ma cwinye leng; in bene igwoko mar meri madit ma pe loke pire, dok bene ityeko miyo wode obedo iwi komkere i kareni. 7Ai Rwot Lubanga, kombedi dong iketa, an latici, adoko rwot ma ka wora Daudi, kadi bed pud an latin, ma peya angeyo loyo dano. 8An dong atye ikin joni mayam iyerogi, rok madit ma pe kwane, ma welgi bene pe ngene pi polgi. 9Ber in Rwot i miya cwiny me ryeko me loyo lwaki, wek ange poko kin gin maber ki gin marac; anga mono matwero loyo rok man maditi?”

10Ci Rwot cwinye obedo yom ikom Solomon pi gin ma en olego. 11Lubanga dok owaco bote ni, “Pien ilego gin ma kit man, ma kun bene pe ilega ni amii irii iwi lobo nakanaka, pe bene ilego pi lonyo, kadi pi kwo pa lumeroki, ento ilego ni kimii cwiny me ryeko ki me poko gin matye atir, 12abitiyo kit ma ilegoni. Nen, dong atyeko mini ryeko ki cwiny me poko kin lok mapatpat ikit rwom ma peya onen ikom dano mo nia wa con, dok bene ngat mo macalo in pe binen ki i ngeyi. 13Dok abimini gin ma pe ilego pire bene, abimini lonyo ki deyo, wek rwot mo pe obinen ma kibiporo ki in pi kwoni ducu. 14Kace ibilubu yona kun i mako cika ki lok ma aciko ducu, kit mayam woru Daudi olubuni, ci abimedo mwaka me kwoni weko i rii iwi lobo kare malac.”

15Ka Solomon oco, ci onongo ni kara ebedo ka leko lek. Ka dong obino i Jerucalem, en ocung inyim Canduk me Gigike pa Rwot, ka dok otyero gitum awanga ki gityer lakwe cwiny, ci otedo karama pi lutice ducu.

Solomon ongolo kop ki ryeko

16Inino mo acel mon aryo ma lukwele gubino bot rwot Solomon, ci gucung inyime pi ngolo kop. 17Dako acel owaco ni, “Ai rwoda, dako man ki an wabedo i ot acel, ci an anywalo latina ma onongo en tye i ot kweda. 18Dok inge nino me adek cake ikare ma agonye kwede, en bene onywal; dano mo onongo pe tye kwedwa i ot meno, ento onongo watye wan aryo keken. 19Ci dako man obutu ikom latine i dyewor, omiyo latin oto. 20En oa malo ki i dyewor, ci otingo woda woko ki kangeta; ma onongo an anino woko ci opyele i kabutune, ka dok opyelo kom wode muto ni i kabutuna. 21Ka oo odiko, ci aa malo ka doto latina; ci nen, anongo dong oto woko, ma abedo ka ngiyo kome, ci nen anongo ni, pe en aye latina ma anywaloni.” 22Ento dako lawoteni waco ni, “Pe kumeno; latin makwoni: aye mera, latin mutoni meri.” Dako mukwongoni odoke iye ni, “Pe, latin mutoni aye meri, latin makwoni aye mera.” Gubedo kalok kumeno inyim rwot.

23Ka rwot dok owaco bot mon meno ni, “Ngat man waco ni, ‘Man makwoni aye latina, latini en mutoni;’ ci mukene gamo ni. ‘Pe; ento mutoni aye latini, makwoni aye mera.’” 24Ci rwot dok olwongo latice acel ci owace ni, “Kela pala lucwan.” Ci ki kelo pala lucwan inyim rwot. 25Cut rwot ociko latice acel ni, “Kipok i latin makwo ni aryo, wek ki mi dul acel bot dako acel, ki dulle tungcel bot lawote.” 26Ci dako ma wode tye makwoni owaco bot rwot ni, “Ai, rwoda, mi latin makwoni bote, pe i nek aneka!” Pien cwinye ocwer pi latine. Ento mukeneni ogamoni, “Pe ki pok iye wek pe dong obed mera nyo meri.” 27Lacen rwot ogamo lokgi kun waco ni, “Mi latin makwoni bot dako mukwongoni. Pe kinek woko, en aye min latin meno.” 28Ka jo Icrael guwinyo kit kop ma rwot ongoloni, ci gubedo ki woro madit ikom rwot; pien guniang ada ni ryeko pa Lubanga me poko lok onong tye i iye, pimeno omiyo en ongolo kop ma atir.