1 Luker 2

Daudi ociko Solomon

1Ka kare me to pa Daudi dong onyiko cok ci en ociko Solomon ki lok magi: 2“An dong acok to woko. Bed dano matek, dok i cam co. 3Mak cik pa Rwot Lubangani kun iwoto i yone, ma kun ilubu lok ducu ma en ociko, dok bene gin ducu ma ceng en omiyo botwa wek obed lok me caden, ikit ma kicoyo kwede i buk pa Moses, wek ibed ki gum ikom gin ducu ma itiyo, ki kama idok iye ducu. 4Rwot omok loke ducu mayam oloko ikomi, ma owaco ni. ‘Kace awobeni gibigwoko kitgi maber, kun gibedo dano ma gin lugen inyima ki cwinygi ducu, ki tipu komgi ducu, ci pe ibibedo labongo danoni mo ma bibedo iwi komker me loyo lobo Icrael!’ 51

Ento in ingeyo gin mayam Joab wod pa Jeruya otiyo ikoma, ki kit ma otimo ki ludito mony pa jo Icrael aryoni. Abneri wod pa Ner ki Amaca wod pa Jeter, ma en ceng onekogi woko pi culu kwor ikare me kuc pi remo mayam oo i dog lweny i mony ca. En oreyo remo pa jo ma gipe ki bal idoga. 6Myero in i tim ikome muporo ryekoni; ento pe iwek en oto to tiyo. 72Ento inyut cwiny me mar ki awobe pa Barjilai ma jo Gilead, wek gubed ikin dano ma gicamo iwi mejani; gin bene yam gubedo ki mar kweda kumeno ikare ma gunonga ka aringo omeru Abcalom. 83Dok gin mukene bene ma pud mite ni i tii iye aye lok ikom Cimei wod pa Gera ma Labenjamin ma ganggi tye i Bakurim. En yam obedo kalamo an ki cen maracu tutwal ikare ma onongo acito i Makanaim; ento ka en ceng obino karwate kweda i dog kulu Jordan, ci akwongo kwong bote ki nying Rwot kun awaco ni, pe abineke ki pala lucwan. 9Eyo, in pe ibedo kwede macalo en pe tye ki bal mo. In laryeko, ibingeyo kit ma ibitime kwede ikare mo i anyim, pien ibingolo to i wiye.”

To pa Daudi

(1 Tek 29:26-30)

10Lacen Daudi oto ma dong otii likong, ci en oywe kacel ki kwarine ki kuc, ci kiyike i taun madit pa Daudi. 114Daudi oloyo lobo Icrael pi mwaka pyere angwen; en ocako bedo kaloc i Kebron pi mwaka abiro, ka dok i Jerucalem pi mwaka pyere adek wiye adek. 125Kitmeno Solomon obedo iwi komker pa wone Daudi, ci kere omoko matek.

To pa Adoniya

13Adoniya wod pa Kagit obino bot Batceba ma en aye min Solomon. Batceba openye ni, “Ibino ki kuc?” Ci en ogamo ni, “Abino ki kuc.” 14Ka dok owaco ni, “Atye ki gin mo ma amito titi.” Ci Batceba ogamo ni, “Tita do.” 15Adoniya ocako lok kun owaco ni, “Ingeyo ni ker man yam mera, dok jo Icrael guye ni alogi; ento ker dok oloke odoko pa omera, pien onongo Rwot mito kumeno. 16An atye ki lega mo acel ma amito penyi kwede; pe i kwer doga.” Ci Batceba ogamo ni, “Tita gin ma itye kamitone do.” 176Ci Adoniya owace ni. “Alegi ipenya rwot Solomon, pien angeyo ni en pe bikwero dogi, wek en omiya Abicagi ma Lacunam obed dakona.” 18Batceba ogamo ni, “Ber matek; abitito lok man bot rwot.” 19Ci Batceba ocito katito lega pa Adoniya bot rwot Solomon. Solomon oa malo pi jolo mine, okule piny bot mine; ka odok obedo iwi komkere, ka dok olwongo kikelo kom pi min rwot bene, ci en obedo tung acuc. 20Ka Batceba ocako owaco bot rwot ni, “Atye ki lega mo acel ma amito penyi kwede; pe i kwer.” Ci Solomon ogamo doge ni, “Wac legani nu, maa; pien pe abikwero lok dogi.” 21Ci mine owaco ni, “Wek Abicagi ma Lacunami kimii bot Adoniya obed dakone.” 22Ci rwot Solomon odoke iye ni, “Pingo ilego ni amii Abicagi ma Lacunam bot Adoniya? Leg bene wa pi kera ducu do; pien en omera madite, en gire con onongo tye ki cwak pa ajwaka Abiatar ki Joab wod pa Jeruya mayam gucung kangete wek ebed rwot.” 23Ci rwot Solomon okwongo kwong matek ki nying Rwot kun waco ni, “Lubanga oket can ikoma kitmeno ki makato kace pi lok man pe amiyo Adoniya oculu ki kwone! 24Kombedi, macalo Rwot tye makwoni, ma dong omoko kera, ma oketa iwi komker pa wora Daudi, ma oketa adoko rwot, dok omiyo jo me oda gucung matek kit mayam ociko ni, Adoniya tin ma ceng pud pe opoto kibinekone woko.” 25Cut rwot Solomon ocwalo Benaya wod pa Yekoyada ki twero me lubu kor Adoniya, ci Benaya lawi mony ocito ocobo Adoniya ki tong oreto piny, oneko woko.

Kiryemo Abiatar ka kineko Joab woko

267

Rwot Solomon owaco bot ajwaka Abiatar ni, “Cit i Anatot, i paconi, pien in imyero ki to. Ento peya abineki ikare ni, pien yam ibedo katingo Canduk pa Rwot Lubanga inyim wora Daudi, dok pien in bene yam iribe ki wora ikare ma en oneno can madwong.” 278Ci Solomon okwanyo Abiatar woko ki i tic me bedo ajwaka pa Rwot. Ma omiyo lok pa Rwot mayam oloko i Cilo ma mako jo me ot pa Eli ocobe ka kare.

28Ka Joab owinyo gin mutime, ci oringo olaro i Ot Kema pa Rwot, omako ten keno me keno tyer; pien Joab nene onongo obedo kakonyo Adoniya, kadi bed yam pe oye konyo Abcalom ikare ca ma oete ikom wone Daudi. 29Ka kitito pire bot rwot Solomon ni nen, “Joab oringo olaro i Kema pa Rwot, tye wa i kanget keno tyer,” Ci Solomon ocwalo Benaya wod pa Yekoyada kun waco ni, “Cit i cobe i rete woko piny.” 30Ci Benaya ocito i Kema pa Rwot, owace ni, “Rwot Solomon ociko ni ikat woko.” Ento Joab ogamo ni, “Pe, abito ki kany.” Ci Benaya odwoko lok ma Joab owaco bot rwot.

31Solomon odok iye bote ni, “Tim kit ma en owaco ni, cobe i rete woko piny. Ci ibiyike woko, wek kikwany alii woko ki ikoma ki ikom ot pa wora pi remo pa dano mayam Joab onekogi labongo bal mo ma gin gutimo. 32Rwot bidwoko tim me oyo remo meno i wiye kikome, pien en yam opoto ikom twoni oteka lwenywa aryo ma cwinygi atir ma gibeco gikato en, ci onekogi woko ma wora Daudi pe ngeyo en aye Abneri wod pa Ner ma lawimony maloyo mony pa jo Icrael, ki Amaca wod pa Jeter ma lawimony maloyo mony pa jo Juda. 33Alii me togi bidok iwi en Joab ki iwi likwaye matwal; ento ki bot Daudi ki bot likwaye ki jo me ode ducu, ki bot komkere, kuc ma a ki bot Rwot bibedo iye nakanaka.” 34Ci Benaya wod pa Yekoyada ocito kunu, ocobo Joab oreto piny oneko woko; ci kiyike i pacone kikome matye i dye tim aroo me Juda. 35Ka rwot ocako keto Benaya wod pa Yekoyada me bedo ladit maloyo mony ma ka Joab, ka dok oketo Jadok me bedo ajwaka pa Lubanga ma ka Abiatar.

36Lacen rwot ocwalo kwena me lwongo Cimei bote, ka owaco bote ni, “Ger odi piri keni i Jerucalem, ibed iye kunu, pe ia ki kunu icit i kabedo mo mukene. 37Ento inino mo keken ma ibia icito iye woko keni, ma ibingolo iye nota ora Kidron, ci myero i nge atir ni ibito pimeno; alii me toni bidok gire iwii.” 38Cimei ogamo dog rwot ni, “Lok ma iwaconi ber, rwoda rwot; abitimo kit ma iwaconi.” Ci Cimei obedo i Jerucalem pi kare malac.

39Ka mwaka adek okato, ci opii aryo pa Cimei guringo woko wa bot Akic wod pa Maaka, ma laloc me Gat. Ka kitito bot Cimei ni, “Opiini gitye i Gat bot Akic,” 40ci Cimei oa, otweyo kom me bedo inge kanane, ci ocito i Gat bot Akic kayenyo kor opiine. Ka Cimei onongogi, ci odwokogi cen. 41Ka kitito lok man bot Solomon ni Cimei otyeko a woko ki i Jerucalem, ocito wa i Gat ka oloke odwogo, 42ci rwot ocwalo dano kalwongo Cimei, ci owaco bote ni, “Yam pe amiyo ikwongo kwong i nying Rwot, kun ajuki matek ma awaco ni, ‘nge atir ni, inino ma i bicito iye woko i kabedo mo mukene, ibito?’ Ci in igamo doga ni, ‘Lok ma iwaconi ber; abilubu.’ 43Ci pingo nene pe dong igwoko kwongi ma i kwongo inyim Rwot, ki cik mayam aciki kwede?” 44Rwot Solomon dok owaco bot Cimei ni, “In ingeyo ki i cwinyi kit tim maracu ducu mayam itimo ikom wora Daudi; Rwot bene bidwoko timi ducu maracu meno poto iwii kikome. 45Ento an abibedo ki gum, ki komker pa Daudi bimoko matwal inyim Rwot.” 46Ka dong rwot dok ociko Benaya wod pa Yekoyada; ci okato woko ocobo Cimei oreto piny oneko woko. Kitmeno ker omoko matek i cing rwot Solomon.