1 Luker 1

Rwot Daudi ikare me tiyone

1Ikare meno Daudi laloc madit me lobo Icrael onongo dong otii tutwal, kadi bed lutice gium kome ki lwak bongo um ma kidodo mapol ikome, ci pe winyo lyeto mo wa ki acel ikome. 2Ka lutice guneno man gudok iye bote ni, “Ladit rwoda, wek kiyeny nyako mo matidi ma peya obutu ki laco kikel boti, wek obut kacel kwedi omur kori, ogwoki bene, ladit rwot, ci omiyi lyeto.” 3Ci kiyenyo nyako mo matidi ma mwonya ki i lobo Icrael ducu, ci gunongo Abicagi anyira Cunam, gukele bot Daudi. 4Nyako meno onongo mwonya mada. En nyakonu otugi doko lagwok rwot cut, kun tiyo tic ducu; ento rwot pe oloko odoko dakone.

Adoniya oete i ker

51

Ikare meno Adoniya ma mine Kagit ceng onywale bot Daudi ongwete pi dit wiye kene kun waco ni an, “Abibedo rwot me Icrael.” Ci oyubu gadigadi lweny ki wegi aguragura, ki dano pyere abic, oketogi me ringo inyime. 6Yam wone onongo peya ocoke ikare mo keken, nyo pi penye ni, “Pingo itimo kuman onyo itiyo gin munyoni!” En odongo nia wa i tinone makome mwonya mada ma neno mit; yam mine onywale olubu nge Abcalom. 7Adoniya opiro lok ki Joab wod pa Jeruya ki ajwaka Abiatar, ci gulubu kor Adoniya kun gukonye i yub mere me leyo loc ki bot wone. 8Ento ajwaka Jadok, Benaya wod pa Yekoyada, lanebi Natan, Cimei, Rei ki oteka lweny pa Daudi yam pe gitye tung bot Adoniya.

9Adoniya otyero romi ki twoni ki lee ma gucwe bot Lubanga inyim got Twol matye inget En-rogel, ka olwongo iye omegine ducu ma awobe pa wone Daudi ki ludito abembem ducu ma i ker me Juda ma gitiyo bot rwot. 10Ento pe olwongo lanebi Natan, kadi Benaya, kadi twoni oteka lweny pa Daudi, kadi wa omine Solomon. 112

Natan owaco bot Batceba min Solomon ni, “In peya iwinyo ni Adoniya wod pa Kagit otyeko wire me doko laloc me Icrael ma rwotwa Daudi bene pe ngeyo lok mo iye? 12Eyo, kong dong ia ibin kany wek amiyi lok me ryeko, ka wek alar kwoni ki kwo pa wodi Solomon. 13Cit oyot bot rwotwa Daudi, iwace ni, ‘Yam ikwongo kwong bota, ladit, kun iwaco ni, woda Solomon aye bicamo keri, en aye bibedo iwi komkeri. Pingo Adoniya aye tin odoko rwot?’ 14Ikare ma nongo pud itye kalok ki rwot, an bene abibino i kori kamoko loki ni tye ada.”

15Batceba oa ocito bot rwot wa i kicikane. Onongo rwot dong otii tutwal, kun Abicagi anyira Cunam obedo kamiyo kony ma mite ikome. 16Ka Batceba obino bot rwot ci en okulu wiye kun ryebe piny me woro cware. Ci Daudi openye ni, “Gin ango ma cwinyi mitoni?” 17Ci Batceba ogamo ni, “Rwoda, yam ikwongo kwong bota ki nying Rwot Lubangani kun iwaco ni, ‘Solomon ma woda aye bicamo keri, en aye bibedo iwi komkeri.’ 18Kombedi nen ba, Adoniya aye dong odoko rwot, kadi bed in rwoda pe ingeyo iye gin mo. 19En otyeko tyero twoni ki lee ma ocwegu ki lwak romi mapol tutwal, ka dok olwongo awobe pa rwot mukeneni ducu, ki ajwaka Abiatar, ki Joab ladit me mony bene; ento pe olwongo latici Solomon. 20Ka dong lok tye kuman Rwoda, kombedi wang jo Icrael ducu gineno boti pi tito botgi ngat ma bibedo iwi komkeri ka in dong i peke. 21Gwok nyo kare biromo ma nongo in rwoda dong i to woko, iywe kacel ki kwariwu, ci an ki woda Solomon aye kibinenowa macalo wan lubal!”

22Ikare ma Batceba tye kalok ki rwot, lanebi Natan bene obino i ot. 23Lukur rwot guloko bote; kun giwace ni rwot, “Lanebi Natan bene tye kany.” Ka Natan odonyo i ot, ci oryebe inyim rwot kun okulu wiye piny me wore. 24Lacen Natan oloko bote kuman ni, “Rwoda Daudi, onongo in mono ceng iwaco ni, ‘Adoniya aye bileyo ka tyeni, en aye bibedo iwi komkeri?’ 25Gin ma omiyo apenyo man en aye ni, en dong ocito woko, otyero twoni ki lee ma ocwegu, ki romi mapol tutwal, dok olwongo awobe pa rwot mukeneni ducu, ki Joab ladit me mony, ki ajwaka Abiatar. Nen, gin ducu gitye kacam ki mat inyime kun giwaco ni, ‘Rwot Adoniya obed kwo nakanaka!’ 26Ento an ma latici, ajwaka Jadok, Benaya wod pa Yekoyada, ki latici Solomon, en pe olwongowa. 27Lok man in rwoda Daudi aye imiyo otime bo, kun bene pe itito botwa wan lutici anga ma bibedo iwi komkeri ka in dong i peke?”

28Rwot Daudi ogamo ni. “Lwong Batceba obin bota.” Ci Batceba obino bot rwot, ka ocung inyime. 29Daudi dok okwonge kun waco ni, “Macalo Rwot tye makwoni, mayam okoko kwona ki i cing lukwora, 30macalo yam bene akwongo kwong boti ki nying Rwot Lubanga pa Icrael kun awaco ni, ‘Wodi Solomon aye bileyo katyena, en aye bibedo iwi komkera me leyo kakara,’ tin atina dong abiketo i tic.” 31Ci Batceba okulu wiye ka oryebe piny pi woro rwot ka ocako lok kun waco ni, “Myero rwoda rwota Daudi obed kwo kun rii nakanaka!”

32Ka dok Rwot Daudi owaco ni, “Wulwong ajwaka Jadok obin bota, ki Benaya wod pa Yekoyada.” Ci gin gubino bot rwot. 33Ci rwot owaco botgi ni, “Wucit ki acikarina, wuket woda Solomon iwi kanana kikome, ci wutere cok ki wang it ma i Gikon. 34Ki kunu wumii ajwaka Jadok ki lanebi Natan guwire ki moo me bedo rwot me Icrael ki lobo Juda, ka lacen wukut tum kun wuwaco ni, ‘Rwot Solomon obed kwo nakanaka!’ 35Ka wun dong wubilubu kore, ka en bibino ci bibedo iwi komkera; pien en aye bibedo rwot ma leyo kakara, an dong atyeko keto en me bedo laloc iwi Icrael ki iwi Juda bene.” 36Ci Benaya wod pa Yekoyada ogamo dog rwot ni, “Amen! Myero Rwot Lubangani, rwoda rwot omok lok man ma iwaconi. 37Kit ma Rwot yam obedo kwedi, rwoda Daudi, en dok obed ki Solomon bene kitmeno, omii komkere obed dit makato meri.”

38Ajwaka Jadok, lanebi Natan, Benaya wod pa Yekoyada, ki jo Keret ki jo Pelet, gucito guketo Solomon obedo iwi kana pa wone Daudi, ka gukele kwede ki iwang it ma i Gikon. 39Ci ajwaka Jadok okwanyo moo ma i tung romo ma onongo con tye i kema pa Rwot, owiro ki Solomon ki kunu. Lacen gukutu tum, ci lwak ducu gugamo ni, “Rwot Solomon obed kwo nakanaka!” 40Dano gucako mol i kore kun gikutu nyamulere ma cwinygi yom adada, ma ngom yenge pi dwon gi.

41Adoniya ki welene ducu inge tyeko karamagi guwinyo wo licu i dye taun madit. Ka Joab owinyo dwon tum ci openyo ni. “Woo madit ma i taun madit nyutu gin ango?” 42Ikare ma en pud tye kalok, Yonacan wod pa ajwaka Abiatar otuc, ci Adoniya owace ni. “Dony, pien in dano ma kigeno, man nongo i kelo lok maber.” 43Ento Yonacan ogamo dog Adoniya ni, “Pe kumeno, ladit, pien Rwoda rwotwa Daudi dong otyeko keto Solomon me bedo rwot. 44En otyeko cwalo ajwaka Jadok, lanebi Natan, Benaya wod pa Yekoyada, jo Keret, jo Pelet, ci guketo Solomon obedo iwi kana pa rwot. 45Ajwaka Jadok ki lanebi Natan gutyeko wire ki moo i Gikon me bedo rwot; gucito nia ki kunu ma cwinygi yom, en aye omiyo wo tye i taun madit. Man aye dwon ma wuwinyoni. 46Solomon dong obedo iwi komker, 47dok bene lutic pa rwot gucito ka pwoyo rwotwa, rwoda Daudi, kun giwaco ni, ‘Lubangani omii nying Solomon oywek mada makato meri, dok omii komkere obed dit makato komkeri!’ Ci Daudi okule piny iwi kitandane, 48ka owaco bene ni, ‘Kipwo Rwot Lubanga pa Icrael, ma otyeko keto ngat acel ki ikin lutinona obedo iwi komkera tin, ma kun aneno ki wanga.’”

49Ci lwak wele pa Adoniya ducu komgi ocako myel, ci gutware ki kunu ma ngat acel acel okemo yone kene. 50Adoniya ocako lworo Solomon, ci oa ocito, omako ten keno me keno tyer matye i kema pa Rwot. 51Kitito pire bot Solomon kun kiwaco ni, “Nen, Adoniya dong lwori, rwot Solomon, pien ocito omako ten keno me keno tyer matye i kema pa Rwot kun waco ni, ‘Wang ma rwot Solomon okwongo kwong bota ni pe ebineka, an latice, ki pala lucwan, ci abia ki kany.’” 52Solomon ogamo loke kuman kun waco ni, “Ka en bibedo dano ma gene, ci yer wiye mo pe bipoto piny; ento ka rac mo onen ikome, ci en bito.” 53Kitmeno rwot ocwalo dano ci gukwanyo Adoniya woko ki ikom keno tyer, ci ocito oworo rwot Solomon, ci Solomon owaco bote ni, “Cit i odi.”