2 Camuel 24

Daudi okwano wel jo Icrael ki Juda

(1 Tek 21:1-27)

1Kiniga dok omako Rwot ikom jo Icrael, ci opiyo Daudi ikomgi kun owace ni; “Cit ikwan wel jo Icrael ki Juda.” 2Kitmeno Daudi owaco bot Joab ki ludito wi mony ducu ma gitye bote ni, “Wucit ka kwano dano ikin kaka ducu ma i Icrael, cake ki i Dan nio kwede wa i Beer-ceba, kun wukwano dano ducu.” 3Ento Joab ojuku rwot kun owace ni, “Myero Rwot Lubangani aye omed wel lwaki tyen miya kulu, kun in rwot ineno ki wangi, ento pingo cwinyi mito ni ikwan dano kit man, ladita rwot?” 4Ento lok pa rwot obedo tek makato pa Joab ki pa ludito wi monye ducu, omiyo Joab ki ludito wi mony gukato woko ki inyim rwot, ci gucito ka kwano wel jo Icrael. 5Ka gungolo loka kulu Jordan, ci gucako kwano wel dano cake ki i Aroer ki i taun matye i dye nota, ci gukemo Gad, guo kwede wa i Jajer. 6Ka gumede kiwoto wotgi wa i Gilead ki i Kadec ma i lobo pa jo Kit; ka guo kwede wa i Dan, ci guloke gudok tung Cidon, 7ka gumede kwede wa i taun me cel gogo me Turo ki i taun gi ducu pa jo Kiv ki jo Kanaan; ka dok gucito kwede i Negeb me Juda kun giwok ki i Beer-ceba. 8Ka gurumu i lobo ducu, ci guo kwede i Jerucalem ma onongo dong otero dwe abongwen ki nino pyere aryo. 9Ka Joab omiyo wel dano ma en okwanoni bot rwot, ci gunongo i Icrael tye iye oteka lweny ma wegi pala lucwan alip miya aboro, ki i Juda giromo alip miya abic.

10Ka Daudi okwano wel dano otum, ci cwinye ocako poto. Ci Daudi obako doge bot Rwot kun waco ni, “Abalo twon bal man maditi pi gin ma dong atimo inyimi. Ento, ai Rwot, kombedi dong alegi ni ikwany roc man woko ki ikoma, pien atimo lok me mingo tutwal.” 11Ka dong Daudi oa malo odiko con, ci lok pa Rwot obino bot lanebi Gad, ma lanenpiny ma konyo Daudi. Rwot owace ni, 12“Cit iwac bot Daudi ni, ‘Rwot owaco kuman ni, abimiyi lok adek; in ikwany acel ki ikin gi wek amii opot ikomi.’” 13Kitmeno Gad obino bot Daudi, otite lok meno kun wace ni, “Imito kec aye opot i lobowu otyek mwaka adek? Nyo imito lumerok guryemwu wek wuring inyimgi pi dwe adek kulu? Nyo two gemo aye opot i lobowu otyek nino adek? Ci in kong itam wek inong kit ma abidok iye bot Rwot ma ocwala botini, ka wek adwoke lok meno.” 14Daudi owaco bot Gad ni, “An dong adonyo i twon can madit ma pe wace. Wek wapot i cing Rwot, pien kicane dwong; ento pe apot i cing dano.”

15Ci Rwot ocwalo two gemo opoto ikom jo Icrael cake odiko nio kwede inino ma ocikoni. Dano guto cake ki i Dan o kwede wa i Beer-ceba maromo alip pyere abiro kulu. 16Ikare ma lamalaika pa Rwot matye kaneko dano oryeyo cinge okemo Jerucalem wek etyek woko, ci Rwot ongut ikom gin man marac. Ojuku lamalaika kun waco ni, “Man dong oromo; wek dong obedi.” Onongo lamalaika pa Rwot tye inget laro moyo pa Arauna ma jo Jebuc. 17Ka Daudi oneno kom lamalaika matye kaneko lwaki, ci owaco bot Rwot ni, “Nen, atyeko tiyo bal, atimo roc madit; ento lwak romi man gutimo kit roc ango? Alegi ni, wek cingi opot ikoma ki ikom jo me ot pa wora keken.”

18Ci Gad dok obino bot Daudi inino meno, ci owace ni, “Dong icit kacano keno tyer pi Rwot i laro moyo pa Arauna ma jo Jebuc.” 19Daudi ocito kunu kit ma Rwot ocike kwede pi lok pa Gad. 20Ka Arauna obolo wange kaneno piny, ci oneno rwot ki lutice ka gibino gikemo en atir, ci ocito omiyo woro bot rwot kun oryebe piny inyime.

21Ci Arauna openye ni, “Pingo ibino bota tin, ladita rwot?” Ci Daudi ogamo ni, “Abino kawilo laro moyoni wek acan iye keno tyer pi Rwot wek two gemo okee woko ki ikom lwak.” 22Arauna owaco bot Daudi ni, “Ladita rwot in iter larona, ityer iye gin ma ineno ni ber. Twoni me gitum awanga bene ene, ki opam me dino bel ki rii ngut twoni gubed me yen. 23Magi ducu an Arauna amiyo boti, rwot.” Arauna dok owaco bot rwot ni, “Rwot Lubangani aye ogam moti.” 24Ento rwot ogamo dog Arauna ni, “Pe kumeno, abiwilogi ki boti awila, kun aculu pire ki lim; pien pe atwero tyero gitum awanga mo bot Rwot Lubangana ma pe awilo ki lima.” Kitmeno Daudi owilo laro moyo pa Arauna wa ki twonine bene, en oculu cekel me ryal pyere abic pirgi. 25Ci Daudi ocano iye keno tyer pi Rwot, ka otyero gitum awanga kunu, ki gityer me berbedo. Pieno Rwot owinyo bakodoge pi lwak ki pi lobogi, ci two gemo okee woko ki i lobo Icrael.