2 Camuel 23

Lok pa Daudi me agikine

1Man aye lok ma Daudi oloko me agikine:

Lok pa Daudi wod pa Yece, lok pa dano ma gipilo wiye tutwal, dano ma Lubanga pa Yakobo owiro, lawer jabuli mamit i Icrael.

2“Cwiny pa Rwot aye miyo aloko,

loke winye ki ileba.

3Lubanga pa Icrael oloko,

Lubanga ma obedo got matek pa Icrael owaca ni,

‘Ka dano mo loyo lwak maber, kun loyo ma lworo Lubanga,

4deyone nen ikomgi macalo ceng maryeny i odiko,

macalo ceng maryeny odiko ma nongo pol pe,

dok bedo calo kot ma twiyo lum ki i ngom.’

5Eyo, oda pe ocung kitmeno kacel ki Lubanga?

Pien otyeko keto gicike kweda ma bedo nakanaka,

ma oyubu kikore, dok bigwoko maber.

En bimiyo gin ma konya

ki gin ma amito mede ameda.

6Ento jo ma pe gilworo Lubanga ducu gicalo okutu ma kibolo woko,

ma dano pe twero mako ki cinge nono.

7Dano ma gudu komgi makogi ki nyonyo nyo bol tong

ci mac aye wangogi tyeko woko.”

Twoni oteka lweny pa Daudi

(1 Tek 11:10-41)

8Magi aye nying twoni oteka lweny mayam gibedo bot Daudi: Joceb-bacebet ma jo Takemon, en aye ladit pa “jo adeki.” En yam okato ki tonge ikom dano miya aboro ci onekogi woko ducu lawangacel.

9Ngat ma lubu en ki ikin twoni oteka lwenye adeki aye Eleajar wod pa Dodo ma jo Akoki. En obedo kacel ki Daudi ikare ma guywayo mony ikom jo Piliciti ma gucoke kalweny kunu, ci jo Icrael guringo gujer ki ngegi. 10Ci en Eleajar ocako neko jo Piliciti nio wang ma cinge ojony omoko ikom pala lucwane. Rwot omiyo ki gin loc madit tutwal inino meno. Lacen jo Icrael gudwogo cen kalubu kore, ento gubino pi lunyu jami ki ginarukagu ki ikom dano ma kinekogi keken.

11Twon oteka lweny ma olube aye Cama wod pa Agee ma jo Karar. Ikare ca jo Piliciti dok gucoke kacel i Leki kama poto ngor tye iye, ci mony pa jo Icrael dok guringo woko ki inyim jo Piliciti. 12Ento Cama aye ocamo co, ci obino ocung i dye poto ngor pi larone, ka ocako neko jo Piliciti, ci Rwot dok omiyo loc madit tutwal tung bot jone.

13Ikare ma gikayo kac jo adek ki ikin jo pyere adeki gucako wot, ci gucito bot Daudi i boro got matye i Adulam; onongo buca mony pa jo Piliciti ogony i nota Repaim. 14Ikare nu onongo Daudi tye i kakanene, dok cel gogo pa lumony pa jo Piliciti onongo tye i Beterekem. 15Daudi dok oloko ki miti madwong ni, “Kono ngat mo ocito ka twomo pii amata ki iwang it me Beterekem matye cok ki dog gang ca, wek omiya amati, kono ber mada!” 16Ci twoni oteka lweny adeku gucito gubaro dye gony pa jo Piliciti, ci gutwomo pii ki iwang it me Beterekem matye cok ki dog gang ci gukelo bot Daudi.

Ento Daudi pe omedo ki mato; ento otingo ci oliyo inyim Rwot pi gityer amata, 17kun waco ni, “Pe kumeno, ai Rwot. An pe myero atim kit man. An dok amat remo pa dano ma gudyero komgini?” En aye lok ma omiyo pe omato piinu. Twoni oteka lweny adeku yam gutimo kitmeno.

18Abicai omin Joab, wod pa Jeruya, onongo en ladit ikin jo pyere adeki. Ci en otingo tonge olwenyo ikom jo miya adek ci onekogi woko ducu, ma omiyo nyinge oywek ma mito romo ki pa jo adek ca. 19Pieno en olimo yweka madit makato ki ikom jo pyere adeki, ci odoko ladit me wi monygi; ento pe en olimo rwom pa jo adek ca.

20Benaya wod pa Yekoyada obedo twon oteka ma i Kabjeel, latim tim madito. En oneko awobe aryo ma gin twoni labwor me Moab. En bene olor odonyo i bur ci oneko iye labwor ikare ma pee ocwer mapek. 21Ka dok oneko Laejipt mo, ma dano mamwonya. Laejipt meno onongo tye ki tonge i cinge, ento en Benaya ocito bote ki odoone, ci oyutu tong woko ki i cing Laejipt, ka oneke kwede woko ki tongenu. 22Benaya wod pa Yekoyada otiyo gin madito kitmeno, omiyo nyinge olimo yweka madit ma mito rom ki twoni oteka lweny adeki. 23Ci nyinge oywek ikin jo pyere adeki, ento pe olimo rwom pa jo adek ca, ci Daudi oketo obedo ladit pa jo ma gwoko rwot.

24Acael ma omin Joab bene yam tye ikin jo pyere adeki; ki Elkanan wod pa Dodo me Beterekem, 25Cama me Karod, Elika me Karod, 26Kelej ma jo Palti, Ira wod pa Ikec me Tekoa, 27Abiejer me Anatot, Mebunai ma Lakucat, 28Jalmon ma jo Akoki, Makarai me Netopa, 29Keleb wod pa Baana me Netopa, Itayi wod pa Ribai me Gibea pa jo Benjamin, 30Benaya me Piraton, Kidai ma bedo i nota ora me Gaac, 31Abialbon me Arba, Ajimavet me Bakurim, 32Eliaba me Caalbon ma wod pa Jacen, Yonacan, 33Cama ma jo Karar, Akiam wod pa Carar ma jo Karar, 34Elipelet wod pa Akacbai me Maaka, Eliam wod pa Akitopel me Gilo, 35Kejero me Karmel, Parai ma jo Arbi, 36Igal wod pa Natan me Joba, Bani ma jo Gad, 37Jelek ma jo Ammon, Nakarai me Beerot, ma lating jami lweny pa Joab wod pa Jeruya, 38Ira ma jo Itri, Gareb ma jo Itri ki Uria ma jo Kit.

39Gin ducu twoni oteka lweny pyere adek wiye abiro.