2 Camuel 22

Wer me wayu pa Daudi

(Jab 18)

1Daudi owero wer man bot Rwot Lubanga ikare ma Rwot olare iye ki i cing lumeroke ducu, wa ki i cing Caulo bene. 2Ci en owero kit man ni,

“Rwot aye gota, en cel gogona matek, en lalara.

3En Lubangana, ki gota, aringo alaro bote;

en gwoka macalo kwot, en kalarena matek;

en gang gogona kama aringo alaro iye,

en lalara;

in aye ilara ki i lweny magwa.

4Akok bot Rwot, ci en olara ki i cing lukwora.

Pimeno myero kipak Rwot.

5Biamwonyi me to otwage oruma woko dyere,

kulu ma piine ger ma neko dano ocore woko iwiya limuk.

6Tol lyel odwala woko,

ki owic me to bene orine woko inyima.

7Ikare ma atye ki can akok bot Rwot;

akok gira bot Lubangana.

Ci Rwot owinyo dwona ki i Ot mere maleng, kokona pi kony odonyo i ite.

8Cutcut lobo oyenge ma more pe twere,

te godi ducu bene guyenge ma kun giyenge matek,

pien kiniga onongo omako Lubanga.

9Yito oduny okati ki i ume,

ki mac ma wang malyet okati ki idoge ma lodine bene olyel,

dok olyel matek mada.

10Rwot oyaro polo ka obaro iye, ci olor obino piny,

kun bene piny macol mapek orume ma ocido olyane oryene ite tyene.

11Oito iwi lakerubi ci otuk kwede,

kome onen i dye yamo,

12ci oketo piny macol orume woko dyere,

kemane obedo pol mapek mupong ki pii.

13Lodi mac ma lyel okati,

onen i piny maryeny maleng ki inyime.

14Rwot omiyo polo omor,

ci dwon Ngat Mamalo Twal owinye.

15Ci Rwot obayo aterone, okeyo lumerok woko;

omiyo obayo aterone owil calo lutkot, ci owek wigi onywene guket atata.

16Dye nam opoke, pete tere onen,

guti me te lobo bene odong twolo,

ikare ma Rwot ojukugi,

ki ikare ma okutugi ki yamo me yweyone ma okati ki i ume me gero.

17Rwot ocwalo cinge piny ki i polo, ci omaka,

oywaya okela woko ki i pii matut.

18En olara ki i cing lukwora matek,

olara ki i cing jo ma gidaga,

pien onongo gitek mada giloya woko.

19Gupoto ikoma ikare ma can dong obwoya matek,

ento Rwot aye obedo ka konya.

20En olara woko ki ican ma atye iye ci okela ikabedo malac;

olara pien onongo ni ayomo cwinye.

21Rwot omiya pwoc pien oneno ni kita atir,

ocula ma oporo lengcwinya;

22pien abedo kalubu cik pa Rwot,

pe apoke woko ki bot Lubanga pi bal mo.

23Alubu cike ducu,

pe angak aweko gin ma en ociko.

24Pe atimo bal mo inyime,

dok agwoke mada pe me timo bal alii mo.

25Ma omiyo Rwot omiya mot pien oneno ni kita atir.

En ocula ma oporo lengcwinya ma abedo kwede inyime.

26Rwot, in lagen bot jo ma lugen;

ki bot ngat maber ma pe ki bal, in inyute bote bene calo ngat maber ma pe ki bal.

27Cwinyi leng ikom jo ma cwinygi leng,

ento iger ikom dano ma tame ogom.

28Ilaro jo mamwol,

ento jo ma luwake idwokogi woko piny.

29Eyo, in aye ibedo mac tarana, ai Rwot;

Lubangana aye menyo an i colpiny.

30Eyo, atwero tyeko buca mony kulu ka in ikonya;

pi teko pa Lubangana miyo apye akalo wi cel.

31Lubanga man, gin ducu ma en tiyo tye atir gire,

dok lok pa Rwot ma en cike me tiyo bedo ada;

en tye macalo kwot pi jo ducu ma giringo gilaro bote.

32Anga ma Lubanga, kono Rwot kene?

Anga ma gota, pe Lubangawa aye keken gire?

33Lubanga man aye kalarena matek,

en aye ma omiyo awoto ki kuc. 341

Oketo tyena obedo macalo tyen til,

ociba malo kama acung iye matek.

35En pwonyo cinga pi lweny,

ma omiyo atwero gomo wa atum mola.

36Dong ityeko miya kwot me lari,

kony ma in imiya en aye omiyo adoko dit.

37Imiya yoo malac kama awoto iye ducu kadi lukwora pe gutwero maka,

omiyo tyena pe ocer ikare ma alwenyo.

38Aryemo kor lukwora ci anekogi woko;

pe aloke adok cen nio ka atyekogi ducu.

39Atyekogi woko, acubugi woko pil,

ci gupoto piny ka tyena; pe dong gutwero a malo.

40In aye iruka ki tek pi lweny;

imiyo lulweny ikoma guto gutum woko ka tyena.

41Imiyo lumeroka guringo woko ki inyima,

imiyo atyeko jo ma gidaga woko.

42Guciko wangi, ento ngat mo pe ma olarogi,

gukok bot Rwot, ento en pe ogamo doggi.

43Adinogi woko gudoko macalo apwa me ngom;

abologi woko macalo coto matye i yoo gudugu.

44Yam ilara ki ikom rok mapol ma gilwenyo kweda;

iketa abedo ladit maloyo rok ducu;

jo mayam pe angeyogi gudoko jona ma an aye aloyogi.

45Lurok gubino bota ma gimwole amwola;

cutcut ka giwinyo pira ci gilubu cika.

46Ci tek cwiny orwenyo woko ki botgi,

gua ki kama gukane iye gubino ma komgi myel amyela.

47Rwot tye kwo; kipak gota,

kipil wi Lubanga ma en lalara.

48En Lubanga ma omiya aculu kwor ikom lukwora,

dok ma obwoyo rok mapol,

omiyo gubedo ite loca;

49ci olara ki i cing lumeroka.

In ipilo wiya makato lukwora,

ilara ki i cing lulweny ma lubwami. 502

Pimeno abikori ikin lurok, ai Rwot,

dok abiwero wer me pako nyingi.

51Lubanga miyo deyo me loc bot rwot mere,

dok nyutu mar mere ma pe loke ikom danone ma en oyero ka kiwiro,

bot Daudi ki likwaye ducu matwal.”