2 Camuel 21

Culu kwor pa jo Gibeon

1Kec opoto ikare me loc pa Daudi ma kun obedo katime mwaka ki mwaka pi mwaka adek kulu. Man omiyo Daudi openyo dog Rwot iye, ci Rwot owace ni, “Tye pi alii me remo ikom lok ma Caulo ki jo me i ode gutimo, pien en oweko kineko jo Gibeon.” 21 Ci rwot olwongo jo Gibeon ni kong gubin bote. (Jo Gibeon pe gin jo Icrael kikome, ento gin gubedo jo Amor mayam odong. Onongo yam jo Icrael gukwongo kwong bot Rwot ni pe kibinekogi, ento kadi bed kumeno, Caulo otemo nekogi wek etyekgi woko, pien nyeko omake pi jo Icrael ki jo Juda.) 3Daudi openyo jo Gibeon ni, “Gin ango ma myero atim pirwu? Dok abiculu kwor meno ikit yo ango, ka wek dong wulam gum ikom lwak pa Rwot?” 4Jo Gibeon gugamo dog rwot ni, “Lok ma ikinwa ki Caulo ki jo me ode pe lok ma gitwero tyekone ki culu lim, kadi wa wan bene pe myero wanek iye dano mo acel ma i Icrael.” Ci Daudi ogamo ni,

“Wun dong wuwaco ni atimo ki wun kit gin ango?” 5Guwaco bot rwot ni, “Dano ma obedo ka nekowa, ma en aye oyubu pi tyekowa woko wek pe wabed ki kabedo mo i lobo ma Icrael loyoni, 6wek kimii botwa awobene abiro, wek wagurgi woko gungabe malo inyim Rwot ki i Gibeon ikom got pa Rwot.” Ci rwot ogamo ni, “Abimiyogi.” 72

Ento rwot ongoyo Mepibocet wod pa Yonacan wod pa Caulo oweko en odong, pien yam gukwongo kwong inyim Rwot matye ikin gi, en Daudi ki Yonacan wod pa Caulo. 83Rwot okwanyo awobe aryo ma min gi nyinge Rijpa nya pa Aiya, ma en onywalogi ki Caulo, nyinggi Armoni ki Mepibocet; ki awobe abic pa Merab ma nya pa Caulo, ma en onywalo ki Adriel wod pa Barjilai ma jo Mekola. 9Ci en omiyogi ducu i cing jo Gibeon, ci gugurugi gungabogi malo iwi got inyim Rwot. Gin abiro ducu guto woko lawangacel. Kinekogi inino ma kicako kayo iye kac, inino ma kicako kayo iye bel cayiri.

10Ka Rijpa nya pa Aiya okwanyo bongo cola, oyaro iwi got me butune, ci orii kunu cake i acaki kayo kac nio ka kot ocako cwer ikomgi ki i polo. En pe oweko winyo mo opye ikomgi i dyeceng, kadi wa nguu mo pe oo ikomgi i dyewor. 11Ka kitito bot Daudi kit gin ma dako angeca pa Caulo, Rijpa nya pa Aiya, obedo katimone, 124 ci Daudi ocito okwanyo cogo pa Caulo ki pa Yonacan ki bot jo Jabec-gilead, mayam onongo gukwalo komgi ki i dye gang me Bet-can kama yam Lupiliciti gungabogi malo ikare ma Lupiliciti guneko iye Caulo iwi got Gilboa. 13Daudi okwanyo cogo pa Caulo ki pa wode Yonacan otero, ka gucoko cogo pa jo abiro ma kigurogi ni bene. 14Ci guyiko cogo pa Caulo ki pa wode Yonacan i lobo Benjamin i Jela, i lyel pa wone Kic; ci gutiyo gucobo kit ma rwot ociko ducu. Ka lacen Lubanga dong ocako winyo lega pa Luicrael ma gilego pi lobogi.

Abicai olaro Daudi ki i cing twon oyita lweny

(1 Tek 20:4-8)

15“Jo Piliciti dok gubedo kalweny ki jo Icrael, ci Daudi ocito kunu kacel ki jone, gucako lweny ki jo Piliciti. Ikare ma Daudi ocako ol woko, 16ka Icbibenob ma ngat acel ikin likwayo pa twoni olumani pa lupiliciti obino ikom Daudi kun otamo ni etwero neke woko kun tye ki tonge ma peke romo cokcok kilo adek kulu, dok otweyo del pyere matye iye pala lucwan manyen. Ci en oa otire, ikom Daudi wek dong eneke woko.” 175Ento Abicai wod pa Jeruya omwome oringo kalare ci ocubu lapiliciti ni oneko woko. I nge meno jo pa Daudi gucike i nying Rwot ni, “In pe dok ibibino kacel kwedwa imony mo, miyo ibineko mac tara pa jo Icrael woko.”

Jo pa Daudi guneko oteka lweny

(1 Tek 20:4-8)

18Ka lacen, lweny dok ocake ikom jo Piliciti ma i Gob; ci Cibekai ma Lakucat oneko Cap woko ma ngat acel ikin likwayo pa twoni olumani. 19Kalweny dok ocake ikom Lupiliciti ma i Gob, ci Elkanan wod pa Jair, ma jo Beterekem, oneko omin Goliac ma jo Gat, ma bol tonge rom ki rii yat me cweyo bongo. 20Lweny dok obedo i Gat kama tye iye dano mo ma odongo mabor liwau, matye ki nyig cinge abicel, ki nyig tyene bene abicel, tung ryoryo ducu, omiyo nyig lwete ducu romo pyere aryo wiye angwen. En bene obedo lakwar twoni olumanu. 21Ka en okati kanywaro jo Icrael ki ngalane, ci Yonacan wod pa Cimei ma omin Daudi oneke woko. 22Gin jo angwen meno ducu gubedo likwayo pa twoni oluma mayam bedo i Gat. Gin ducu Daudi ki jone gutyekogi woko.