2 Camuel 20

Ceba ojemo ikom Daudi

11

Ikare meno onongo tye dano mo marac mada ma nyinge Ceba wod pa Bikri ma Labenjamin. En ocako kutu tum kun waco ni,

“Wan pe watye ki wang pokwa mo ikom Daudi,

pe watye ki dul mo ikom latin pa Yece;

wun jo Icrael, dano acel acel odok i kemane!”

2Kitmeno jo Icrael gutware gua woko guweko Daudi, ci gucako lubu kor Ceba wod pa Bikri. Ento jo Juda gire gubedo kalubu kor rwotgi ma cwinygi omoko ikome likang, cake ki i Jordan o kwede i Jerucalem. 32

Ka Daudi oo i ode ma i Jerucalem, en okwanyo mon angecane ca apar ma onongo owekogi ka gwoko odeni, ci oketogi i ot ma kigwokogi iye kun en miyo botgi cam, ento pe omedo ki butu kwedgi macalo mone. Kitmeno kiloro wigi woko i ot nio wa ikare me togi, kun gibedo macalo mon to.

4Ci rwot dok owaco bot Amaca ni, “A icit ilwong jo ma i Juda ducu gubin bota ikine ka nino maromo adeki, ci in kikomi bene ber ibed tye kany.” 5Amaca ocito kalwongo jo ma i Juda, ento en odike okato nino ma kicikoni woko. 6Ci Daudi owaco bot Abicai ni, “Ceba wod pa Bikri bitimowa marac tutwal ma bikato Abcalom. Cit ki danona enu wutugi ryemo kore, wek pe omaa taun mogo ma gicelo ki gogo, miyo en bikelo ki wan ayela madwong.” 7Jo ma gulubu kor Abicai obedo Joab ki jo Keret ki jo Pelet, ki twoni oteka lweny ducu. Ci gin gucito kun gua ki i Jerucalem pi ryemo kor Ceba wod pa Bikri. 8Ka dong guo i got mo madit ma i Gibeon, ci Amaca otuc ikomgi. Onongo Joab oruke ki bongo me acikari, kun otweyo del pala lucwan ipyere, ma orwako pala lucwan i akurane. Ka Joab woto bino anyim tung bot Amaca, ci palane opoto piny. 9Joab openyo Amaca ni, “Itye maber bo, omera?” Ka Joab omako yer tik Amaca ki cinge ma lacuc ka mote kun noto leme. 10Ento Amaca pe oneno ni pala mo onongo tye i cing Joab. Joab ocobo i Amaca, ci cin iye owuke piny; ci Joab pe dok onwoyo cobone tyen me aryo, ci Amaca oto woko cut.

Ci Joab ki omine Abicai guryemo kor Ceba wod pa Bikri. 11Dano pa Joab mo ocung kanget Amaca ci owaco ni, “Ngat ma cwinye omaro Joab, ki ma cwinye tye ikom Daudi, olub kor Joab.” 12Amaca obutu kun pwode ngene kwede piny i remone inget gudu. Tek dano mo oo kenyo, ka oneno Amaca, ci kong cung. Ka dano pa Joab oneno ni lwak ducu kong gicung, ci en obino otingo kom Amaca woko ki i gudu otero i lum, ci obolo bongo mo oumu ikome. 13Ka dong kikwanyo kome woko ki i gudu ci lwak gucako mol kun gilubu kor Joab pi ryemo kor Ceba wod pa Bikri.

14Ceba ocito kun obaro kin kaka ducu ma i Icrael ma kumalo nio wa i Abel ma inget Bet-maaka; ci jo ma i ot pa Bikri ducu gucoke bote, kun gin gilubu tame. 15Ci jo ducu ma gulubu kor Joab gucito gurumu taun madit ma Ceba tye iye, en Abel ma inget Bet-maaka. Gucako toro cel lobo orumu taun madit meno woko, cel meno kitoro otene wa ikom cel gogo me taun madit. Dok gubedo katwomo cel me taun madit meno me amuka woko. 16Dako mo ma laryeko odange ki i taun maditi ni “Wuwiny ya! Wuwiny ya! Wuwac bot Joab kong obin kany, wek kong alok kwede mono.” 17Joab ocito cok bote ci dakonu openyo ni, “In aye Joab bo?” Ci en ogamo ni, “An do.” Dakonu owace ni, “Kong iwiny loka, ladit.” Ci Joab ogamo doge ni, “Atye ka winyone.” 18Dakonu dok owaco ni, “Carolok macon waco ni, ‘Wek gupeny dog jo Abel;’ miyo giyubu lok tum mupye. 19An angat acel ikom jo ma gimito kuc, ki jo ma lugen i Icrael. Ci in imito balo taun madit man woko ma en aye mego i Icrael kulu; pingo ityeko lwak pa Rwot woko?” 20Ci Joab ogamo ni, “Pe kumeno gire, pe kumeno; pe abino ka tyeko taun madit nyo ka balone woko. 21Lok meno pe ada. Ento dano mo ma i lobo godi me Epraim ma kilwongo Ceba wod pa Bikri aye otingo cinge ikom rwot Daudi. Wumii ki wan en keken, ci abia aweko taunwu maditi woko.” Dakonu odok iye bot Joab ni, “Nen ba, kibiboli wiye wok ki iwi cel botwu.” 22Ka dakonu ocito bot jonu ducu ki ryekone. Ci gungolo wi Ceba wod pa Bikri woko, ci gubolo woko bot Joab. Cut Joab okutu tum, ci mony ocako ket woko me weko taun madit meno, kun dano acel acel dok i pacone kikome. Ki Joab bene odok i Jerucalem bot rwot.

Ludito pa Daudi

23I karenu onongo Joab aye ladit maloyo mony pa jo Icrael ducu; ki Benaya wod pa Yekoyada aye loyo jo Keret ki jo Pelet. 24Adoram aye onongo ladit maloyo tic muroni; ki Yekocapat wod pa Akilud onongo en obedo laco lok ma time. 25Ceva obedo karan me otkot, ki Jadok ki Abiatar gubedo ajwaki pa Lubanga; 26ki Ira ma jo Jair obedo ajwaka pa Daudi.