2 Camuel 19

Joab ojuku Daudi

1Kitito bot Joab ni rwot tye kakumu ki koko malit pi to pa Abcalom. 2Kitmeno loyo lweny me ninonu otugi loke odoko me kumu pa lwak monye ducu, pien guwinyo inino meno ni, “Cwiny rwot tye ka cwer kun ton pi wode ma oto i dog lwenyi.” 3Ci dano ducu gubedo macalo jo ma mony aye oryemogi, pien dong gikwale akwala ka gidonyo kwede i taun madit ki lewic madit inino meno. 4Rwot Daudi oumu wange woko ki cinge lirit, ma obedo piny kakoko ki dwon malongo ni, “Ai woda Abcalom, ai Abcalom, woda, woda do!” 5Ka Joab obino ci odonyo i ot bot rwot Daudi, ci owaco bote ni, “In tin iweko lewic omako lutici ducu, ma gin aye jo ma tin gularo kwoni, ki kwo pa awobeni ki anyirani, ki kwo pa moni ki mon angecani ducu. 6In kara imaro jo ma dag wangi do, dok idag jo ma gimari. Tin dong inyutu woko kamaleng ni, ludito wi monyi ki lutici ducu pe gitye ki kony mo boti. Tin dong aniang atir ni, kono nene Abcalom aye obwot makwo, kun wan ducu wato woko, kono gire tin cwinyi obedo yom makato. 7Ber ia malo kombedi, ikat woko wek icit ilok ki lutici lok ducu mabeco, pien akwonge boti ki nying Rwot ni, ka pe in iye kato woko, ci pe dok dano mo bidong boti tin i dyewor man me o i rupiny; dok man aye gin ma bibedo rac boti makato can madongo ma ilimo ducu cake ki i ka tinoni nio kwede wa onyo.” 8Rwot otugi a malo cut, ocito obedo i kabedone ma i dog taun madit. Ci kitito bot lwak ducu ni, “Nen, rwot tye obedo dong i dog taun madit.” Ci dano ducu gubino inyim rwot.

Daudi odwogo cen i Jerucalem

Inino meno onongo jo Icrael guringo woko ducu, kun dano acel acel odok gire i gangigi. 9Dano ducu gubedo kaleyo tam ki ikin kaka ma i Icrael ducu, kun gilokoni, “Rwot Daudi aye yam pe olarowa ki i cing lumerokwa, dok en aye bene olarowa ki i cing jo Piliciti. I kareni en dong oringo oweko lobowa pi lworo Abcalom. 10Ento Abcalom mayam wawiro ki moo wek olowa ni bene dong kineko woko ki i mony. Ci pingo pe dong kong kiloko iye lok mo kombedi pi dwoko rwot Daudi paco?”

11Ka lok ma jo Icrael ducu gubedo kawacone oo bot rwot Daudi, ci en ocwalo kwena bot Jadok ki ajwaka Abiatar kun waco ni, “Wuwac bot ludongo pa jo Juda ni, ‘Pingo wun aye wudong cen ka kidwoko rwot paco i ode? 12Nen, wun aye utmega kikome, wun aye wucogo na ki ringo koma; ci pingo wun aye dok wudong cen ka kidwoko rwot paco?’ 13Dok wuwac bot Amaca ni, ‘In giri ibedo wata. Lubanga myero oket can ikoma kumeno ki makato, ka pe aketo in aye idoko ladit maloyo monya maka Joab, cake tin cito kwede anyim.’” 14Kumeno omiyo dano ducu ma i Juda gumoko ikom Daudi ki cwiny acel, ci gucwalo lok bote ni, “Dong idwog cen, in kacel ki lutici ducu.” 15Ma omiyo rwot ocako dwogo cen oo i kulu Jordan. Ci jo Juda gubino i Gilgal ka jolo wiye ki ka dwoko rwotgi cen loka kulu Jordan. 161

Cimei wod pa Gera, ma jo Benjamin, dano me Bakurim, en bene orune obino kacel ki jo Juda kajolo rwot Daudi, 17kun bino ki jo Benjamin maromo alip acel. Ki Jiba, ma latic maloyo ot pa Caulo, ki awobene bene apar wiye abic, ki lutice pyere aryo, gin bene gucore i kulu Jordan ci gutuc inyim rwot. 18Gukato ki iwang wat pi kelo dano pa rwot loka kulu, ki pi tiyo gin ducu ma rwot mito.

Daudi otimo kica bot Cimei

Ka Cimei wod pa Gera obino, ci en opoto piny inyim rwot ikare ma rwot dong mito ngolo loka Jordan. 19Ci en owaco bot rwot ni, “Rwot, pe imak bala i cwinyi, pe dok ibed ka po ikom gin mayam atimo ikomi marac, ladita rwot, ikare ma ia kwede ki i Jerucalem. Dong pe iket loke kulu i cwinyi. 20An latici angeyo maber ni atimo bal. Pieno, nen an dong tin abino, dok an aye akwongo bino ki ikin dano me ot pa Yucepu kajoli.”

21Abicai wod pa Jeruya ogamo doge ni, “Pe omyero kinek Cimei woko pi lok magi, pien yam en obedo kaceno dano ma Rwot aye owiro?” 22Ento Daudi ogame ni, “Gin ango ma alaro kwedwu, wun awobe pa Jeruya, ma wun bene tin wuloke wudoko lumeroka bo? Tin dok kibineko dano ikin jo Icrael? Tin aye dong aniang atir ni, an a rwot maloyo jo Icrael.” 23Ci rwot dok owaco ni, “In Cimei pe ibito.” Ci okwonge kwong ma moko loke. 242

Mepibocet wod pa Caulo bene obino kajolo rwot. Ci obino ma pe ongolo lwet tyenegu, dok pe okido yer tike, pe bene ojwero wek obed maleng, pe olwoko wa bongine cake ki ikare ma rwot oringo kwede nio ikare me dwogone ki kuc. 25Ka en oa ki i Jerucalem obino kajolo rwot, ci rwot openye ni, “Mepibocet, pingo yam pe icito kweda?” 26Mepibocet ogamo ni, “Ladita, latica aye obwola. Onongo awaco bote ni, ‘Twena kom bedo iwi kanana, wek abed iye, acit kacel ki rwot.’ Pien tyena ongol woko. 27En ocoko lok me goba ikoma owaco boti, ladita rwot. Ento in icalo lamalaika pa Lubanga, ma omiyo in i tim gin ma ineno ni ber. 28Onongo yam jo ma i ot pa wora ducu kwogi okemo to keken ki inyimi, ento in iketa ikin dano ma gicamo iwi mejani. Dong kit gin ango ma myero dok akok iye boti?” 29Rwot ogamo doge ni, “Pingo ibedo ka tita lok ikomi tutwal? An dong atyeko ngolo atir ni, wun ki Jiba wubipoko lobo pa Caulo.” 30Ci Mepibocet owaco ni, “Rwot, ka kumeno keken, ci wek en oter ducu, macalo in ladita rwot dong idwogo paco ki kuc.”

Daudi onyutu cwiny maber ikom Barjilai

313

I karenu Barjilai ma Lagilead bene obino ma oa ki i Rogelim; ci olwoko rwot oo kwede i dog kulu Jordan, wek engol kwede loka tungcel. 32Barjilai onongo dong otii woko, mwaka me dite dong romo pyere aboro. En aye yam obedo kamiyo cam bot rwot ikare ma rwot tye i Makanaim, pien onongo en lalonyo mada. 33Ci rwot owaco bot Barjilai, “Bin wakat kwedi loka ca, abigwoki i Jerucalem.” 34Ci Barjilai owaco bot rwot ni, “An pud adong ki mwaka adi me bedo na wi lobo, mamiyo dok acito wa i Jerucalem? 35Ikare man an dita dong romo mwaka pyere aboro. An pud dok atwero poko kin gin ma yomo cwinya nyo ma pe yomo cwinya? Pud dok abilo mit pa cam ma acamo, nyo gin ma amato? An pud dok atwero winyo wer ma co nyo mon giwero? Ci lok ango mamiyo amedo peko ikomi, ladita rwot? 36Abinywako yoo kwedi manok me lwoki nio ka ingolo loka kulu Jordan. Dok pingo icula ki mot macalo meno? 37Dong alego ni, wek adok cen i ganga, acit ato ki kunu, inget lyel pa wora ki pa maa. Ento atye kany ki latici Kimkam; wek en aye ocit ongol kwedi kulu, ci icitim en kit ma ineno ni ber.” 38Rwot ogamo doge ni, “Kimkam biwot kweda loka ca, ci abitimo ki en kit ma ineno ni ber tung boti; ki gin ducu ma imito ki tung bota abitiyone piri.” 39Ka lwak ducu gungolo Jordan, ci rwot bene ongolo. Lacen rwot ociko Barjilai ki mot me mar, ka dong olame gum; ci Barjilai odok i pacone.

Jo Juda ki jo Icrael gupyem pi rwot

40Rwot ocito i Gilgal, ki Kimkam bene onywako wot kwede. Ki lwak ma i Juda ducu ki nucu jo Icrael bene gunywako wot kacel ki rwot. 41Jo Icrael ducu gubino bot rwot, ci guwaco bote ni, “Pingo utmegiwa ma i Juda gukwalo in rwot woko akwala, kacel ki jo ma i odi ducu, ci gukelowu loka kulu Jordan in Daudi ki lwaki ducu?” 42Lwak ma i Juda gugamo dog jo Icrael ni, “Pien rwot aye watwa macok, ci pingo kiniga makowu ikom lok macalo man. Onongo dong wacamo cing rwot bo? Nyo en dong otyeko miyowa mot mo bo?” 43Jo Icrael dok gudok iye bot jo Juda ni, “Wan watye ki dul apar ite ker man, ki ite loc pa Daudi wan wadwong wakatowu. Ci pingo wun aye dok wucayowa? Pe myero nene wan aye wakwong waco pi dwoko rwot paco?” Ento jo pa Juda lokgi obedo gwa makato lok pa jo Icrael.