2 Camuel 18

To pa Abcalom

1Daudi ongiyo lwak monye matye bote, ka ocako keto ludito ma giloyo wi mony pi dano alip ki pi dano miya. 2Ci dong ocwalo monye okato woko, dul acel me adek obedo ite twero pa Joab, dul acel me adek ite twero pa Abicai wod pa Jeruya ma omin Joab, ki dul acel me adek ite twero pa Itayi dano me Gat. Ci rwot owaco bot jone ni, “An kikoma bene abicito kacel kwedwu.” 3Ento dano ducu gugamo ni, “Pe ibikato icito kwedwa. Pien ka waringo woko, ci gin pe gibiparo pirwa; kadi bed nucu dano oto, pe giparo pirwa. Ento in kikomi aye piri tek marom ki pi jo alip apar; pieno myero ibed ka cwalowa kony ma a ki i taun madit man botwa.” 4Rwot Daudi owaco botgi ni, “Gin ducu ma wuneno ni ber en aye abitiyo.” Kitmeno rwot ocung inget dog gang kun lumonye ducu gimol gikato ki i dulgi, jo me miya ki miya ki jo me alip ki alip. 5Ka rwot dok ociko Joab ki Abicai ki Itayi ni, “Macalo an a wone, awaco ni, wutim ber ki latin awobinu, en Abcalom.” Ci lwak ducu guwinyo ka rwot ociko ludito wi mony pi Abcalom.

6Kitmeno mony okato woko me cito i tim kalweny ki jo Icrael; ci gucako lweny ki i bunga me Epraim. 7Lumony pa Daudi guloyo jo Icrael, ci neko dano obedo madit inino meno; guneko dano maromo alip pyere aryo kulu. 8Lweny oromo i lobo ducu, ci wel dano ma oto pi jami matye i bunga kato ma kineko ki pala lucwan.

9Ka lweny odoko lyet Abcalom ocako ringo woko ci otugi rwate ki lumony pa Daudi, kun en tye kangwec ki kanane, ci kana oringo ocore kwede wa ite kworo madit ma jange oluk ocule woko liking. Wi Abcalom orwake omoko woko ikin jang kworo, ci kana oweke kun lyere ikin polo ki ngom, kana ma en oito i wiye ni obedo ka mede ki ngwec. 10Ka dano mo acel ikin orobo pa Daudi onene ci otito pire bot Joab ni, “Nen, aneno Abcalom tye ka lyere malo iwi yat kworo.” 11Ci Joab owaco bot dano ma otite loki ni, “Iwaco ni ngo? Ineno kome? Ci pingo pe icobo ireto woko piny i ngom? Kono itimo kumeno, kono cwinya obedo yom ikomi, onongo abimiyo mot boti maromo dul ryal apar, ki del pyer bene.” 12Ento laconu odok iye bot Joab ni, “Kadi iting dul ryal ma peke alip acel kulu wek imii i cinga, pe abitwero tingo cinga aketo ikom wod pa rwot. Wan bene wawinyo ka rwot ciko in ki Abicai ki Itayi ni, ‘Macalo an a wone, awaco ni wugwok latin awobinu en Abcalom.’ 13Dok bene ka nene atimo tim bwami mo ce aneke woko, (kun kono pe tye gin mo ma rwot pe ngeyo), kadi in kikomi bene nongo ibiwene woko ki iye.” 14Ci Joab ogamo doge ni, “Pe abibalo kare marom man kalok kwedi.” Ci okwanyo tong adek i cinge, ocito ocobo ki kor Abcalom i adunune ki tonge adek ducu, ma onongo en tye kalyere iwi kworo makwo. 15Lacen awobe apar ma gin luting jami lweny pa Joab gubino gurumu Abcalom ci gucube guneke woko.

16Ka Joab okutu tum, ci mony ducu gudwogo woko cen ki ka ryemo kor jo Icrael; pien Joab dong ojukugi woko. 17Gutingo kom Abcalom gubolo ite bur mo matut ma i bunga, ka guyweko lwak godi madwong gutoro i wiye. Ci jo Icrael guket woko ata, kun dano acel acel dok i gangigi.

18Onongo Abcalom yam ocibo wir got ocung i Nota pa rwot, pien obedo kawaco ni, “An pe atye ki woda mo me po pi nyinga.” Ci en ocako nying wir meno ki nyinge kene, ci pud kilwongo ni got me ni po pa Abcalom nio wa onyo.

Daudi okumu pi to pa Abcalom

19Akimaj wod pa Jadok owaco ni, “Wek aring ater lok bot rwot, acit awace ni, ‘Rwot dong otyeko lari ki i cing lumeroki.’” 20Joab ogamo ni, “Pe ibitero lok tin. Ibitero inino mukene, ento tin pe ibitero lok mo, pien wod pa rwot aye dong oto woko.” 21Ci Joab owaco bot dano mo me lobo Kuc ni, “Ring icit itit bot rwot gin madong ineno.” Lakuc okulu wiye inyim Joab, ka lacen ocako ngwec. 22Akimaj wod pa Jadok dok olego Joab ni, “Gin ma mito time myero otime ikoma, ento wek an bene aring i kor Lakuc.” Joab ogamo doge ni, “Imito ringo kunu pingo ce, latina? Nen, pe ibinongo iye mot mo pi tero lok man.” 23Akimaj dok owaco ni, “Gin ma mito time myero otime ikoma, ento an bene abiringo.” Ci Joab owace ni, “Ring do.” Ci Akimaj ocako ringo i kora yoo ma i yoo bar, ci okato Lakuc woko ki ngwec.

24Ikare meno onongo Daudi obedo piny ikin dog gang me iye ki ma wokoni, kun lakur piny onongo oito malo iwi ot ma iwi dog gang, macok ki cel ma orumu gangi. Ka lakur piny otingo wange cen kaneno piny, ci oneno dano mo ka ringo bino en kene. 25Lakur piny odange kun waco bot rwot. Ci rwot odoke iye ni, “Kace en tye kene, ci tye ki lok ma okelo.” Dano ca omede ki ngwec bino kwede cok. 26Lakur piny dok oneno dano mukene ka ringo bino. Ci odange bot dano ma i dog gang ni, “Dano mukene dok tye kabino ki ngwec, en kene!” Rwot owaco ni, “En bene obikelo lok mo.” 27Lakur piny dok owaco ni, “Atamo ni, langwec ma otelo yoni nen calo Akimaj wod pa Jadok.” Ci rwot owaco ni, “En dano maber, en obibino ki lok mabeco.”

28Akimaj odange matek ni, “Rwot, piny tye maber.” Ci okulu wiye piny inyim rwot ma en oryebe kwede piny i ngom kun waco ni, “Pwoc obed bot Rwot Lubangani, madong olari woko ki i cing dano ma gutingo cinggi kalweny ikomi, ladita rwot.” 29Rwot Daudi dok openye ni, “Lok mo marac pe ikom awobina Abcalom?” Ci Akimaj ogamo ni, “Ikare ma Joab cwala ki lok, awinyo woo madwong ki i yo ngeya, ento pe dong aniang i gin ma otimeni.” 30Ka rwot owaco bote ni, “Kong iloke icung ki kenyo.” Ci oloke ocung mot.

31Nen, Lakuc bene obino, ci otugi waco ni, “Akelo lok maber bot ladita rwot! Pien Rwot Lubanga otyeko lari ki i tek pa jo ducu ma onongo gutingo lweny ikomi.” 32Ci rwot dok openyo Lakuc ni, “Lok mo pe marac ikom latina Abcalom?” Lakuc ogamo ni, “Lumeroki ki jo ducu ma gutinge kalweny ikomi maraci myero gubed macalo latin awobi ni, ladita rwot.” 33Ci cut cwiny rwot opoto lirim, ci oa malo oito malo i kicika matye i ot ma iwi dog gang, ci ocako koko kun woto kwede, ma koko wode ni, “A woda Abcalom, woda Abcalom! Kono nene an aye ato ma kakari do! Oii Abcalom, woda, woda do!”