2 Camuel 17

Kucai obalo miyo tam me ryeko pa Akitopel woko

1Akitopel dok owaco bot Abcalom ni, “Wek ayer dano alip apar wiye aryo, wek an kikoma acak wot me lubu kor Daudi tin i dyewor. 2Abio bote manongo pud ool woko, ma tame bene goro; wek atugi bango kome woko, ci jo ma gitye bote ducu gibiringo woko. Ci abineko en rwot keken, 3ci abidwoko lwak ducu boti, macalo nyako ger ma bino paco bot cware. Mite ni kinek ngat acel keken, ci jo mukene ducu gibibedo labongo atwom mo.” 4Tam meno me ryeko oyomo cwiny Abcalom ki ludongo pa jo Icrael ma gitye ducu.

5Ci Abcalom dok owaco ni, “Wulwonga Kucai La-arki bene, wek wawinyu bene gin ma en biwacone.” 6Ka kilwongo Kucai, obino bot Abcalom, ci Abcalom owace ni, “Akitopel owaco kuman dok kuman, dong wabitic ki kit tameni? Kace pe, ci in iwaci.” 7Kucai owaco bot Abcalom ni, “Tam ma Akitopel okeloni pe ber.” 8Kucai dok omede ki loke ni, “In ingeyo maber ni, woru ki jone ducu gin oyita lulweny ma gitego, gin gitwoni ma lugero magwa, macalo nguu ma ger pi lutinone ka kimako i tim. Dok pud amedo ni, woru oyita lweny, en pe twero butu ki lwak kacel i dyewor. 9Nen ba, kadi wa kombedini en tye mukane woko i bur kakene, nyo ikabedo mo kunu. Ci kace owinye ni joni mogo kinekogi woko ki i lweny mukwongoni, ka dong dano mo owinyo biwaco ni, kibedo kaneko dano ma gubedo kalubu kor Abcalom. 10Ci kadi bed dano mo yam oteka lweny, ma cwinye nwang macalo cwiny labwor, cwiny me lworo bimiyo kome to woko lirut; pien jo Icrael ducu gingeyo ni woru tye oyita lweny, ki jone ma gitye bote ducu gin oteka lweny. 11Ento an amiyo tama kit man ni, wek jo Icrael ducu gucoke boti, cake ki i Dan nio wa i Beer-ceba, wek gubed mapol marom ki kweyo ma i dog nam, in kikomi bene icit kwedgi kalweny. 12Kitmeno miyo wabipoto ikome ki i kabedo mo ma kome binonge iye, ci wabicore ikome macalo toyo ma poto luk i ngom, ci en kikome ki jo ducu ma gitye kwede ngat mo acel i kin gi pe bibwot. 13Kidong kace oringo woko odonyo i taun mo, ci jo Icrael ducu kibikelo tol girumu ki taun meno, ka gicako ywayo gicoro woko piny wa i nota; kadi wa kidi lalinglinge mo pe kibinongo mudong kunu.” 14Ci Abcalom ki lwak ducu ma i Icrael gugamo ni, “Tam ma Kucai La-arki omiyoni aye ber makato pa Akitopel.” Pien onongo Rwot yam dong oketo ni, kibibalo te tam pa Akitopel woko ducu kadi bed ber tutwal, ka wek Rwot oket can mapek ikom Abcalom.

Kucai omiyo ngec bot Daudi ci en obwot woko

15Lacen Kucai dok otito lok bot ajwaka Jadok ki Abiatar ni, “Akitopel onongo omiyo tam me ryeko bot Abcalom ki ludongo pa jo Icrael kuman; ki an bene dok amiyo tama kuman. 16Kombedi dong wucwal kwena oyotoyot bot Daudi wucit otite ni, tin pe dok obut i wang wat ma i tim, ento oa woko oyoto okat wa loka ca, wek pe mony omak rwot ki jo ma en tye kwedgi onekgi woko ducu.” 17Ikare meno onongo Yonacan ki Akimaj gubedo ka kuru lok i En-rogel. Kunu angeca mo wire iye jwijwi katero lok botgi, ka kikwango loke kitero kitito bot Daudi; ento gigwoke matek wek komgi pe onen ka gidonyo i taun. 18Ento latin awobi mo wange ocob ikomgi ci onenogi, ocito otito pirgi bot Abcalom. Ci gin aryo ducu gurune gucito i paco pa dano mo ma i Bakurim ma onongo tye ki wang ite i dyekale, ci gudonyo gulute iye. 19Dako pa laconu otingo laum dog wang it opeto oumu ki wiye, ka okelo kal omoyo i wiye; kun pe tye dano mo ma ongeyo. 20Ka lutic pa Abcalom gubino ci gudonyo i gang meno bot dakonu, ci gupenye ni, “Akimaj ki Yonacan gitye kwene?” Dakonu owaco botgi ni, “Dong gutyeko kato nota ora ma pii tye iyeni woko.” Ka gubedo kayenyo korgi ci pe gumedo ki nongogi, lacen gudok woko cen i Jerucalem.

21Ka jonu dong gucito woko, ci Akimaj ki Yonacan gukato woko ki i wang it, gucito gutito lok ducu bot rwot Daudi. Guwaco bote ni, “A woko ki kany oyot wek ingol kulu ikat loka ca; pien Akitopel aye omiyo tame kit man kun miyo tame pi timo rac ikomi.” 22Daudi otugi a malo cut, kacel ki lwak ducu ma gitye kwede, ci gungolo loka kulu Jordan. Me o kwarpiny onongo pe tye dano acel mo ma odong ma pe ongolo loka kulu Jordan.

23Ka Akitopel oneno ni tame me ryekoni pe giye lubune, otweyo kom bedo iwi kanane, oito i wiye oringo kwede i gange. Ka oyubu ode ducu maber, ci ocito odene woko, ci oto woko cut, kiyiko i lyel pa wone.

Daudi obedo i Makanaim

24Daudi ocito i Makanaim, ci Abcalom ongolo loka kulu Jordan kacel ki jo Icrael ducu. 25Ikare meno onongo Abcalom oketo Amaca aye dok obedo ladit ma lawimony ma ka Joab. Amaca aye wod pa laco mo ma nyinge Itra ma La-icmael, ma onyomo Abigal nya pa Nakac, ma lamin Jeruya ma min Joab. 26Jo Icrael kacel ki Abcalom gugony i lobo Gilead.

27Ka Daudi obino i Makanaim, ci Cobi wod pa Nakac me taun madit Raba, gang pa jo Ammon, ki Makir wod pa Amiel ma ganggi Lo-debar, ki Bangilai ma jo Gilead ma ganggi Rogelim, 28gukelo kitanda butu mapol, ki becengu, agulugu, ngano bel cayiri, moko kwon, bel ma gicelo, muranga ki ngorgu, 29moo kic, cak lukulu, romi, cak mutwo ma kiyubu ki cak dyang, ci gumiyo bot Daudi ki lwake wek gucam, pien gutamo ni kec obedo kaneko lwak, omiyo komgi oloc woko, ki orwo pii bene onekogi i tim.