2 Camuel 16

Daudi gin ki Jiba

11

Ka Daudi okato cwiny wi got manok, ci nen Jiba latic pa Mepibocet orwate kwede kun tye ki kana aryo ma kitweyo kom me bedo i wigi, dok guyeyo mugati miya aryo, tuga olok mutwo miya acel, nyig yat ma ocek i oro miya acel ki opiru kongo bwino acel. 2Rwot openyo Jiba ni, “Ikelo jamini me ngo?” Jiba ogamo ni, “Akelo kana pi konyo jo ma i odi, rwot, wek gubed i wigi me wotgi, ki mugati me acama pa awobeni, ki kongo bwino me amata pa jo ma komgi oloc i tim.” 32Rwot dok openye ni, “Latin pa laditi Caulo tye kwene?” Jiba ogamo dog rwot ni, “‘Aweko en tye odong i Jerucalem; pien en tye ka tamo ni, tin dong jo me ot pa Icrael gibidwoko ker pa wone i cinge.’” 4Ci rwot owaco bot Jiba ni, “Nen ba, jami mayam pa Mepibocet ducu tin dong gudoko meri.” Jiba ogamo ni. “An dong apoto aryebe piny inyimi, wek amede ki nongo gum inyimi, ladita rwot.”

Daudi gin ki Cimei

5Ka rwot oo i Bakurim, ci laco mo obino bote, en obedo dano mo ma i ot pa Caulo. Nyinge Cimei wod pa Gera. En owoto obino karwate ki Daudi kun ceno Daudi mede kwede ameda, 6kun celo Daudi ki gotgu, wa lutic pa rwot ducu, ki lwak jo ducu, ma gin twoni oteka lweny ducu ma gitye inget Daudi tung lacuc ki tung lacam. 7Cimei obedo ka ceno dano kun waci, “Wot icit, wot icit, in lao remoni, in dano ma kite peke! 8Rwot dong oculu kwor ikomi pi oyo remo i ot pa Caulo ma koni itye kaloc makakare. Rwot dong otingo ker omiyo woko i cing wodi Abcalom. Nen ka topiny dong opoto ikomi, pien in i dano ma lao remo.”

9Abicai wod oteka lweny ma mine Jeruya owaco bot rwot ni, “Pingo iweko gwok ma oto ni bedo ka ceni, ladita rwot? Wek akat ikome acit angol wiye woko.” 10Ento rwot ogamo ni, “An alaro ango kwedwu, wun awobe pa Jeruya? Kace en tye ka ceno an ma onongo Rwot aye ocike ni, ‘Cit icen Daudi,’ ci anga madok biwaco ni, ‘Pingo itimo kitmeno?’” 11Daudi dok owaco bot Abicai ki lutice ducu ni, “Nen ba, woda aye mito neka, ci Labenjamin man pe dong bimito neka makato? Wuwek en obedi, wek obed ka cena gire, pien Rwot aye ocike. 12Gwok nyo Rwot aye bineno kit atwom man matye ikoma, ci Rwot aye bicula ki gin maber maka cen ma gicena kwede tin.” 13Kitmeno Daudi ki lwake gulubu yoo gucito gigi; kun kono Cimei woto rabo nget got ma woto pore ki Daudi, kun woto ki cene kwede, ka bayo got celo kikome bene, ki onyo apwagu bene ikome. 14Rwot Daudi ki jo ducu ma gitye kwede guwoto guo wa i dog kulu Jordan ma guol matek, ci rwot ki jone guywe ikom ologi ki kenyo.

Abcalom i Jerucalem

15Abcalom ki lwake ducu, ma gin jo Icrael, gubino gucore i Jerucalem kacel ki Akitopel. 16Ka Kucai ma La-arki, ma larem Daudi, obino bot Abcalom, ci Kucai owaco bot Abcalom ni, “Rwot obed kwo nakanaka. Rwot obed kwo nakanaka!” 17Ci Abcalom owaco bot Kucai ni, “Meno aye yo me nyutu mar bot laremi bo? Pingo pe in icito kacel ki laremi?” 18Kucai owaco bot Abcalom ni, “Pe kumeno, pien ka ngat ma Rwot Lubanga ki lwak man kacel ki jo Icrael ducu gutyeko yerone, an abibedo danone dok abibedo kwede bene. 19An dok abitiyo bot anga mono? Pe myero abed bot wode kikome? Kit mayam abedo katic bot woruni, abitic boti bene kitmeno.”

20Abcalom dok owaco bot Akitopel ni, “Ngola ryeko ba; dong wa oo wa kany wabitimo gin ango doki?” 21Ci Akitopel owaco bot Abcalom ni, “Dong ia itugi cito wa bot mon angeca pa woru, ma en owekogi ka gwoko otti wek ibut kwedgi. Ci jo Icrael ducu ka gibiwinyo piri ni, in dong i doko lamerok pa woru, miyo jo ducu ma gitye tung boti komgi biyare woko ki tek.” 223Kitmeno kiguru kema pi Abcalom malo iwi ot, ci Abcalom ocako donyo iwi mon angeca pa wone me butu kwedgi ma jo Icrael ducu gineno.

23Ikare meno tam ducu ma Akitopel miyo nen calo lok pa Lubanga kikome. Tam me ryeko ma Akitopel miyo nen ber kitmeno bot Daudi wa bot Abcalom bene.