2 Camuel 15

Abcalom otemo mayo ker pa wone

1I nge meno Abcalom ocako nongo gadigadine ki aguragura me ywayone, ki dano pyere abic ma giringo inyime. 2Abcalom obedo ka a malo odiko con jwijwi, ci cung inget yoo i dogcel me Jerucalem. Ka oneno dano mo ma okelo lok me alara bot rwot, ci en lwongo danonu kun waco bote ni, “In ia ki i gang mene?” Kace dano meno owaco ni, “An aa ki i Icrael i kaka ma onyo,” 3ci Abcalom dok waco bote ni, “Nen ba, loki nen mit dok tye atir, ento ngat mo pe tye ma rwot oketo ma biwinyo loki.” 4Abcalom dok waco ni, “Kono yam kiketo an aye abedo langolkop i loboni, kono ber tutwal! Kono ngat matye ki loke nyo pidone tugi bino bota cut, ci angole kop ma atir cut.” 5Ikare ducu ka dano mo obino ma ryebe piny me miye woro, ci en cwalo cinge kwako ki danonu, ci mote ki mot me mar. 6Abcalom obedo katimo bot jo Icrael ducu kitmeno ka gubino ki pidogi bot rwot; ci oywayo cwiny jo Icrael ducu odwoko ikome.

7I agiki me mwaka me angwene, Abcalom openyo rwot ni, “Alegi wek acit i Kebron ka cobo kwonga mayam akwongo bot Rwot.” 8Pien yam akwongo kwong, ladit ikare ma abedo i Gecur i lobo Ciria kun awaco ni, “Ka Rwot odwoka tuwa i Jerucalem ada, ci abicito i Kebron kamiye woro.” 9Ci rwot ogamo doge ni, “Ber icit giri ki kuc.” Ci Abcalom oa ocito i Kebron. 10Ento Abcalom ocwalo lukwena ne imung ci guwoto gurumu i kaka pa jo Icrael ducu, kun en ociko ni, “Ka teke wuwinyo dwon tum okok, ci wubiwaco ni, ‘Abcalom dong odoko rwot i Kebron!’” 11Abcalom ocito ki dano ma gua ki i Jerucalem ma giromo miya aryo ma en olwongogi macalo welene i Kebron. Gin ducu gucito ata ma pe gungeyo tere. 12Ikare ma Abcalom tye katyero gitum, en ocwalo kwena wek kilwonge Akitopel ma jo Gilo, ma lamitam pa Daudi, ci en oa ki i ganggi ma i Gilo ci obino. Ci piro lokgi omede ameda matek, lwak gubedo ka mede bot Abcalom ameda.

13Lakwena mo obino bot Daudi ma owace ni, “Cwiny jo Icrael odak woko ka lubu kor Abcalom.” 14Daudi owaco bot jone ducu ma onongo gitye kwede i Jerucalem ni, “Wutugi a wek waringu woko. Ka pe wun orune wacito woko oyoto, ci dano mo pe ma bibwot ki i cing Abcalom, miyo en bipoto ikomwa, ci bikelo can madwong ikomwa. En bineko dano ma i taun madit man tyeko woko ki pala lucwan.” 15Ci lutic pa rwot guwaco bote ni, “Nen ba, wan lutici watye ka kuru gin ducu ma in imoko.” 16Ci rwot ocito woko ki jone matye i ode ducu ma gulubu kore, ento en oweko mon angeca ma giromo apar ka gwoko ot. 17Rwot oa woko ki lwake ma lubu kore; ci ocung cok ki ot me agikine. 18Lutice ducu gumol gukato ki inyime; ki jo Keret ducu, ki jo Pelet ducu ki jo Gat miya abicel mayam gulubu kore nia ki i Gat; gin ducu gumol gukato ki inyim rwot.

19Ci rwot owaco bot Itayi, dano me Gat ni, “Pingo in bene icito kweda? Dok cen icibed ki rwot manyen; pien in larok ma ia woko ki i lobowu. 20Pud ibino abina laworo maca, ci bedo ber ka an tin dok amiyi ibed kawire kamal ata kwedwa? Nen ba, an abiwoto kama pe angeyo. Dok cen, ikwany omegiwu gudok kwedi. Myero Rwot Lubanga omii mare ma pe loke, ma gene, obed ikomwu.” 21Ento Itayi odok iye bot rwot ni, “Macalo Rwot tye makwoni, dok macalo in rwot bene itye makwo ni, ikabedo ducu ma ibibedo iye, ladita, kadi bed i to kadi bed i kwo, an bene abibedo kunu kwedi.” 22Ci Daudi owaco bot Itayi ni, “Dong ikat wacit kacel.” Ci Itayi ma dano me Gat okato kacel ki dul monye ducu ki mon wa lutinogi matino ma gitye bote ducu. 23Dano ducu gubedo kakoko matek ikare ma jo pa Daudi gikato ki ka ngetgi. Rwot ongolo ki i laora kulu Kidron, ci lwak ducu gukato gukemo tung tim.

24Ka Abiatar obino, ci Jadok bene otugi bino ki jo Levi ducu, ma gutingo Canduk me Gicike pa Lubanga. Gin guketo Canduk me Gicike piny, nio ka lwak ducu gumol ki i taun madit, gukato woko. 25Ci rwot owaco bot Jadok ni, “Ting Canduk me Gicike, idwok cen i taun madit. Kace alimo gum ki bot Rwot, ci abidwogo paco dok aneno kome ki kama en bedo iye. 26Ento ka Rwot Lubanga owaco ni pe etye ki yomcwiny mo ikoma, ci nena, an dong atye ene, wek en dong otim ikoma gin ducu ma en neno ni ber ki tung bote.” 27Ci rwot dok owaco bot ajwaka Jadok ni, “Nen ba, wudok i taun madit, wun ki Abiatar ki awobewu aryo, Akimaj ma wodi ki Yonacan wod pa Abiatar. 28Abikuru ki i wang wat ma i tim, nio kalok bia ki botwu ma miya ngec mogo.” 29Kitmeno Jadok ki Abiatar gutingo Canduk me Gicike, gudok kwede cen i Jerucalem, ci gubedo kunu.

30Ento Daudi ocako ito malo iwi got Jeituni. Kun en ito malo ki koko, ki tyene bene onongo tye nono, ma oumu wiye; ki jo ma gitye kwede ducu guumu wigi, ma giwoto kun gikok matek. 31Ka dok kitito bot Daudi ni, “Akitopel bene tye ikin lupir lok gin ki Abcalom,” ci Daudi olego Rwot Lubanga ni, “Ai Rwot, alegi imii tam ma Akitopel miyo obed lok me mingming.”

32Daudi oito malo, oo wa iwi got kama kiworo iye Lubanga. Ci nen, Kucai ma La-arki otuc, obino ka rwate kwede ma kanyine oyec woko, ki ma ojuku wiye ki ngom. 33Daudi owace ni, “In ka iwoto kweda ibimiya peko. 34Ento ber idok i taun madit ci iwac bot Abcalom ni ibibedo latice, kit mayam ibedo latica ikare ma an abedo rwot. Ci in aye ibibalo tam ma Akitopel miyo bote. 35Jadok ki Abiatar ma ajwaki pa Lubanga bene gibibedo kwedi kunu. 36Awobegi aryo bene gitye kunu, Akimaj wod pa Jadok ki Yonacan wod pa Abiatar. Ci ibicwala lok ducu ma iwinyo wok ki botgi.” 37Kitmeno Kucai ma larem Daudi obino i Jerucalem ikare ma Abcalom donyo kwede i taun madit.