2 Camuel 14

Joab oyubu lok wek Abcalom odwog cen

1Ikare meno, Joab wod pa Jeruya onongo dong otyeko niang maber ni cwiny rwot tye ka pide pi Abcalom. 2Ci Joab ocwalo kwena i Tekoa kaomo dako mo ma laryeko matek matye kunu. Ka dakonu obino ci Joab owace ni, “Ber i por koko, dok iruk ginaruka me cola. Pe i wir komi ki moo, ento ibed macalo dako ma obedo kakoko lato pi kare malac. 3Ka icit kwede wa bot rwot, ci icilok kwede kit man.” Kumeno Joab opiko dakonu ki lok.

4Ka dako me Tekoa obino bot rwot, ci oryebe piny i ngom, omiye woro, kun wace ni, “Konya, ai rwot.” 5Ci Daudi openye ni, “Gin ango matye ka yeli?” Dakonu ogamo ni, “Ada, an a dato ma cwara dong oto woko. 6Onongo atye ki awobe aryo, ci ceng mo gubedo ka da keken gi i poto, ma latek kin gi obedo peke; ci ngat acel ogoyo wadi oneko woko. 7Ci kaka ducu gutware gubino ikoma, gucako lok ni, ‘Kel dano ma ogoyo omine oneko wokoni, wek waneke woko.’ Nen, gimito neko laleyo woko, pi culu kwor pa omine. Kitmeno gimito neko dong ngat acel mudongi woko do, ci dong pe giweko gin mo pi nying cwara, en dong pe bibedo ki dano ne mo madong iwi lobo!”

8Rwot ogamo dog dakonu ni, “Dok wa i odi, ci abicwalo cik ma mako lok komi.” 9Dako me Tekoa dok owaco bot rwot ni, “Alii ne opot ikoma, ladita rwot, ki ikom ot pa wora. Wek alii mo pe opot ikom rwot ki ikom kom kere.” 10Rwot dok owace ni, “Kace ngat mo owaci lok mo, ci ikel en bota, ci dong en pe bigudu komi matwal.” 11Ci dakonu ogamo doge ni, “Ladit rwot, tim ber ikwonge i nying Rwot Lubangani, kun iwaco ni, lacul kwor remo pa lato owek neko woda obedi, wek latina man pe oto doki.” Ci rwot ogamo doge ni, “Macalo Rwot tye makwo ni, yer wi wodi mo pe bipoto i ngom.”

12Dakonu dok owaco ni, “Alegi ni iwek dok alok lok mo acel keken boti, ladita rwot.” Ci Rwot ogame ni, “Waci.” 13Dakonu ocako waco ni, “Pingo cwinyi oteri katiyo gin marac ikom lwak pa Lubanga? Pi kit ngolo kop ma ingolo ni omiyo in rwot ingolo kop ikomi bene keni ni kop oloyi, pien pe idwoko latini ma kiryemo ni woko paco. 14Wan ducu wabito woko, wan wabedo calo pii ma okir piny i ngom, ma pe dok kitwero gurune kacel. Ento Lubanga pe twero kwanyo kwo pa ngat mo ma yenyo yo wek danone ma kiryemo pe kiryem obed woko kunu matwal. 15An abino kany kalok kwedi, ladita rwot pien dano gumiya lworo, omiyo atamo ni, ‘Abilok ki rwot; gwok rwot bitiyo iye gin mo ikom lok ma alego dok en bicobone bene. 16Pien rwot biwinyo, ci bilaro latice ki i cing dano ma gimito jwayo an kacel ki woda woko ki i lobo ma Lubanga omiyo bot jone.’ 171Dok onongo atamo ni, ‘Lok pa ladita rwot bimiyo cwinya kwe.’ Pien in, ladita rwot, irom ki lamalaika pa Lubanga ma poko kin lok maber ki marace. Rwot Lubangani obed kwedi.”

18Ci rwot dok ogamo dog dakonu ni, “Pe imunga ilok ducu ma koni apenyi kwede.” Dakonu ogamo ni, “Lok loki bota ba, ladita rwot.” 19Ci rwot openye ni, “Wun wuribo dogwu ki Joab ikom lok man ducu ce?” Ci dakonu ogamo doge kun waco ni, “I lok me adane, kit ma itye makwo ni, ladita rwot, dano mo pe twero kano loke tung acuc nyo tung acam ikom lok ma in rwot ipenyoni, latici Joab aye ociko an; en kikome aye oketo lok magi ducu idoga. 20Latici Joab otimo man wek kong tam mo manyen obin ikomi. Ento in, ladita rwot, ryekoni rom ki ryeko pa lamalaika pa Lubanga, pien ingeyo gin ducu ma time iwi lobo ni.”

21Lacen rwot owaco bot Joab ni, “Nen ba, tin dong ajolo loki. Ber icit iom latina man Abcalom, idwok en paco.” 22Ci Joab opoto oryebe piny wa i ngom omiyo woro bot rwot, ka olamo gum ikom rwot.

Joab owaco ni, “Tin an latici dong angeyo ni ayomo cwinyi, ladita rwot, pien ityeko jolo gin ma alego ki boti.” 23Joab ocito i Gecur, ka oomo Abcalom ci okele paco i Jerucalem. 24Ento rwot ociko ni, “Wek en kong obed ki cen i ode, pe obin inyima kany.” Ci Abcalom obedo gire ki cen i ode, pe omedo ki bino inyim rwot.

Daudi otimo kica ki Abcalom

25I karenu onongo pe tye ngat mo ma kiboro mwonyane makato Abcalom ki i lobo Icrael ducu; kome mwonya cake ki i tyene nio wa i cwiny dye wiye, kome ducu nen mwonya mada. 26En yam ngolo yer wiye i tum mwaka ducu; ka oneno ni yer wiye dong odoko pek, ci dong en ngolo woko. Kace olyelo yer wiye, en pimo ki mijan pa rwot, ci peke kato kilo aryo. 27Abcalom onongo tye ki lutino awobe ne adek ki nyako acel ma nyinge Tamar; nyakonu bene mwonya mada.

28Abcalom obedo i Jerucalem pi mwaka aryo ma pe cito inyim rwot. 29Lacen Abcalom ocwalo kwena bot Joab wek oter loke bot rwot, ento Joab pe omedo ki bino bote. Dok ocwalo kwena tyen me aryone, ento Joab dok pe omedo ki bino bote. 30Ka Abcalom oneno ni Joab pe tye ka mito bino bote, ci en owaco bot lutice ni, “Nen, poto pa Joab tye cok ki mera, ocoyo bel cayiri iye. Wucit wuwang woko.” Ci lutic pa Abcalom gucito guwango poto meno woko. 31Ci Joab oa ocito wa bot Abcalom, odonyo i ode, ci openye ni, “Pingo lutici guwango potona woko?” 32Abcalom ogamo dog Joab ni, “Abedo ka cwalo lok boti ni ibin kany wek acwali bot rwot, wek ipenye ni, ‘Pingo en omiyo aa woko ki i Gecur? Kono nene abedo gira kunu.’ Kombedi dong amito icit inyim rwot. Ka roc mo tye ikoma, wek en oneka woko.” 33Joab ocito bot rwot, ci otero loke, ci rwot olwongo Abcalom. Ci Abcalom ocito bot rwot, obino oryebe piny inyime, ci rwot ojole onoto leme.