2 Camuel 13

Amnon gin ki Tamar

1Abcalom onongo tye ki lamine mamwonya mada ma nyinge Tamar. Ci Amnon wod pa Daudi ocako maro nyakonu. 2Amnon obedo ki miti madwong ikome; pi paro laminine Tamar ci ocako kwo calo ngat ma kome lit. Tamar onongo pud latin nyako ma peya ongeyo laco mo dok Amnon oneno ni pe etwero nongo yo mo me butu kwede. 3Ento Amnon onongo tye ki lareme mo ma nyinge Jonadab, wod pa Cimea ma omin Daudi. Jonadab onongo tye dano mo ma langol ryeko tutwal. 4En openyo Amnon ni, “Wod pa rwot, gin ango mono do ma jonyo in jwijwi ni? Pe itita loke ce?” Amnon ogamo ni, “An amaro Tamar ma lamin omera Abcalom.” 5Jonadab owaco bote ni, “But piny iwi kitandani, ci ipor ni two onongo odiyi matek. Ci ka woru Daudi obino ka limo twoni, ci ber iwace ni, ‘Wek lamera Tamar aye obin oyuba cam ka omiya ka wek acam, kun en biyubu ki inyima kany ma aneno, ka dok abicamo came ki i cinge.’” 6Kitmeno Amnon ocako butu piny kun poro two. Ka rwot Daudi obino ka limo twone, ci Amnon olego rwot kun waco ni, “Alegi iwek lamera Tamar aye obin otede capat mogo aryo ki inyima, ka wek acam ki i cinge.”

7Daudi ocwalo lok paco bot Tamar kun waco ni, “Cit i ot pa omeru Amnon, wek iciyube cam ki kunu.” 8Ma omiyo Tamar ocito wa i ot pa omine Amnon, ci otedo capat ki inyime. Ka dong otedo capate ocek, 9ci otingo otakone oketo piny, oloko capati okelo ocibo inyim Amnon wek ocam. Ento Amnon okwero camo woko. Kadok owaco ni, “Kicwal dano weng woko ki inyima.” Kitmeno dano ducu gua gucito woko ki inyime. 10Ka Amnon dok owaco bot Tamar ni, “Kela cama bota wa i tyelo bota kany, wek acak camone ki i cingi.” Tamar otero capat ma otedo ni ityelo bot omine Amnon. 11Ento ka Tamar okele cam ityelo kama en tye iye kunu ci onyiko cok kwede wek en ocam ki i cinge, ci Amnon oa malo opoto ikome kun wace ni, “Bin wek ibut kweda do, lamera.” 12Tamar ogamo doge ni, “Pe kumeno, omera, pe i maka tektek, pien kit tim macalo man peya otiine i Icrael kulu. Alegi pe itim tim me mingo kit man. 13Ci an kono mono, abitero lakit lewici wa kwene? Ki in bene ibibedo ngat ma otimo tim me kipyeda i Icrael kulu. Dong alegi alega ni, icit ipeny rwot; en pe bikwero pi koma boti.” 14Ento Amnon pe owinyo loke; dok obedo ki teko makato nyakonu, ci omiyo omake ki tek, ka obutu kwede.

15Lacen Amnon ocako kwero lamine Tamar ki kwer madit tutwal; dok okwero en ki kwer madit makato mar mayam omare kwede. Amnon dok owace ni, “Dong ikat woko iciti.” 16Ento Tamar owace ni, “Pe kumeno, omera. Cwala woko tektek aye dok rac makato tim kipyeda madong itimo ikomani.” Amnon pe omedo ki winyo loke meno. 17En olwongo awobi mo ma tiyo bote macalo lakonye, ci owace ni, “Cwal dako ni woko ki inyima, ci irwak lalor dogola iceg woko ki i yo ngeye wek pe odony bota kany doki.” 18Ikare meno onongo Tamar oruku bongo ma labade bor, pien meno aye kit ruk pa anyira pa rwot ma peya gingeyo co. Latic pa Amnon ocwalo Tamar woko, ka oloro dogola ocego woko ki i yo ngeye. 19Ci Tamar ocako onyo buru i wiye, ka oyeco bongo labade bor ma oruku ni, ma okwako wiye ki cinge, ka ocako cito kwede kun kok matek.

20Ka Abcalom oneno lamine ci openye ni, “Omeru Amnon obutu kwedi ce? Kombedi dong ibed iling mot, lamera. En obedo omeru, pe cwinyi obed ka paro loke.” Ci Tamar obedo i gang bot Abcalom ki cwercwiny madwong kun bedo kene.

21Ka rwot Daudi owinyo lok meno ducu, ci obedo ki kiniga madwong. 22Ento Abcalom pe omedo ki loko lok mo bot Amnon maber nyo marac, kadi bed cwinye okwero Amnon matek pi mako lamine tektek.

Abcalom oculu kwor pa Tamar

23Ka dong mwaka okato aryo, Abcalom obedo ki lunyar yer romine i Baal-kajor macok ki Epraim, ci olwongo awobe pa rwot ducu me bino iye. 24En ocito wa bot rwot Daudi kun wace ni, “Nen, atye ki lunyar yer romina. Alegi rwot in ki lutici wubin wuribe kacel kweda i karama man.” 25Ento rwot owaco bot Abcalom ni, “Pe kumeno, latina, pe iwek wan ducu wacit kunu, miyo wacikeli peko nono.” Abcalom odiye ki tek, ento en pe oye cito kunu, kono olame gum keken. 26Ci Abcalom dok owace ni, “Ka dong pe icito kweda, alegi iwek Amnon ma omera aye ocit kwedwa.” Ci Daudi ogamo doge ni, “Pingo imito ni en bene ocit kwedwu?” 27Ento ka Abcalom odiye ki tam, ci omiyo lacen en oweko Amnon ocito kwed Abcalom, ki lwak awobe pa rwot ducu.

28Abcalom dok ociko lutice ni. “Wunen maber ikare me kwer ka dong cwiny, Amnon odoko yom ki kongo bwino. Ci kace dong awaciwu ni ‘Wucob Amnon,’ ci dong wuneke woko kumeno. Pe wulwor iye gin mo, pien an aye acikowu. Wubed ma cwinywu nwang. Dok wubed twoni oteka lweny matego.” 29Ci lutic pa Abcalom guneko Amnon kit ma en ocikogi kwede. Cut awobe pa rwot mukene ducu gutware malo ki ngwec, ci ngat acel acel opye iwi kanane oringo kwede woko.

30Lok okwongo o bot Daudi ma pud peya guo paco ni, “Abcalom oneko awobe pa rwot woko ducu liweng, ma acel mo bene pe obwot.” 31Rwot oa malo, ocako yeco bongine woko pi cwercwiny, ci obutu piny i ngom. Lutice ma gucung kangete bene guyeco bongigi woko. 32Ento Jonadab wod pa Cimea omin Daudi, owaco ni, “Ladita, pe ibed ka tamo ni kineko lutino awobeni woko ducu. Amnon kene aye kineko. Kineko pi cik pa Abcalom, pien omoko lok man i cwinye cake ikare ma Amnon omako iye lamine Tamar obutu kwede tekteki. 33Kombedi, rwoda rwot, pe ibed ka tamo ni awobeni ducu dong guto woko; Amnon kene aye oto.”

34Abcalom ki tung cel oringo woko. Ka awobi ma kuru piny otingo wange oneno piny, ci nen, lwak dano gibino ki i yoo ma a ki i Koronaim kun girabo nget got. 35Jonadab dok owaco bot rwot ni, “Dong inen ba, lutino awobeni dong gitye kabino kit macalo awaci ni. Loka dong ocobo kakare.” 36Ka dong otyeko waco loke, ki ingeye cut, awobe pa rwot gutuc paco. Gucako dange ki koko, ci rwot bene wa ki lutice ducu gukok matek tutwal. 371

Ento Abcalom oringo woko, ocito bot Talmai wod pa Amikud, rwot me Gecur. Daudi obedo kakoko pi wode pi nino mapol! 38Kitmeno Abcalom oringo ocito i Gecur, obedo kunu mwaka adek. 39Lacen ka cwiny rwot dong okwe pi to pa Amnon, cwinye ocako pide pi Abcalom.