2 Camuel 12

Natan ojuku Daudi

11

Ikare meno Rwot ocwalo lanebi Natan bot Daudi, ci Natan ocito otito bote ni, “Yam tye jo aryo ma gibedo i taun mo, acel onongo lalonyo, ki acel lacan. 2Lalonyo onongo tye ki lwak romi ki dyangi mapol; 3ento lacan onongo obedo ki bwong romone acel loko ma en onongo owilo. Ci odongo ki i cinge kacel ki lutinone; romone ni obedo kacamo ngide came, kun mato pii i kikopone, dok butu abuta bene wa i kore, ci obedo macalo nyare. 4Ikare ma lawot mo obino bot dano ma lalonyo ni, ci en pe oye kwanyo lime mo matye ikin romine kikome me tedo welone ma obino boteni, ento dok okwanyo romo pa dano ma lacan ni, en aye otedo pi welo ma obino boteni.” 5Kiniga omako Daudi cut ikom lalonyo meno matek; ci owaco bot lanebi Natan ni, “Macalo Rwot tye makwo ni, dano man ma otimo kitmeno ber kinek woko. 6Dok en biculu wang romo meno tyen angwen kulu, pien otimo gin marac kumeno, ki pe me bedo ki cwiny me kica ikom lacan ni.”

7Ci Natan cutcut owaco bot Daudi ni, “In aye i dano meno kikome. Ci dong iwiny dwon Rwot Lubanga, Lubanga pa Icrael tye ka waci ni, ‘Yam awiro in ki moo me bedo rwot maloyo Icrael. Dok alaro in ki i cing Caulo. 8Ci amiyo ot pa laditi i cingi, wa ki mone ducu amiyogi i kori, dok amiyo boti ot pa Icrael ki pa Juda ducu. Kace meno ducu pud ibwonogi, kono nene amedi makato meno. 9In ityeko cayo lok pa Rwot, ki pi tiyo gin marac inyime pingo? Nen, ityeko neko Uria ma Lakit woko ki pala lucwan, ka dok ikwanyo dakone woko wek odok dakoni. Ma kun in aye ineko en ki pala lucwan pa jo Ammon. 10To me pala lucwan dong pe biweko odi, pien ityeko cayo an pi kwanyo dako pa Uria Lakit me bedo dakoni.’ 112Rwot dok owaco kit man ni, ‘Nen, abimiyo gin marac poto ikomi ma bia ki i odi kikome; dok abikwanyo moni ki inyimi, ci amiyogi bot lawoti, ci en bibutu ki moni i dyeceng kamaleng. 12In itiyo meri i mung, ento an abitiyo man atyer inyim jo Icrael ducu, ki i dyeceng bene.’” 13Daudi ogamo dog Natan ni, “An dong atiyo bal ikom Rwot Lubanga.” Ci Natan owaco bot Daudi ni, “Rwot gire dong otyeko jwayo bali woko, pe dong ibito. 14Ento pi kit timi man nyutu atir ni ityeko cayo Rwot Lubanga marac adada; ci pi lok meno latini ma kinywaloni bito woko.” 15Lacen Natan odok i ode.

Latin pa Batceba oto

Ci Rwot omiyo two ocelo latin ma dako pa Uria onywalo ki Daudi ni, ci two ne omede matek adada. 16Daudi obedo ka bako doge pi latin ni bot Rwot Lubanga wek okwo, kun rii kec benebene. Ikare meno ka odonyo i ot kabutune ci en butu piny i ngom dyewor ducu. 17Ka ludongo ma i ode gubino me bite kun kicuku cwinye wek en oa malo kacam, ento en kwero woko, pe bene camo cam mo kwedgi. 18Inino me abirone en aye latin oto woko. Lutic pa Daudi gulworo tito pi to pa latin, pien gutamo ni, “Ikare ma latin pud kwo waloko kwede kwe, pe owinyo dogwa. Ci watwero wace ningning ni latin dong otyeko to woko? Gwok nyo en bitime kekene marac.”

19Ento Daudi ka oneno lutice gitye kakwilo lok kacel, ci oniang ni latin dong oto woko. Ci en openyo lutice kuman ni, “Latin dong oto woko ce?” Ci gugamo doge ni, “En dong oto.”

20Ci Daudi ocako a malo ki i ngom, olwoke, owiro kome ki moo, ka oloko bongine bene. Okato woko ocito wa i Ot pa Rwot, oworo Lubanga; ka dok okato woko ocito wa i ode kikome. Ka openyo pi cam, ka guketo cam inyime ci ocamo. 21Lutice guwaco bote ni, “Man kit gin ango ma itiyo, ladit? In ibedo ka rii kec ki kakoko pi latin ma onongo pud kwo; ento ka latin dong oto woko, ci dong ia malo icako camo cam!”

22Daudi ogamo ni, “Ikare ma latin pud tye makwo ni, abedo ka rii kec ki kakoko pi latin kun atamo ni, ‘Anga mono ma ngeyo ka nyo kica bimako Rwot ikoma, wek latin pe oto?’ 23Ento kombedi dong latin otyeko to woko; pud dok ari kec pingo kono? An dok atwero dwoko en cen bo? Wayi an aye dong abicito bote yo, ento en pe dok bidwogo bota.”

Solomon kinywalo

24Daudi okweyo cwiny dakone Batceba, ci obutu kwede. Onywalo kwede latin laco, ocako nyinge Solomon. Rwot bene omaro latinu. 25Rwot Lubanga dok ocwalo lanebi Natan bot Daudi ki lok man ni, ocako nying latin ni Jedidia,3 pien Rwot maro.

Daudi omako Raba

(1 Tek 20:1-3)

26Ikare meno Joab obedo kalweny ikom Raba, ma en taun madit pa jo Ammon, ci omako taun ma buku piine bene. 27Ka dok ocwalo lukwena ne bot Daudi ka wace ni, “Abedo kalweny ikom taun madit me Raba, dok atyeko mako taun kama kibuku piine iye bene. 28Ci ber in dong icok lwak mudongi kacel, ci ibin irum taun madit man wek imak woko, wek pe an aye amaki, miyo kibilwongo ki nyinga.” 29Kitmeno Daudi ocoko lwak kacel ci ocito kunu kwedgi i Raba, olwenyo ikome ci omako woko. 30Daudi okwanyo lalukana me jabu ki iwi Milkom ma jok pa jo Ammon. Peke onongo romo cok kilo pyere adek, got me wel bene onongo tye iye, ci kicibo iwi Daudi. Daudi odwogo ki jami ma kiyako i taun maditi madwong tutwal. 31Dok okelo dano ma kiyakogi ki i taun madit meno, oketogi katic ki mucumeno ki cururu nyonyo ki latong, ka dok oketogi katic matek me wango matapwali. Ci Daudi obedo katimo dano ma i taun pa jo Ammon kitmeno. Lacen Daudi ki lwak ducu gudok cen i Jerucalem.