2 Camuel 11

Daudi ki Batceba

11

I dog oro ma en aye kare ma luker gicito kwede kalweny, Daudi ocwalo Joab ki lutice ki jo Icrael ducu matye bote kamonyo jo Ammon, ci guneko jo Ammon malit, dok guyako pacogi woko, ka gurumu kwede taun me Raba, kun Daudi odong gire mere paco i Jerucalem.

2Inino mo acel i dyeceng abwora, ma Daudi oa malo ki i kabutune, ci en onongo tye kawot ki malo iwi ot pa rwot. Ka obolo wange cen ci oneno dako mo matye kalwok, kun kome nen mwonya tutwal. 3Ci Daudi ocwalo dano mo me penyo wek eniang ikom dakonu. Ci ngat mo acel owaco ni, “Meno aye Batceba nya pa Eliam, ma dako pa Uria ma Lakit.” 4Daudi ocwalo lukwena mukene ni kiom dakonu, ci gucito gukele bot Daudi, ci Daudi obutu kwede. Ikare meno onongo dakoni pud olwoko kwer mone alwoka. I yo nge tim meno dakonu odok i ode. 5Dakonu otugi gamo ic, ci ocwalo kwena me tito loke bot Daudi ni, “Dong atye ki remo.”

6Kitmeno Daudi ocwalo lok bot Joab, kun waco ni, “Cwala kong Uria ma jo Kit.” Ci Joab ocwalo Uria bot Daudi. 7Ka Uria oo bote, Daudi openyo gin ma Joab tye katiyone, ki kit ma dano gubedo kwede kunu, ki kit ma mony tye kawot kwede. 8Ka lacen Daudi owaco bot Uria ni, “Kong dong icit i odi, icit ilwok tyeni wek iywe manok.” Ka Uria okato woko ki i ot pa rwot, rwot dok ocwalo mot me cam olubu ki kore i pacone. 9Ento Uria obutu inget dogola pa rwot kacel ki lutic pa ladite, ci en pe ocito i ode. 10Ka kitito pire bot Daudi ni, “Uria pe omedo ki cito gire i ode,” Daudi owaco bot Uria ni, “In pe ia ki kawot ce? Ci pingo pe kong icito wa i odi?” 11Uria ogamo dog Daudi ni, “Canduk pa Lubangawa kombedi tye ibar lweny i bolo ki kunu ki mony pa jo Icrael ki Juda ducu gibedo woko, ki dong ladita Joab ki lutice bene ducu gitye gubutu woko i tim, ci bedo ber ka an aye doki acit i oda kuca ka cam ki ka mat ki kabedo ki dakona? Macalo itye makwoni, ki tipu komi tye makwo ni, pe atwero tiyo lok macalo meno.” 12Daudi owaco bot Uria ni, “Tin dok kong ibed kany, ci diki dong aweki icito.” Omiyo Uria dok obedo i Jerucalem inino meno, ki orwone bene. 13Daudi dok olwonge wek gicam kacel, ci Uria obino ocamo ka omato kongo inyime, ci Daudi omiyo en omer matek. I dyewor meno en dok ocito obutu i kabutune kacel ki lutic pa ladite; pe omedo ki cito i ode.

14Daudi ocoyo waraga bot Joab i odiko, ci omiyo bot Uria me atera. 15I waraga meno Daudi ocoyo ni, “Ket Uria anyim kama lweny gwar iye, ci wujer, wudwog cen ki ingeye, wuweke kunu, wek gicobe kineke, wek en oto woko.” 16Ikare ma Joab oywako mony me rumu taun wek ema woko ki bot lumeroke, en otugi keto Uria kama en ngeyo ni oteka lweny pa lukwore gitye iye. 17Jo ma i taun meno gubino gulwenyo matek ikom Joab, ci lutic pa Daudi mogo bene kinekogi woko. Ki Uria ma Lakit bene kineke woko iye. 18Ci Joab ocwalo kwena otito bot Daudi gin ducu ma otime i dog lweny meno. 19Joab ociko lakwena ma ocwalo bot Daudi kit man ni, “Ka dong ityeko tito bot rwot lok ducu mutime i dog lweny, 20kace ineno kiniga omako rwot ce openyi ni, ‘Pingo wunyiko cok wa ikom taun kalweny iye kunu? Pe onongo wungeyo ni kibicelowu ki malo iwi cel? 212 Anga mayam oneko Abimelek wod pa Jerubaal? Pe dako mo aye obayo lakidi rego madit ocele kwede ki malo iwi cel, omiyo en oto woko i Tebej? Pingo wunyiko cok ikom cel?’ Ka owaco kit man, ci in dok ibiwace ni, ‘Latici Uria ma Lakit bene oto woko.’”

22Lakwena oa ocito, ci obino otito bot Daudi gin ducu ma Joab ocwale kwede. 23Lakwena man dok otito bot Daudi ni, “Merok olwenyo ikomwa magwar, gucore ikomwa i dye bar, ento wajerogi, wadwokogi cen wa i dog cel me taun gi. 24Ci wegi atero gucako celowa ki malo iwi cel, guneko lutici mogo woko; wa kadi latici Uria bene kineko woko.” 25Daudi ogamo dog lakwena man ni, “Ibiwaco bot Joab kit man ni, ‘Pe ibed ka paro lok meno, pien pala lucwan neko dano tungi ki tungi. Wek mony olweny matek ikom taun meno, ci imak woko, ci iret woko piny.’ Ci itite ni en myero oka lake matek.”

26Ka dako pa Uria owinyo ni kineko cware woko i dog lweny, ci en okok pi cware. 27Ka kare me kwero colane dong otum, ci Daudi dok ocwalo kwena bote ci kikelo Batceba i ode, odoko dakone, onywalo kwede latin laco. Ento gin ma Daudi otimoni pe oyomo cwiny Rwot Lubanga.