2 Camuel 10

Daudi otayo jo Ammon ki jo Ciria

(1 Tek 19:1-19)

1Ka man otum, rwot me Ammon oto, ci wode Kanun oleyo katyene. 2Ci Daudi otamo kuman ki i cwinye ni, “Abinyutu cwiny me mar bot Kanun wod pa Nakac, kit mayam wone onyutu kwede cwiny me mare botani.” Ma omiyo Daudi ocwalo lutice ka kweyo cwiny Kanun pi to pa wone. Ka lutic pa Daudi guo i lobo pa jo Ammon, 3ci rwodi pa jo Ammon gucako waco bot laditgi Kanun ni, “In itamo ni Daudi mono ocwalo lwake me kweyo cwinyi pi keto deyo ikom woru? Daudi mono pe ocwalo lutice kangiyo taun ki karoto kite ducu, wek etur woko?” 4Kitmeno omiyo Kanun omako lutic pa Daudi, ci olyelo yer tik ngat acel acel woko tung cel, ka dok ongolo dye bongigi ikom pyergi, ka ocwalogi kwede woko kumeno. 5Ka kitito pire bot Daudi, ci en ocwalo dano ka jologi, pien onongo gitye ki lewic madwong tutwal. Ci rwot owaco botgi ni, “Kong wubed i Jeriko, nio ka yer tikwu otwi olot, ka dong wudwog kany.”

6Ka jo Ammon guneno ni dong gingeto i Daudi, ci gucwalo dano kawilo jo Ciria ma i Betrekob, ki jo Ciria ma i Joba, wek gukel acikari alip pyere aryo ma giwoto ki tyen gi, ki bot rwot me Maaka ma en obino bene ki dano alip acel, ki jo Tob ma giromo alip apar wiye aryo. 7Ka Daudi owinyo pirgi, ci en ocwalo Joab kacel ki buca mony pa twoni oteka lwenye ducu. 8Ci jo Ammon gubino gurwayo cok ka gurye i dogcel; ki jo Ciria me Joba ki me Rekob, ki jo Tob ki jo Maaka gupoke mere ken gi, gurye i dye bar.

9Ka Joab oneno mony okace woko ryoryo, tung nyime ki tung ngeye bene, ci oyero jo Icrael ma oyita lweny, ocako ryeyogi gukemo jo Ciria. 10Oketo jo mudonge bot omine Abicai, ma gin bene guryeyo gukemo jo Ammon. 11Ci Joab owaco ni, “Kace jo Ciria gubedo tek ikoma, ci ibikonya; ento ka jo Ammon aye gubedo tek ikomi, ci an abibino kakonyi. 12Bed oteka ma cwinyi nwang, wek walweny lweny me co pi lutuwa, ki taun wa ma Rwot Lubangawa omiyo ki wan, Rwot bene otim gin ma oneno ni ber.” 13Kitmeno Joab ki jo ma gitye kwede ducu gurwayo cok kalweny ikom jo Ciria; ci jo Ciria guringo woko ki inyime. 14Ka jo Ammon guneno jo Ciria guringo woko, ci gin bene gucako ringo woko ki inyim Abicai, gudonyo i taun. Ci Joab oa woko ki kalweny ikom jo Ammon, odok i Jerucalem.

15Ka jo Ciria guneno jo Icrael guloyogi, ci gucako coke kacel doki. 16Ka Adadejer ocwalo kwena, ci gukelo jo Ciria ma gitye loka kulu Euprate; gucako bino i Kelam, kacel ki Cobak ma lawimony pa Adadejer ma en obedo latel wigi. 17Ka kitito pirgi bot Daudi, ci en bene ocoko jo Icrael ducu. Ongolo kwedgi kulu Jordan, ka ocito wa i Kelam. Jo Ciria gurwayo mony ikom Daudi, ci gulwenyo ikome. 18Ento jo Ciria gucako ringo woko ki inyim jo Icrael; Daudi oneko jo Ciria maromo ringo ki gadigadi lweny miya abiro, ki wegi aguragura alip pyere angwen. Gucobo bene Cobak lawimony pa jonu, ci en bene oto woko ki kunu. 19Ka luker ma gubedo ite loc pa Adadejer guneno ni jo Icrael gutyeko loyogi woko, ci guketo lok pi kelo kuc ikin gi ki jo Icrael, dok gubedo ite locgi. Kitmeno jo Ciria gucako bedo ki lworo, pe dok gumede ki konyo jo Ammon.