2 Camuel 9

Kica omako Daudi ikom Mepibocet

11

Daudi openyo ni, “Tye ngat mo ma odong ki i ot pa Caulo, wek anyut cwiny me mar ikome pi Yonacan?” 2Ikare meno onongo latic pa Caulo mo ma nyinge Jiba tye kakenyo. Kilwonge ci kikele bot Daudi, ci rwot openye ni, “In aye Jiba bo?” En ogamo ni, “An do, ladit.” 32 Ci rwot Daudi dok openye ni, “Pe tye ngat mo ma odong ki i ot pa Caulo, wek anyut cwiny me mar pa Lubanga ikome?” Ci Jiba owaco bot rwot ni, “Wod pa Yonacan pud tye, ento tyene aye okwe woko.” 4Rwot openye ni, “En kono tye kwene?” Jiba ogamo ni, “En bedo i ot pa Makir wod pa Amiel, i Lo-debar.” 5Ci rwot Daudi ocwalo dano wek kiome ki i Lo-debar. 6Ka Mepibocet wod pa Yonacan ma wod pa Caulo ni obino bot Daudi, ci opoto oryebe piny omiye woro.

Daudi owace ni, “Mepibocet!” En ogamo ni, “An latici a en do.” 7Daudi dok owaco bote ni, “Pe ibed ki lworo mo. An abinyuti cwiny me mar pi woru Yonacan, abidwoko boti lobo ducu mayam pa kwaru Caulo, dok ibicam iwi mejana jwijwi.” 8Ci Mepibocet dok omiye woro kun waco ni, “An kono anga, ma omiyo itamo pi gwok mamwa ma oto macalo an ni?”

9Daudi dok olwongo Jiba latic pa Caulo, ci owace ni, “Jami pa Caulo ki jo ma i ode ducu atingo amiyo bot Mepibocet. 10In ki awobeni ki lutici wubipuru potone ducu, wek cam ocek iye, wek wod pa laditi onong iye ginacama mo. Ento en Mepibocet wod pa laditi bicam iwi mejana jwijwi.” Kare meno onongo Jiba tye ki awobene apar wiye abic, ki lutice pyere aryo. 11Ci Jiba ogamo dog rwot ni, “An abitiyo kit ma icika kwede ni ducu, ladit rwot.” Kitmeno Mepibocet ocako cam iwi meja pa Daudi marom ki ngat acel mo ikin awobe pa rwot. 12Mepibocet onongo tye ki wode mo matidi ma nyinge Mika. Ci jo ducu ma gibedo i ot pa Jiba gudoko lutic pa Mepibocet. 13Mepibocet ocako bedo i Jerucalem, pien en obedo kacam jwijwi iwi meja pa rwot. Pien onongo en ongol woko i tyene aryo ducu.