2 Camuel 8

Daudi omedo kere odoko malac

(1 Tek 18:1-17)

1Lacen Daudi dok otayo jo Piliciti, ci ocako loyogi, dok omayo Meteg-ama ki i cinggi. 2Daudi dok otayo jo Moab, ka opimogi ki tol, kun omiyo gubutu abuta piny i ngom. Ci en opimo tol aryo me aneka ki tol acel me aweka makwo. Ci jo Moab gubedo ite loc pa Daudi, kun giculu mucoro bote.

3Daudi dok otayo Adadejer wod pa Rekob rwot me Joba, ma onongo ocito ka roco kere odoko tek i dog kulu Euprate. 4Daudi omako wegi aguragurane alip acel ki miya abiro, ki acikarine ma giwoto ki tyen gi alip pyere aryo. Ongolo odon tyen aguragura ma ywayo gadigadi lwenygi, ento oweko mogo manok odong maromo ywayo gadigadi miya acel. 5Ka jo Ciria me Damaciko gubino ka konyo kor Adadejer me Joba, ci Daudi oneko jo Ciria alip pyere aryo wiye aryo. 6Daudi oketo lumonye i cel gogo kadi wa i lobo Ciria matye inget Damaciko; ci jo Ciria ma gitye kunu gubedo ite loc pa Daudi kun giculu mucoro bote. Rwot obedo kamiyo tek me bwoyo lobo bot Daudi kama en ocito iye ducu. 7Daudi oyako lwak kwot me jabu mayam lutic pa Adadejer tingogi, ci oterogi woko wa i Jerucalem. 8Dok rwot Daudi oyako lwak jami mapol me mola ki i Beta ki Berotai, mayam obedo taun pa Adadejer.

9Ikare ma Toi rwot me Kamat owinyo ni Daudi otyeko tayo mony pa Adadejer woko ducu liweng, 10ci Toi ocwalo wode Joram bot Daudi ka mote, kipwoye pi lweny ikom Adadejer ki pi loyo en woko; pien yam Adadejer obedo kalweny ki Toi tyen mapol. Joram ceng obino bot Daudi ki jami me ryal ki jabu ki molagu; 11jami meno bene rwot Daudi odyerogi woko bot Rwot Lubangane, kacel ki ryal ki jabu mukene ma en odyero ma oyakogi ki bot rok ducu ma en otayogi ilweny; 12macalo jami ma oyakogi ki bot jo Edom, jo Moab, jo Ammon, jo Piliciti ki jo Amalek, kacel ki jami ma en oyako ki bot Adadejer wod pa Rekob, rwot me Joba. 131

Daudi olimo yweka pi teke kene. Dok ikare ma dong en tye ka dwogo cen ki ilweny, en oneko jo Edom alip apar wiye aboro i nota me Kado. 14Daudi oketo lumony i cel gogo ma i Edom, kun guromo i lobo Edom ducu, ci jo Edom gubedo ite loc pa Daudi. Rwot Lubanga omiyo Daudi obedo ki loc ikom lobo ducu kama en ocito iye kalweny.

Ludito pa Daudi

(1 Tek 18:14-16)

15Daudi oloyo jo Icrael ducu kitmeno; dok obedo kangolo kop atir dok kakare ikom lwake ducu. 16Joab wod pa Jeruya obedo ladit me monye; ki Yekocapat wod pa Akilud obedo laco lok ma time. 17Jadok wod pa Akitub ki Akimelek wod pa Abiatar gubedo ajwaki; Ceraya obedo karan; 18Benaya wod pa Yekoyada obedo ladit maloyo jo Keret ki jo Pelet; ki awobe pa Daudi gubedo ajwaki.