2 Camuel 7

Lubanga oketo gicikene ki Daudi

(1 Tek 17:1-27)

1Ikare ma dong rwot Daudi obedo i ode, ma onongo Rwot omiye yweyo ki ikom lumeroke ma gurume dyereni, 2ci rwot owaco bot lanebi Natan ni, “Nen ba, an dong abedo i ot bao cedar, ento Canduk me Gicike pud bedo i kema.”

3Natan odok iye bot rwot ni. “Cit itii gin ducu matye i cwinyi, pien Rwot tye kwedi.”

4Ento i dyewor acelu en aye dok Rwot obino ci oloko ki Natan kun waco ni, 5“Cit itit bot latica Daudi ni Rwot owaco kuman ni, ‘In imito gera ot me bedona? 6An peya abedo i ot mo cake ki ikare mayam akwanyo jo Icrael ki i Ejipt o kwede wa onyo ni, ento kibedo kawire kweda kun abedo gira i kema. 7I lwak kabedo ducu ma abedo kawire iye ki jo Icrael ducu, onongo kong yam aloko lok mo bot lutela pa jo Icrael, ma acikogi pi kwayo lwaka jo Icrael, kun awaco ni, pingo pe kong wugera ot mo me bao cedar?’

8Ma omiyo dong ibiwaco bot latica Daudi ni, ‘Rwot me mony owaco kit man ni. An yam akwanyo in ki ka kwat i olet, kama ibedo iye ka leko romi; wek ibed laker maloyo jona jo Icrael. 9Dok abedo kalonge kwedi i kabedo ma icito iye ducu, abedo ka jwero lumeroki woko ki inyimi. An dok abimiyo nyingi ywek marom ki nying jo madito ma iwi lobo ni. 10Dok abimiyo kabedo ki jona jo Icrael, ci abiketogi iye, wek dong gubed i kabedogi kikome, ma pe dong kiyelogi matwal, wa lulweny magwar bene pe dok biete pi bino me poto ikomgi ikare mo, kit ma con ca, 11cake ki ikare mayam aketo iye lungolkop ma giloyo jona jo Icrael. Dong abimiyo iywe ki lweny ikom lumeroki ducu. Dok Rwot otyeko tucu boti ni en ebimiyo jo ma i odi gibedo mapol. 121Ka kareni oromo ma dong i to ci kibiyiki kacel ki kwarini, ci abimiyo wodi mo ma in kikomi inywalo bedo madit, ci abimoko kere bedo matek. 13En aye bigero ot pi nyinga, an abimoko komkere bedo matwal. 142An abibedo wone, ki en bibedo woda. Kace otimo bal, ci abipwode ki odo pa dano, ki kit goco pa awobe pa dano. 15Ento pe abikwanyo mar mera ma pe loke woko ki ikome, kit mayam akwanyo ki ikom Caulo, mayam aryemo woko ki i nyimani. 163Odi ki keri bimoko inyima nakanaka; ki komkeri bene bimoko matwal.’”

17Natan otito lok magi ducu bot Daudi, ki kit ginanyuta ma onen bote ducu.

Daudi omiyo pwoc bot Rwot

(1 Tek 17:16-27)

18Lacen Daudi ocito obedo piny inyim Rwot i kema ma Rwot bedo iyeni, ci owaco ni, “Ai Rwot Lubanga, an anga, ki oda bene kono gin ango, ma omiyo ikonya nio wa onyooni? 19Ento in pud ibwono kony man ni tidi ki tung boti, ai Rwot Lubanga ibedo kalok ikom dano ma i oda kit ma gibibedo kwede pi kare malac matye anyim, inyutu bota kit ma likwaya bibedo kwede i anyim, ai Rwot Lubanga! 20An Daudi dok abiwaci kit lok ango? In ingeyo an, ai Rwot Lubanga ma an laticini. 21Itiyo gin madit magu ducu pi lubu lok mayam iloko pi mitini keni, wek an latici anen ki wanga. 22In idit mada, ai Rwot Lubanga; pe tye ngat mo macalo in, pe tye Lubanga mo, kono in keken, kit mayam wawinyo ki itwani. 234Rok mene ma iwi lobo marom ki joni jo Icrael, mayam in Lubanga icito ka kokogi ki i opii wek gubed joni wek nyingi oywek pirgi, pi tim madito ma itimo mamiyo lworo, ki pi ryemo rok mukene mapol woko ki inyimgi, kacel ki lubangagi?” 24In ityeko moko lwaki jo Icrael wek gubed joni nakanaka; dok in, ai Rwot, idoko Lubangagi.

25“Ai Rwot Lubanga, kombedi dong imok lok mayam iwaco ikoma ki ikom jo ma i oda matwal, ci dong itim kit ma iwaconi. 26Kumeno dano gibidworo nyingi nakanaka kun kiwaco ni, ‘Rwot Lubanga me mony aye Lubanga maloyo jo Icrael,’ ki wek ot pa latici Daudi omok inyimi matwal. 27Ai Rwot me mony, Lubanga pa Icrael, in aye inyutu tami bota, an latici, kun iwaco ni ibimiyo oda bedo madit; en gin ma omiyo an latici alimo tekcwiny me kelo lega man inyimi. 28Ai Rwot Lubanga, in aye Lubanga, loki bedo me ada, ki in bene dong ityeko cike me timo gin man maber pira. 29Pimeno, alegi ni imii gum ikom jo ma i oda, wek gumede ameda ki bedo ki kica inyimi nakanaka; pien in, ai Rwot Lubanga, ma igwoko cikeni ma dong iwaco, dok pi loki me gum weko ibimiyo likwaya bibedo ki gum nakanaka.”