2 Camuel 6

Daudi ocito kaomo Canduk pa Rwot

(1 Tek 13:1-14; 15:25—16:6,43)

1Daudi dok ocoko lulweny mabeco ma kiyerogi ayera ki ikin jo Icrael ma giromo alip pyere angwen. 21Ci Daudi ocako a ki jone ducu ma gitye kwede, gucito kwedgi wa i Baale-juda kaomo Canduk me Gicike, ma kilwongo ki nying Rwot me mony ma bedo iwi komkere malo ka wi lukerubi. 32 Ka gutingo Canduk iwi gadigadi manyen, ci gukelo woko ki i ot pa Abinadab, ma gange onongo tye iwi gotti, Uja ki Akio, ma gin awobe pa Abinadab, aye gubedo kaleko twoni ma ywayo gadigadi manyeni 4ma gitingo ki Canduk me Gicike, kun Akio aye telo nyime. 5Daudi ki jo me ot pa Icrael ducu gubedo kayare ki myel ki yomcwiny inyim Lubanga ki kero komgi ducu, ki wero wer, ki goyo opuk ki nanga ki ajaa ki bul ki atego me agoyagu.

6Ka guo i laro moyo pa Nakon, ci Uja ocwalo cinge, ogudu kom Canduk me Gicike, omako kome, pien onongo twoni gucato, 7ci kiniga omako Lubanga ikom Uja, oneke woko ki kunu, pien onongo oketo cinge ikom Canduk; ci oto woko ki kunu inget Canduk me Gicike. 8Kiniga omako Daudi pien Rwot otuge ikom Uja; man omiyo kabedonu kilwongo ni Perej-uja nio wa onyo. 9Ci Daudi obedo ki lworo ikom Rwot inino meno; ci owaco ni, “Canduk pa Rwot dong kibitero bota ningning?” 10Kitmeno omiyo Daudi okwero tero Canduk pa Rwot i gang kale; ento ongak kwede woko, otero i ot pa Obed-Edom ma jo Gat. 113 Canduk pa Rwot obedo i ot pa Obed-Edom pi dwe adek; ci Rwot omiyo gum bot Obed-Edom ki jo ma i ode ducu.

Kikelo Canduk me Gicike i Jerucalem

(1 Tek 15:1—16:6)

12Ka kitito loki bot Daudi ni, “Rwot otyeko miyo gum ikom jo ma i ot pa Obed-Edom ki gin ducu matye bote, pi Canduk me Gicike,” ci omiyo Daudi ocito kaomo Canduk ki i ot pa Obed-Edom ci okelo i gang kale ma cwinye yom matek. 13Ka jo ma gutingo Canduk pa Rwot gudako tyen gi ki wot tyen abicel, ci Daudi omiyo gitum me twon ki romo ma ocwe bot Rwot. 14Lacen en ocako myel inyim Rwot ki tipu kome ducu, kun onongo otweyo pyere ki epod me bongo camanini. 15Kitmeno Daudi ki jo me ot pa Icrael ducu gukelo Canduk pa Rwot i Jerucalem ki wayu ki kutu bila.

16Ka canduk pa Rwot obino i gangkal pa Daudi, ci Mikal ma nya pa Caulo obolo wange ki iwang dirica, ci oneno ka Daudi pye kire ki myel inyim Rwot; ci obedo kacaye ki i cwinye. 17Gukelo Canduk pa Rwot wa paco, ci gucibo i kabedone, ma en aye kema ma Daudi oguru pire. Ci Daudi ocako tyero gitum awanga mapol ki gityer lakwe cwiny bene inyim Rwot. 18Ka Daudi otyeko tyero gitum awangagu ki gityer lakwe cwiny, ci olamo gum ikom lwak ki kunu inyim Rwot me mony. 194Lacen Daudi opoko cam bot lwak ducu, pi jo Icrael ducu ma gucoke, co wa ki mon. Dano acel acel kimiye mugati acel, ki ringo ma oceke, ki poki olok mutwo. Ka dong lwak gucako ket, kun ngat acel acel dok i gange.

20Ka Daudi odok cen ipacone wek eleg Rwot olam gum ikom jo ma i ode, Mikal nya pa Caulo okati woko ka jole, ci owaco bote ni, “Rwot me Icrael tin oketo deyo ikome kene ba! Pe tin obumu kome keken iwang angeca magi ducu! Rwot tin obedo macalo ngat mo ma lamalgang ata ma lewic pe mako, ma pe kilworo kun mede ameda ki bumu wa kome bene.” 21Daudi ogamo dog Mikal ni, “An abedo ka myel inyim Rwot, ma oketo an abedo rwot ma ka woru, kun aloyo ode ducu. En oketa abedo laker maloyo jo Icrael, ma lwak pa Rwot. Abimyelo myel ki yomcwiny inyim Rwot. 22An amito abed yot makato man, wek abed gira gin anyerani; ento angeca ma iloko ikomgi ni aye dok gibiketo deyo ikoma makato.”

23Mikal nya pa Caulo pe omedo kinywalo latin mo, nio ka oto.