2 Camuel 5

Daudi odoko rwot me Icrael ki me Juda

(1 Tek 11:1-9; 1 Tek 14:1-7)

1Kaka ducu ma i Icrael gucoke gubino bot Daudi i Kebron, ci guwace ni, “Nen ba, wan aye cogo komi ki ringo komi. 2Ikare ma con ca, ma onongo Caulo aye rwot ma loyowa, in aye mayam itelo wi jo Icrael ka gicito kalweny, ci idwokowa paco bene. Rwot bene nene owaco boti ni, ‘In aye ibibedo lakwar lwaka jo Icrael, dok ibibedo laker ma loyogi.’” 3Kitmeno ludongo pa jo Icrael ducu gubino bot rwot i Kebron. Rwot Daudi oketo gicike kwedgi i Kebron inyim Rwot, ci guwiro Daudi odoko rwot maloyo jo Icrael. 41Daudi ocako loce ma onongo mwaka me dite romo pyere adek, ci obedo kaloc pi mwaka pyere angwen. 5Ci oloyo jo Juda i Kebron pi mwaka abiro ki dwe abicel, ka dok oloyo jo Icrael ki jo Juda ducu ki i Jerucalem pi mwaka pyere adek wiye adek.

Daudi omayo got Cion

(1 Tek 11:4-9)

62

Kare oromo ma Rwot Daudi ki lwake gucito i Jerucalem kalweny ikom jo Jebuc ma gibedo i lobo kunu. Gin onongo guwaco bot Daudi ni, “In pe ibidonyo kany. Ka ibino, ci lungolo ki lutowang aye gibiryemi woko ki cen.” Onongo gutamo ni Daudi pe twero donyo kunu. 7Ento Daudi ocito omayo cel gogo me Cion woko, ci odoko gang kale. 8Inino meno Daudi owaco ni, “Dano ducu ma gimito neko jo Jebuc gudony ki iwang otul pii, ci gucak lweny ikom lungolo ki lutowang ma tipu koma okwerogini.” En gin ma omiyo kiwaco ni, “‘Lutowang ki lungolo pe gibidonyo i ot pa Lubanga.’” 9Daudi ocako bedo i cel gogo kunu, ci olwongo ni, “‘Gang kal pa Daudi.’ Ci Daudi ogero taun madito orumu woko liking cake ki i Millo.” 10Daudi omede odoko dit tutwal, pien onongo Rwot Lubanga me mony tye kwede.

Kiram opwoyo ker pa Daudi

(1 Tek 14:1-2)

11Kiram rwot me Turo ocwalo kwenane bot Daudi kun miyo bao yat cedar, ki lupac bene ki lupaa godi me gero ot pa Daudi. 12Ci man omiyo Daudi oniang ni, “Rwot otyeko moko en me bedo rwot maloyo Icrael, dok ni Rwot omiyo kere obedo ki deyo madwong pi pilo wi jone Icrael.”

Lutino ma Daudi onywalogi i Jerucalem

(1 Tek 3:5-9; 14:3-7)

13Daudi dok omede ki kwanyo mon angeca ki mon anyoma mukene ki i Jerucalem ki ikare madong oa woko ki i Kebron, ci onywalo awobe ki anyira mukene. 14Man aye nying awobe pa Daudi ma onywalogi ki i Jerucalem: Cobab, Natan, Solomon, 15Ibar, Elicua, Nepeg, Japia, 16Elicama, Eliada ki Elipelet.

Daudi oloyo jo Piliciti

(1 Tek 14:8-17)

17Ikare ma jo Piliciti guwinyo ni Daudi dong kityeko wiro ki moo, odoko rwot maloyo jo Icrael, ci gucoke ducu gucito ka yenye; ento ka Daudi owinyo pirgi ci odonyo woko i cel gogo. 18Jo Piliciti gumol gubino ci guket guromo i nota Repaim woko. 19Daudi openyo dog Rwot ni, “Ber acit kalweny ikom jo Piliciti? Ci ibimiyogi i cinga?” Rwot ogamo dog Daudi ni, “Citi, pien abimiyo jo Piliciti i cingi ada.” 20Daudi ocito wa i Baal-perajim, oloyogi ilweny ki kunu, ci owaco ni, “Rwot obaro dye lumeroko woko ki inyima, macalo lalele mucore.” Ma omiyo nying kabedo meno kilwongo ni Baal-perajim. 21Ci jo Piliciti gutenyo cal jogigi kenyo. Daudi ki lwake gutingo gutero woko.

22Jo Piliciti dok gudwogo, gumol guket i nota Repaim ducu. 23Ka Daudi dok openyo dog Rwot, ci Rwot ogamo doge ni, “Pe ibicito atir. Ber icit iman nge monygi ma odong cen ca, wek ipot ikomgi ki kama okemo yadi owak. 24Kace iwinyo woo macalo lwak dano ma gitye ka dore iwi yadi owak, ci irune anyim oyot, nongo Rwot Lubanga dong bitelo nyimwu pi neko mony pa jo Piliciti woko ducu.” 25Ci Daudi otiyo kitmeno kit macalo Rwot ocike kwede, ci oneko jo Piliciti cake ki i Geba o kwede wa i Gejer.