2 Camuel 4

Kit ma kineko kwede Icbocet

1Ka Icbocet wod pa Caulo owinyo ni Abneri dong kineko woko i Kebron, ci kome oto woko lirut, ki cwiny jo Icrael bene obale woko. 2Ikare meno onongo Icbocet tye ki lutel wi buca monye aryo; nying ngat acel Baana ki nying ngat mukene Rekab. Gin ducu awobe pa Rimmon ma jo Benjamin, taun tugi tye i Beerot. Beerot kikwano me bedo ngom me aleya bot jo Benjamin. 3Jo Beerot kikome yam guringo gularo i Gitaim, ci gudoko lubedo kunu nio wa ikare man. 41

Yonacan wod pa Caulo yam tye ki wode mo ma tyene okwe woko. Ikare ma gukelo lok ki i Jejreel ikom gin ma otime ikom Caulo ki Yonacan, onongo en dong dite oromo mwaka abic. Ci lapidine otinge, oringo kwede woko, ci latin opoto woko piny ikare ma en tye kangwec matek, omiyo odoko langolo. Latin meno nyinge Mepibocet.

5Awobe pa Rimmon ma jo Beerot, Rekab ki Baana, gua ci gucito ki i cwiny dyeceng malyeti, gudonyo wa i ot pa Icbocet ikare ma en tye kayweyo i dyeceng. 6Gunongo lagwok dogola ma dako ma obedo ka pyeto nganoni, nino omako wange, ci onino woko; man omiyo Rekab ki omine Baana gulwite gudonyo. 7Ka gudonyo i ot, gunongo Icbocet obutu i ot butune iwi kitandane, ci gucobe, guneke woko, ka gungolo wiye. Gutingo wiye, gulubu kwede yoo Araba i dyewor, 8ci gukelo wi Icbocet bot Daudi i Kebron, ka guwaco bot rwot Daudi ni, “Wi Icbocet wod pa Caulo dong wakelo ene, en wod pa Caulo ma lameroki mayam mito neki. Rwot dong oculu kwori tin, rwotwa, ikom Caulo ki ikom lutinone.” 9Ento Daudi ogamo dog Rekab ki omine Baana, awobe pa Rimmon ma jo Beerot ni, “Macalo Rwot Lubanga tye makwoni, mayam olaro kwona ki i cing lumeroka ducu, 102ikare mayam dano mo obino otita lok ni, ‘Nen ba, Caulo dong oto woko,’ ma onongo en tamo ni ekela lok maber, ci an amake aneke woko i Jiklag; meno aye obedo mot ma amiyo bote pi lok ma en okeloni. 11Ento lok man dong dit makato ducu, kace lutim aranyi dong guneko dano mo ma cwinye leng ki i ode iwi kitandane, ci wutamo ni an pe abiculu kwore ikomwu, atyekowu woko ki iwi lobo?” 12Ci Daudi ociko lutino orobone, ni gunek jonu woko, gungol cinggi, ki tyen gi woko, ka gungab komgi inget kulu me Kebron. Ento gukwanyo wi Icbocet, guyiko ilyel pa Abneri i Kebron.