2 Camuel 3

1Lweny obedo ikin jo me ot pa Caulo ki lwak pa Daudi pi kare malac, kun ker pa Daudi dongo mede ameda ki tek, ento ot pa Caulo jwik ajwika dok kwede piny kun goro bene.

Awobe pa Daudi ma kinywalogi ki i Kebron

2Lutino awobe pa Daudi ma kinywalogi ki i Kebron gin ene: latin kayone aye Ammon, ma mine Akinoam me Jejreel; 3me aryone Kileab, ma mine Abigail dako pa lyeli Nabal me Karmel; me adeke Abcalom, ma mine Maaka ma nya pa Talmai rwot me Gecur; 4me angwene Adoniya, ma mine Kagit; ki me abice Cepatia, ma mine Abital; 5ki me abicele Itream, ma mine Egla. Magi ducu Daudi onywalogi i Kebron.

Abneri oribe ki Daudi

6Ikare ma lweny tye matek ikin ot pa Caulo ki lwak pa Daudi, Abneri onongo tye kamede ki doko dano matek ikin jo ma i ot pa Caulo. 7Onongo Caulo ceng tye ki dako mo ma angecane ma nyinge Rijpa, ma nya pa Aiya, ci Icbocet ma wod pa Caulo ni ocako kelo lok ikom Abneri ni pingo en obutu ki ciwone. 8Kiniga omako Abneri matek pi lok pa Icbocet, ci omiyo en owaco ni, “An aye a gwok pa jo Juda bo? Naka watin pud abedo kanyutu mar madwong ikom ot pa woru Caulo, ki ikom omegine ducu ki lureme ducu, peya amiyi i cing Daudi bene ci tin dong icika pi balo wi dako man! 91Lubanga myero oket can ikoma kitmeno ki makato bene, kace pe acobo kwong mayam Rwot okwongo ikom Daudi, 10pi kwanyo ker woko ki i ot pa Caulo, ki pi moko ker pa Daudi wek oloo Icrael ki Juda ducu, cake wa ki i Dan nio kwede i Beer-ceba.” 11Ci Icbocet pe dok ogamo dog Abneri ki lok mukene, pien obedo ka lwore.

12Abneri ocwalo lukwena bot Daudi i Kebron kun waco bote ni, “Lobo ni mono bibedo ite loc pa anga doki? Ket gicike kweda, ci nen, cinga bidok tung boti pi kelo lobo Icrael ducu boti.” 13Daudi ogamo doge ni, “Meno ber, abiketo gicike kwedi; ento gin mukwongo ma amito ki tung boti tye kit man; in peya ibineno wanga, nio wang ma ikela dakona Mikal nya pa Caulo, bota, ibibino kwede ikare ma ibino ka nena.” 142Daudi dok ocwalo lukwena bot Icbocet wod pa Caulo kun waco ni, “Miya dakona Mikal mayam anyomo ki del kom nyim jo Piliciti me co miya aceli.” 15Ci Icbocet ocwalo dano okwanyo dako woko ki bot cware Paltiel wod pa Laic. 16Paltiel olubu kor dakone kun kok pire nio kwede wa i Bakurim. Ka lacen Abneri ojuke ni odok cen, ci laconu odok cen.

17Abneri ocako yubu lok ki ludongo pa jo Icrael ducu kun waco ni, “Nen, cake wa ikare ma okato ca wubedo ki miti me keto Daudi wek obed rwot ma loyowu. 18Dong wutim ba, pien Rwot yam ociko pi Daudi kun waco ni, ‘Abimiyo latica Daudi aye bilaro jo Icrael ki i cing jo Piliciti wa ki i cing lumerokgi ducu.’” 19Abneri owaco bot jo pa Benjamin bene kitmeno, ci lacen ocito i Kebron katito pire bot Daudi kit lok ducu ma jo Icrael kacel ki jo ducu me ot pa Benjamin gutamo ni ber dong kitim.

20Ka Abneri oo bot Daudi i Kebron ki jo pyere aryo, ci Daudi otedo karama pi Abneri ki jo ma en tye kwedgi ducu. 21Ci Abneri otito bot Daudi ni, “Koni dong amito dok cen, ci abicoko jo Icrael ducu aketogi i cingi, rwoda rwot, wek guket gicikegi kwedi, ka dong i cak loyo lwak ducu kit ma cwinyi mito.” Kitmeno Daudi ocwalo Abneri ocito, kun dok gire ki kuc.

Joab oneko Abneri

22Ki inge wot pa Abneri me dok cen, Joab ki lutic pa Daudi gudwogo ki i mony, gukelo lwak jami mapol ma guyako. Ento onongo Abneri dong pe bot Daudi i Kebron, pien Daudi onongo otyeko cwale ocito woko, ci ocito gire ki kuc. 23Ka Joab odwogo kacel ki lumony ducu ma onongo ocito kwede, ci dano gutito bote ni, “Abneri wod pa Ner obino kany bot rwot, ci rwot Daudi oweko en ocito woko, ocito gire ki kuc.” 24Ci Joab ocito wa bot rwot ka owace ni, “In ibedo kono katimo gin ango? Nen ba, Abneri obino boti, ci pingo icwale odok woko cen, imiyo en dong ocito woko? 25In mono pe ingeyo ni Abneri wod pa Ner obino ka bwoli, wek enen kama icito iye ducu ki gin ducu ma itiyo?”

26Ka Joab oa woko ki inyim Daudi, ci ocwalo lukwena i kor Abneri, gudwogo kwede cen nia ki iwang pii me Cira, ento Daudi onongo pe ongeyo iye lok mo. 27Ka Abneri odwogo cen, oo i Kebron, Joab otere woko cen i dog cel me taun macalo mito lok kwede i mung, ci nen otugi cubu iye kikunu, ci Abneri oto woko cut. Joab oneke pi culu kwor remo pa omine Acael. 28Ka Daudi owinyo pire, ci owaco ni, “An ki kera ducu pe watye ki alii mo wacel inyim Rwot pi to pa Abneri wod pa Ner. 29Aliine opot gire ikom Joab, ki ikom jo me ot pa wone. Ot pa Joab kare ducu pe myero obed labongo dano mo iye ma kome cwer tut, nyo ladobo, nyo dano ma bwoc, nyo dano ma kineko ki pala lucwan, nyo dano ma lakec cam!” 30Joab ki omine Abicai guneko Abneri kitmeno, pien yam en Abneri oneko omin gi Acael i mony ma obedo i Gibeon.

31Daudi dok owaco bot Joab ki lwak ducu ma gitye kwede ni, “Wuyec ginarukawu, wutwe bongo cola i pyerwu, wek wukum inyim Abneri.” Ikare ma kiyiko kom Abneri, Daudi ma rwotni olubu kor kitarane. 32Kiyiko i Kebron, ci rwot Daudi odange ki koko matek iwi lyele, ki lwak ducu bene gukok. 33Daudi okoko Abneri kun waco ni,

“Abneri myero oto kit ma laming to ni mono?

34Badi yam pe kitweyo woko do;

kit ma dano kome wec inyim latim bwami,

in bene komi owec kitmeno do.”

Ci lwak ducu dok gunwoyo koko pi Abneri. 35Lwak ducu gubino ka bito Daudi wek ocam kwon ma piny pud dyeceng, ento Daudi okwongo kwong kun waco ni, “Lubanga myero oket can ikoma kitmeno ki makato bene, kace abilo kwon mo ma ceng peya opoto!” 36Ci lwak guniang lok ma i cwinye, omiyo cwinygi okwe; pien kit gin ducu ma rwot Daudi obedo katiyo oyomo cwiny lwak ducu.

37Kitmeno omiyo lwak ducu guniang inino meno ni pe rwot aye ma omiyo ni kinek Abneri wod pa Ner. 38Ci rwot Daudi dok owaco, bot lutice ni, “Wun pe wungeyo ni oteka madit ma lawimony dong oto woko tin ki i Icrael? 39An adoko nyap woko ikare man, kadi an rwot ma kiwiro. Awobe pa Jeruya gin aye guketa i peko man. Rwot aye myero ocul kwor ikom latim marac muporo kit bwamine!”