2 Camuel 2

Daudi odoko rwot me Juda

1Lacen Daudi openyo dog Rwot ni, “An dong acit abed i taun mo matye i Juda?” Ci Rwot ogamo ni, “Citi” Daudi dok openye ni, “Abicito i taun mene?” Ci Rwot owace ni, “I Kebron.” 21Ci Daudi ocito i Kebron, ki mone magi aryo, Akinoam me Jejreel ki Abigail mayam dako pa lyeli Nabal me Karmel. 3En bene otero jone mayam gitye kwede kunu, kun tero dano acel acel ki jo ma i ode ducu; ci gin ducu gubedo i taun me Kebron. 42Ci jo Juda gucito kunu, ka guwiro Daudi me bedo rwotgi ma en loyo jo me ot pa Juda.

Ka gitye kunu kitito bot Daudi ni, “Jo me Jabec-gilead aye guyiko kom Caulo,” 5ci Daudi ocwalo lukwena bot jo me Jabec-gilead, kun waco botgi ni, “Rwot omii gume opot ikomwu, pien wunyutu mar madwong ikom laditwu Caulo, pi yiko kome. 6Kombedi Rwot dong onyut botwu mar mere ma pe loke, ki ma geneni! An bene abitimowu maber pi kit tim man ma wutimoni. 7Dong ber wujing komwu, wek wubed jo ma gitek dok pe gilworo lweny, kadi bed ni laditwu Caulo dong oto woko, ci nen jo Juda dong gutyeko wiro an me bedo rwotgi.”

Icbocet odoko rwot me Icrael

8Ikare meno Abneri wod pa Ner, ma lawimony pa Caulo, okwanyo Icbocet wod pa Caulo otero i Makanaim, 9ci okete me bedo rwot maloyo lobo Gilead, Acer, Jejreel, Epraim ki Benjamin wa lobo me Icrael ducu. 10Icbocet wod pa Caulo onongo mwaka me dite oromo pyere angwen ma en cako kwede loyo jo Icrael, ci oloyogi pi mwaka aryo. Ento jo me ot pa Juda gubedo ite loc pa Daudi. 11Kare ma Daudi obedo kwede rwot kun loyo ot pa Juda i Kebron oromo mwaka abiro ki dwe abicel.

Lweny ikin jo Icrael ki jo Juda

12Abneri wod pa Ner ki lutic pa Icbocet wod pa Caulo gua ki i Makanaim gucito i Gibeon. 13Ki Joab wod pa Jeruya ki lutic pa Daudi gucito gurwate kwedgi i kut me Gibeon, ci gubedo piny, kun ngat acel bedo loka kut tungcel ki ngat acel bene bedo loka kut tungcel. 14Ci Abneri owaco bot Joab ni, “Wek kong lutino orobo gua malo, ci gutuk i nyimwa.” Joab ogamo ni, “Wek gua malo do.” 15Ci gua gukato loka tungcel kun kikwano welgi, jo apar wiye aryo ma tung bot Benjamin ki Icbocet wod pa Caulo, ki lutic pa Daudi bene apar wiye aryo. 16Ci ngat acel acel ocako mako wi lakwore, ka cobo bute pil ki pala lucwan, ka gin ducu gurwomo poto piny lawangacel; omiyo kabedo meno kilwongo ni Kelkat-ajurim,3 matye i Gibeon. 17Ci lwenye obedo gwar matek inino meno; lutic pa Daudi guloyo lwak pa Abneri ki jo Icrael woko.

18Awobe pa Jeruya adek ducu onongo gitye kunu, Joab, Abicai ki Acael. Onongo Acael dwir calo til ma i tim. 19En oryemo kor Abneri, kun ringo kemo en atir, pe loke tung acuc nyo tung acam. 20Ka Abneri oloke oneno yo ngeye, ci owace ni, “Meno in Acael?” Ci en ogamo ni, “Meno an,” 21Ci Abneri dok ocike ni, “Ai loke idok tung acuc nyo tung acam, wek imak latin orobo mo ci iyak jamine.” Ento Acael pe oye weko kore. 22Abneri dok onwoyo ciko Acael ni, “Ai loke idok kamukene, pe ibed kalubu kora. Lok ango mamiyo acubu in areti woko piny? Ka aneki woko ci abiilo wanga malo me neno wang omeru Joab ningning?” 23Ento Acael pe oye weko kore, omiyo Abneri ocubu iye ki dim tong, ci dim otucu wa ingeye pil! Acael otugi poto kenyo, ci oto ki kakenyo bene. Dano ducu ma guo i kabedo kama Acael oto iyeni, gubino ci gicung mot laling.

24Ento Joab ki Abicai gubedo karyemo kor Abneri; guo wa i got Amma ikare ma ceng dong mito poto. Got meno onongo orine tung Gia, i yoo ma cito i tim me lobo Gibeon. 25Ci jo pa Benjamin gucoke kacel i kor Abneri, gudoko buca mony acel, ci gucung wa iwi got kunu. 26Ki kunu Abneri ocako lwongo Joab kun waco ni, “Pala lucwan mono bibedo kacamo dano nakanaka ce? Pe ingeyo ni agikine bibedo rac mukato kare? In ibiryemo korwa pi kare marom mene ka wek dong ijuk lwaki guwek ryemo kor omegigi?” 27Joab okwonge ni, “Macalo Rwot Lubanga tye makwoni, kono pe iwaco dogi, kono lwak guryemo kor omegigi nio kwede wa diki odiko.” 28Ci Joab okutu tume, ci lwake gucung woko cut, pe dok gumede ki lubu kor jo Icrael, kadi wa lweny bene dong otugi gik woko kumeno.

29Abneri ki jone gucako wot i dyewor meno kun giwoto dyewor benebene, kun giwok ki i Araba, ka gungolo kwede kulu Jordan, guwoto nakanaka cake odiko nio wa dyeceng ci guo kwede i Makanaim.

30Joab oweko lubu kor Abneri, odok woko cen. Ka ocoko lwak ogurugi kacel, ci gunongo ni lutic pa Daudi madong wanggi orwenyo woko giromo apar wiye angwen, ka pe kikwano iye Acael. 31Ento lutic pa Daudi onongo guneko jo Benjamin ma gin aye lwak pa Abneri maromo dano miya adek ki pyere abicel. 32Joab ki jone gutingo kom Acael, guyiko i lyel pa wone ma onongo tye i Beterekem. Ka gudwogo ki kunu, guwoto dyewor benebene, nio ka piny oru botgi wa i Kebron.