2 Camuel 1

Daudi owinyo pi to pa Caulo

1Inge to pa Caulo en aye obedo kare ma Daudi bene odwogo kwede kacel ki lwak jone ma gucito kaneko jo Amalek. Ci Daudi odike nino aryo i Jiklag. 2Inino me adeke laco mo obino kun oa ki i gony pa Caulo, ma bongone bene oyec woko, wiye bene ojuku ki ngom. Ka obino bot Daudi, ci oryebe piny, owore. 3Daudi openye ni, “Ia ki kwene?” Ci en ogamo ni, “An abwot ki i gony pa jo Icrael.” 4Daudi dok openye ni, “Ci dong kunu tye ningning? Tita.” Dok en ogamo ni, “Dano guringo woko ki i dog lweny, ci kineko lwak jo mapol, ma kiradogi woko piny; Caulo ki wode Yonacan bene guto.” 5Daudi dok openyo awobi ma otite loki ni, “In kono ingeyo ningning ni Caulo ki wode Yonacan bene guto woko?” 61Awobinu ogamo ni, “Onongo atye kunu iwi got Gilboa ci acob ikom Caulo ma ojenge ki tonge, kun gadigadi lweny pa lumeroke ki wegi aguraguragi bene giringo ma gudingo kore adada. 7Ka Caulo obolo wange ingeye, ci onena, ci olwonga. An agamo doge ni, ‘An atye ene.’ 8Ci rwot Caulo openya ni, ‘In anga?’ Ci an agamo ni, ‘An jo Amalek.’ 9Ci dok owaca ni, ‘Cung kangeta, wek icuda woko, pien to dong wango koma awanga, ento nen pud akwo.’ 10Ci acung kangete, acude woko, pien onongo dong aniang ni pe dong twero bedo kwo madong opoto woko pinyi. Ci akwanyo lalukana ma onongo tye i wiye, ki ogul matye i ngut cinge, dong akelogi boti, ladita, gin ene.”

11Daudi ocako mako bongine kene, ci oyecogi woko pi cwercwiny ma omake. Ci jo ma gitye kwede bene gutimo kitmeno. 12Gubedo kakumu ki koko ki rii kec pi Caulo ki pi Yonacan, ki pi lwak jo pa Rwot ki pi jo me ot pa Icrael ducu, gukok nio wa otyeno, pien kityekogi woko ki pala lucwan. 13Daudi dok owaco kuman bot awobi ma otite loki ni, “In mono ia ki kwene?” Ci en ogamo ni, “An latin pa labedo mo ma jo Amalek.” 14Ka Daudi dok owace ni, “Pingo pe kong i lworo tingo cingi pi neko dano ma Rwot owiro?” 15Ci Daudi olwongo ngat acel ikin awobe orobone, kun wace ni, “Cit ipot ikome.” Ci oneko woko. 16Daudi dok owaco bot La-amalek ni, “Remoni aliine bedo iwii, pien dogi aye okelo lok ikomi kun in giri iwaco ni, ‘Aneko dano ma Rwot owironi.’”

Daudi okoko Caulo ki Yonacan

17Daudi okoko Caulo ki wode Yonacan ki wer man me koko, 182ci owaco ni, myero kipwony ki jo Juda. Loke kicoyo wa i buk pa Jacar. En owero wer me koko ni,

19“Icrael do, deyoni kibalo woko iwi cere mutinge!

Twoni oteka lweny dong gupoto woko kuman!

20Pe itit pire i Gat,

pe ituc pire i yoo me Acikelon;

miyo anyira pa jo Piliciti gium kwede,

miyo anyira pa jo ma pe gingeyo Lubanga giwake.

21Wun godi me Gilboa,

toyo pe obed ikomwu,

kot pe dong myero ocwer i cerewu!

Pien kwot pa otekawa olanye kunu,

kwot pa Caulo pe dong kijwayo ki moo.

22Atum pa Yonacan pe yam dwogo paco

ma pe ooyo remo pa dano.

Pala lucwan pa Caulo yam pe dwogo nono

ma pe onywane ki moo kom oteka.

23Caulo ki Yonacan luyomcwiny dano, jo ma kimaro!

Ikare me kwo ki ikare me to gin pe gupoke.

Gin ludwiro makato ocur, gubedo lutekkom makato labwor.

24Wun anyira me Icrael, wukok Caulo ba,

en mayam rukuwu ki bongo makwar, ma deyo ginarukawu ki jabu.

25Twoni oteka lweny gupoto woko kuman ki i dye mony!

Yonacan kineko opoto piny iwi cere mutinge.

26Omera Yonacan, piny orem

kweda woko ikomi do!

Mar meri ikoma yam obedo me aura,

kato mar pa dako woko.

27Twoni oteka lweny guto woko kuman!

Jami lwenygi kitenyo woko ata.”