1 Camuel 31

To pa Caulo ki awobene

(1 Tek 10:1-12)

1Ikare meno jo Piliciti gulwenyo ikom jo Icrael. Ci jo Icrael guringo woko ki inyim jo Piliciti, dok kinekogi iwi got Gilboa. 2Jo Piliciti guringo gudingo kor Caulo ki awobene, ci guneko Yonacan, Abinadab ki Malkicua, ma gin ducu awobe pa Caulo. 3Lweny ogeto matek kama Caulo onongo tye iye, ci wegi atero gucele woko, guketo ret ikome marac adada. 4Caulo owaco bot lating jami lwenye ni, “Wot pala lucwani woko, icoba kwede pil, wek jo ma pe kilirogini, ma gin pe ngeyo Lubanga, pe gubin ikoma gucoba, miyo giwuc ikoma.” Ento lating jami lwenye pe oye, pien lworo omake matek, omiyo Caulo okwanyo pala lucwane kikome opoto ogure kwede kekene. 5Ka lating jami lweny oneno ni Caulo dong oto, en bene opoto ogure kekene ki pala lucwane, ci en onywako to ki Caulo kacel. 6Kitmeno Caulo ki awobene adeki, ki lating jami lwenye, ki lwake ducu guto woko lawangacel inino acel. 7Ka jo Icrael ma onongo gitye loka nota tungcel, ki jo mukene ma onongo gitye loka Jordan, guneno ni mony pa jo Icrael guringo woko, dok ni Caulo ki awobene kinekogi woko, ci guringo guweko taun gi ducu woko; ci jo Piliciti gubino gucako bedo i taun magu ducu.

8Orwone jo Piliciti gupuk odiko ka lunyu bongi ki ikom jo ma kinekogi, ci gunongo kom Caulo ki kom awobene adeki ikom got Gilboa. 9Gungolo wi Caulo woko, ka gulunyo jami lwenye ki ikome, ci gucwalo kwena oromo i lobo pa jo Piliciti ducu, pi tero lok me yomcwiny bot jogigi ki bot lwakgi ducu. 10Guketo jami lweny pa Caulo i ot pa jokgi ma dako ma kilwongo ni Acitarot, ka dok guguru kome ikom cel murumu taun madit me Bet-can. 11Ento ka jo ma gibedo i Jabec-gilead guwinyo gin ma jo Piliciti gutimo ikom Caulo, 12ci oteka lwenygi ducu gua, gucito guwoto dyewor benebene, gukwanyo kom Caulo ki kom awobene woko, ki ikom cel me Bet-can, guo kwedgi wa i Jabec, ci guwango komgi woko kunu. 13Lacen gukwanyo cogogi, guyiko ite yat ananga matye i Jabec, ci gurii kec pi nino abiro.