1 Camuel 30

Daudi oloyo jo Amalek

1Daudi ki jone guo i Jiklag inino me adeke, ci gunongo jo Amalek gumonyo Negeb ki Jiklag. Guloyo Jiklag woko, guwango woko ki mac, 2dok guyako mon ducu ki jami ducu matye kunu, wa dano ducu matino ki madito. Pe guneko dano mo gire, ento guterogi makwo, gucito kwedgi woko. 3Ka Daudi ki jone guo i taun ci gunongo tye kawang awanga, dok mon gi ki awobegi ki anyiragi ducu kiterogi woko. 4Daudi ki jone guwoo ki koko, nio ka tek me koko otum woko. 51Mon pa Daudi aryoni bene kiterogi woko, Akinoam me Jejreel ki Abigail me Karmel, dako pa lyeli Nabal. 6Piny oloyo Daudi woko matek, pien jone bene gubedo kalok pi cele woko ki got, pien cwinygi ducu obedo kec matek kun dano acel acel tamo pi awobene ki anyirane. Ento Daudi olimo tekcwiny ki bot Rwot Lubangane. 72

Daudi owaco bot ajwaka Abiatar wod pa Akimelek ni, “Kela epod.” Ci okelo bot Daudi. 8Ci Daudi openyo dog Rwot ni, “Aryem kor mony man? Abimakogi woko i yoo?” Rwot odoke iye ni, “Ryem korgi, pien ibimakogi woko i yoo ada, dok ibilaro jowu.”

9Daudi ocako wot ki jone miya abiceli kacel kwede. Ka guo i kulu Becor, ci jo ma dong guol ma pe gitwero ngolo kulu gudong kenyo, gubedo iye. 10Ento Daudi omede ka ryemo kor jo Amalek ki jone miya angwen kacel kwede, kun jo miya aryo ma komgi oloc, ma ngolo kulu oloyogi gudong cen.

11Gunongo Laejipt mo i dye bar ci gukele bot Daudi. Gucako miye mugati ocamo, ka kimiye pii amata omato, 12ka dok gumiye nucu pok otini mutwone ki tuga olok aryo mutwone. Ka dong otyeko cam ci cwinye odwogo; pien onongo pe ocamo cam mo kadi wa pii bene pe omato pi nino adek dyeceng ki dyewor. 13Lacen Daudi ocako penye ni, “In kono i dano pa anga? Ia ki kwene?” En ogamo ni, “An wod jo Ejipt, latic pa La-amalek mo. Ladita otenya woko ata, pien onongo two aye omaka, ma arii kwede nino adek ma okatoni. 14Wan wamonyo Negeb pa jo Keret, ki pa jo Juda, ki Negeb pa jo Kaleb, ka dok wawango Jiklag woko.” 15Daudi openye ni, “In ibitera bot mony meno?” Awobinu ogamo ni, “Kong i kwonga kwong ki nying Lubanga kun iwaco ni pe ibineka, dok pe ibidwoka i cing ladita, ci abiteri bot monygi.”

16Ci awobinu otero Daudi kunu, ikare ma guo ikabedo meno ononogi guket woko ata i kabedo meno ducu kun gicamo, gimate ki myelgu, ma cwinygi yom pi lwak jami ma guyako madwong ki i lobo pa jo Piliciti ki i lobo Juda. 17Ci Daudi opoto ikomgi kwarpiny, olwenyo kwedgi nio wa otyeno. Dano mo ki ikin gi pe ma obwot makwo, kono nyo awobe miya angwen ma guito wi kinagagi, ci guringo kwede woko. 18Daudi oyako gin ducu ma jo Amalek onongo guyako, ci olaro bene mone aryo ducu. 19Gin mo peke ma orwenyo kadi wa gin matidi nyo madite; awobe ducu wa anyira ducu ki jami ma guyako ducu, ki gin mo keken ma jonu gutero, Daudi odwokogi ducu cen. 20Daudi omayo wa dyegi ki romi ki dyangi ducu, ci jone guleko lim meno ducu inyimgi kun giwaco ni, “Man aye lim ma Daudi oyako.”

21Ka Daudi odwogo bot jo miya aryoni mayam komgi oloc woko ma pe dong gitwero lubu kore, ma onongo kiwekogi i dog kulu Becorni, ci jo meno gukato kajolo Daudi ki lwak ma gucito kwedeni. Ka Daudi onyiko cok, en bene omotogi. 22Ci jo maracu ducu ki lutim aranyi ma ikin lwak ma gucito ki Daudi guwaco ni, “Joni pe gucito kwedwa, pieno wan pe wabimiyogi gin mo ikom jami ma wayako wadwogo kwedeni. Wek dano acel acel oter dakone ki lutinone ci guciti.” 23Ento Daudi ogamo ni, “Pe wubitimo kitmeno utmegina, ikom gin ma Rwot omiyo botwa. Pien Rwot aye obedo ka gwokowa, ci otingo mony ma gubino kamonyowa, omiyogi i cingwa. 24Anga matwero ye lokwu ikom lok man? Kit ma kipoko ki jami bot dano ma ocito i monyi, kibipoko bot dano ma gudong ka gwoko jami bene kitmeno. Kibipoko bot dano ducu marom.” 25Meno odoko cik matwal cake ikare meno, ma jo Icrael gibedo kalubu nio wa onyo.

26Ka Daudi odwogo i Jiklag, ci ocwalo dul jami ma kiyakoni bot lureme ma gin ludongo pa jo Juda kun waco ni, “Motwu ene ma wayako ki bot lumerok pa Rwot.” 27Ocwalo jami pi jo ma i Betel, ki i Ramot ma i Negeb, i Jatir, 28i Aroer, i Cipmot, i Ectemoa, 29ki i Rakal, bot jo ma bedo i taun pa jo Jeramel ki pa jo Kenit, 30bot jo ma i Korma, Boracan, Atak, 31Kebron ki i lwak kabedo ducu mayam Daudi ki jone gubedo kawire iye.