1 Camuel 29

Jo Piliciti gukwero Daudi woko

1Jo Piliciti gucoko monygi ducu i Apek; ki jo Icrael gutongo gonygi inget wang it matye i Jejreel. 2Rwodi abic pa jo Piliciti gumol gukato ki monygi miya ki miya dok ki alip ki alip, ki Daudi ki jone bene gumol gukato lacen kacel ki Akic. 3Ludito mony pa jo Piliciti gupenyo ni, “Jo Ibru gitye katimo gin ango kany?” Akic ogamo doggi kun waco ni, “Man aye Daudi mayam latic pa Caulo rwot me Icrael. En dong otyeko bedo kweda pi kare malac mada. Cake ki inino ma oringo olaro bota nio kwede wa onyo peya anongo roc mo ikome.” 4Ento ludito mony pa jo Piliciti gubedo ki kiniga ikom Akic; guwace ni, “Cwal laco meno odok paco. Myero en odok cen i taun mayam imiyo bote. En pe bicito kwedwa i mony, miyo en biloke doko lamerokwa ki kunu. Ka nyeri mito dok ribe ki ladite, pe itamo ni en bineko jowa woko, ci coko wigi tero bote? 51Man aye Daudi kikome, mayam kiwero kun mon gimyelo kwede ma kiwero ni, ‘Caulo oneko mere dano alip, ento Daudi oneko alip apar.’”

6Ci Akic olwongo Daudi, owaco bote ni, “Macalo Rwot tye makwoni in ibedo dano ma ageno. An aneno ni ber iwot kacel kwedwa i mony, pien pe anongo gin mo marac ikomi cake ki inino ma ibino iye bota nio wa onyo. Ento rwodi mukene pe gujoli. 7Pieno ber itugi dok cen cut. Dok cen ki kuc, wek pe imii cwiny rwodi pa Lupiliciti obed ka cwer.” 8Ci Daudi owaco bot Akic ni, “Ento an atimo gin ango? Gin ango ma inongo ikoma ladita, cake wa inino ma adonyo kwede i dog tici nio koni, mamiyo pe acito kalweny ki lumeroki, rwoda ma rwot?” 9Ci Akic dok omedo dok iye ki Daudi ni, “Angeyo maber ni bal mo peke ikomi; ki inyima in icalo lamalaika pa Lubanga. Ento ludito monywa gutyeko waco ni, in pe ibicito kwedwa i mony. 10Kombedi dong itugi a ki odikoni, kacel ki joni ma iloyogi ma gubino kwedi. Cak wot ki i odikoni, a woko ki kany oyotoyot teke piny leng maromo wot.” 11Daudi ocako a woko odiko con ki jone, ci odok i lobo pa jo Piliciti. Ento jo Piliciti gucito i Jejreel.