1 Camuel 28

1Ikare meno jo Piliciti guoto monygi pi lweny ikom jo Icrael. Akic owaco bot Daudi ni, “Ber inge ni in ki joni wubicito kamony kacel kwedwa.” 2Daudi ogamo dog Akic ni, “Ber matek, ladita, dong ibingeyo gin ma atwero tiyone.” Akic dok owaco bot Daudi ni, “Abiketi ibedo lagwok kwona matwal.”

Caulo olimo ajwaka lakor tipu i En-dor

31

Ikare meno onongo Camuel dong oto woko. Jo Icrael ducu gukumu pire ci guyike i taun me Rama i gange kikome. Caulo onongo dong oryemo lukor tipu ki megi jogi woko ki i lobone.

4Jo Piliciti gucoke ci gutongo gonygi i Cunem, Caulo bene ocoko jo Icrael ducu ci gin gutongo gonygi i Gilboa. 5Ka Caulo oneno mony pa jo Piliciti, ci obedo ki lworo, cwinye ocako myel matek. 62Ka Caulo openyo dog Rwot, ci Rwot pe odoke iye lok mo, kadi wa ki lekgu, nyo ki Urim, nyo ki lok pa lunebi. 7Ci Caulo owaco bot lutice ni, “Kong wuyenya dako mo ma lakor tipu, wek acit bote, apeny doge.” Lutice guwace ni, “Lakor tipu tye wa i En-dor.”

8Caulo oloko kit ruke woko mapat, pien oruku ginaruka mapat, ci ocako wot ki jone aryo. Gucito guo bot dakonu dyewor. Ci Caulo owaco bote ni, “Ber ikora tipu, ci mi jokki okela dano mo ma abitucu nyinge boti.” 9Dako meno ogamo doge ni, “Ingeyo gin ma Caulo otiyo, kit ma oryemo kwede lukor tipu ki megi jogigu woko ki i lobone. Pingo in dok ibino ka cika ki owic me maka wek kineka woko?” 10Ento Caulo okwongo kwong bote ki nying Rwot kun waco ni, “Macalo Rwot tye makwoni, pe can mo bipoto ikomi pi lok man.” 11Ci dako meno ogamo ni, “Abilwongo anga boti?” Ci Caulo ogamo ni, “Lwonga Camuel.” 12Ka dako meno oneno kom Camuel, ci odange ki dwon matek, owaco bot Caulo ni, “Ibwola pingo? In i Caulo kikome.” 13Ento Caulo owaco bot dakonu ni, “Pe ibed ki lworo. Ineno kom ango ka?” Dakonu ogamo ni, “Aneno tipu mo tye kabino kun kati a ki piny i ngom.” 14Caulo dok openyo ni, “Kite nen ningning mono?” Ci dakonu ogamo ni, “Dano ma otii aye tye kabino; ma oumu kome woko ki jor.” Ci Caulo oniang ni en aye Camuel kikome, ci okulu wiye piny oryebe inyime.

15Ci Camuel ocako lok ki Caulo kun waco ni, “Pingo iyela kit man me dwoka dok woko?” Ci Caulo ogamo ni, “Can aye tye odiya matek; pien jo Piliciti gitye kalweny ikoma. Lubanga bene otenya woko ata. Pe dong waca kit lok mo, kadi wa lok pa lunebi, kadi wa lekgu dong peke. En aye omiyo alwongi wek itita gin ma myero atim.” 16Ci Camuel ogamo ni, “Pingo dok ipenyo an ma Rwot dong oweki wokoni, kun en dong odoko lameroki? 173Rwot dong otimo ikomi kit mayam ocika kwede ci an bene atito loke boti wa con ca. Rwot dong oyeco keri woko okwanyo ki i cingi, ci dong otyeko miyone woko bot lawoti, en aye Daudi. 184In yam pe iworo dog Rwot, pe icobo kiniga magwa pa Rwot ikom jo Amalek; en aye gin ma omiyo Rwot tye katimi kit man ikareni. 19Rwot bimiyo jo Icrael ki in bene i cing jo Piliciti; diki in ki awobeni wubibedo kacel kweda. Rwot bimiyo mony pa jo Icrael i cing jo Piliciti.”

20Caulo otugi poto woko piny i ngom, ci obutu piny libat pi lworo ma omake matek pi lok pa Camuel. Tipu kome oto woko lirut, pien onongo pe ocamo cam mo i dyeceng ki dyewor meno ducu. 21Dako meno ocito bot Caulo cok, ci oneno kit ma kome dong obange woko, ci owaco bote ni, “Nen ba ladit, an dong awinyo dogi, adyero pi kwona woko pi timo gin ma iwaca. 22In bene, ladit, dong iwiny doga. Wek kong aket latin cam mo inyimi icam, ka wek dok ilim kero pi wotwu.” 23Ento Caulo okwero woko kun waco ni, “Pe abicam.” Ento lutice gubako doggi bote kacel ki dako meno, ci owinyo lokgi, ocako a malo ki i ngom obedo iwi kitanda. 24Dako meno onongo tye ki latin roya mo ma opito ocwe. Ocako nekone woko oyotoyot, ka ojobo moko kwon, onywango, otedo mugati ma tobi pe iye. 25Ci oketo cam inyim Caulo ki lutice ci gin gucamo, ka gua woko i dyewor meno gucito.