1 Camuel 27

Daudi obedo ikin jo Piliciti

1Daudi olwodo lok ki i cwinye ni, “An ba, olo Caulo biketo cinge ikoma inino mo keken ci neka woko cut. Pieno gin maber ma omyero atim en aye me lwi woko me cito wa i lobo pa jo Piliciti; ci cwiny Caulo bia woko ikoma, pe dong biyenya ki iwang lobo pa jo Icrael, miyo abilaro kwona ki i cinge.” 2Daudi ocako a woko ki kunu, en ki jone miya abicel ma onongo gitye bote, ci gucito bot Akic wod pa Maok, rwot me Gat. 3Daudi obedo ki Akic i Gat, en ki lwake ducu, kun dano acel acel ocito ki jo me ode. Daudi onongo otero mone aryo, Akinoam me Jejreel ki Abigail me Karmel, mayam obedo dako pa lyeli Nabal. 4Ka kitito bot Caulo ni Daudi dong oringo woko wa i Gat, ci pe dok obedo kayenyo kore matwal.

5Daudi dok owaco bot Akic ni, “Ka bedona boti oyomo cwinyi, ci wek kimiya kabedo mo ma ikin taun ma i loboni wek abed iye kunu. Pingo an latici abedo kwedi kacel i gang kali?” 6Ci Akic omiyo ki Daudi Jiklag, ma omiyo Jiklag odoko gang pa luker me Juda nio wa onyo. 7Kare ma Daudi obedo kwede i lobo pa jo Piliciti oromo mwaka acel ki dwe angwen.

8Ikare meno Daudi, ki jone gubedo kapoto mony ikom jo Gecur, jo Girij ki jo Amalek ma gin aye wegi lobo kunu cake wa con, guo kwede i Cur wa ki i Ejipt. 9Ka Daudi omonyo lobo mo, en pe weko laco mo kadi dako mo ma dong makwo. Ci yako romi, dyangi, kana, kinaga wa ki bongi ka dwogo kwede bot Akic. 10Kare ducu ka Akic openyo Daudi ni, “Tin icito kamonyo jo mene?” Ci Daudi gamo ni, “Kamonyo lobo Negeb matye i lobo Juda,” nyo ni, “Alwenyo ikom Negeb pa jo Jeramel,” nyo ni, “Amonyo Negeb pa jo Kenit.” 11Daudi pe oweko laco mo nyo dako mo obwot makwo, pien onongo olworo ni, gin bitito lok ma ikomwa, ni, “Daudi otimo gin ma onyo.” Meno aye obedo kite ikare ma obedo kwede i lobo pa jo Piliciti. 12Akic obedo kageno Daudi kun tamo ni, “Jo tugi dong gidage matek tutwal, pieno en dong bibedo latica matwal.”