1 Camuel 26

Daudi oweko Caulo obwot tyen me aryone

11

Jo Jip dok gubino bot Caulo i Gibea, guwaco bote ni, “Daudi tye okane iwi got Kakila i Jecimon.” 2Caulo oa ocito i tim Jip ki mony pa jo Icrael ma kiyerogi maromo alip adek; gucito kayenyo Daudi i tim Jip. 3Caulo ogony iwi got Kakila matye inget gudo i Jecimon; ento onongo Daudi tye mere i tim. Ka oneno Caulo olubu kore wa i tim, 4ci Daudi ocwalo lurotpiny kunu, ci gumoko atir ni Caulo obino ada. 5Daudi oa obino i kabedo kama Caulo ogony iye, oneno kabedo ma Caulo obutu iye kacel ki Abneri wod pa Ner ma ladit maloyo monye. Caulo onongo obutu i kabedo ma kigengo ngete, kun mony ogure dyere.

6Ci Daudi owaco bot Akimelek ma Lakit, ki Abicai ma omin Joab wod pa Jeruya ni, “Anga ma bicito kacel kweda i gony bot Caulo?” Abicai ogamo; “An aye abicito kacel kwedi.” 7Daudi ki Abicai gucito i gony pa Caulo inino meno. Caulo onongo obutu i kabedo ma kigengo ngete, ki tonge ocung kangete ma kiguro i ngom. Abneri ki lumony gubutu gugure dyere. 8Abicai owaco bot Daudi ni, “Tin Lubanga omiyo lameroki i cing. Wek dong aneke woko kombedi kun agure woko ki tong pil wa i ngom kicel keken; pe abicobo tyen aryo.” 9Ento Daudi owaco bot Abicai ni, “Wek nekone obedi. Anga matwero keto cinge ikom dano ma Rwot owiro ci pe bitingo alii?” 10Dok owaco ni, “Kit macalo Rwot tye makwoni, Rwot aye bipwode gire; nyo ka nino me tone biromo, nyo bicito i mony kamo, ci to ki kunu. 112Rwot pe ye ni aket cinga ikom dano ma en owiro. Ento ber waput tonge matye ka wiyeni, ki opoko piine, wek wacit woko.” 12Kitmeno Daudi ocako putu tong pa Caulo, ka otingo opoko piine ma onongo tye ka wiye, ci gucito woko. Dano mo pe onenogi nyo ongeyo gin ma otime, ngat mo bene pe oco ki iwang nino; pien gin ducu gunino woko ki nino mapek ma oa ki bot Rwot.

13Daudi obaro dye nota, okato tungcel, ci ocung ki kamabor iwi got, ma kin gi lac. 14Ci Daudi ocako lwongo mony pa Caulo ki Abneri wod pa Ner kun waco ni, “Abneri, pe igamo doga ce?” Abneri ogamo ni, “In anga ma ilwongo rwotni?” 15Daudi owaco bot Abner, “Pe in laco ce? Anga marom kwedi i Icrael? Ci pingo pe ibedo ka gwoko laditi ma rwotni? Pien dano mo obino wa botwu ka neko rwodi woko ki ikinwu. 16Gin ma itimoni pe ber wa ki acel. Macalo Rwot tye makwoni, myero kineki woko, pien pe ibedo ka gwoko laditi, ma en aye dano ma Rwot owiro. Kombedi dong inen kama tong pa rwot tye iye, ki opoko piine ma onongo tye ka wiyeni!”

17Caulo ongeyo dwon Daudi woko ci owaco ni, “Man aye dwoni, Daudi, latina?” Daudi ogamo ni, “Eyo, meno aye dwona rwoda.” 18Daudi dok owaco ni; “Pingo ibedo kalubu kora, ladita? An mono atimo gin ango? Atingo kit alii ango? 19Kombedi dong iwiny loka, ladita. Kace Rwot aye opiyo in ikoma, ci wek en ogam tyeri, ento ka dano aye gupiyo in, ci wek kicengi woko ki inyim Rwot, pien gutyeko ryema woko wek pe anywak bedo kwedgi i lobo ma Rwot omiyo botwa me aleyani, kun gin waco ni, ‘Cit woko wek itii ki lubanga mukenegu.’ 20Kombedi pe iwek remona oony i ngom i lobo pa lurok kamabor ki inyim Rwot; pien rwot me Icrael obino kalubu kor ladep acel, macalo dano ma dwaro anyeri ikin godi.”

21Caulo dok ogamo ni, “Atimo rac, dong idwog cen, Daudi latina, pe dong abitimi rac matwal, pien kwona tin obedo me wel inyimi. Nen, abedo kanyutu mingona, omiyo angak kamabor tutwal.” 22Daudi ogamo ni, “Tongi dong enu, rwot! Wek ngat acel ki ikin awobeni obin kany ka omone. 23Rwot culu dano ki acel acel kit ma cwinye atir kwede ki ma lubu kit gene; pien tin dong Rwot omiyo in i cinga, ci an pe atingo cinga aketo ikomi pien in i dano ma Rwot owiro. 24Kit macalo tin kwoni obedo me wel inyimani, kitmeno kwona bene myero obed me wel inyim Rwot, dok myero en aye olara ki i aromana ducu.” 25Caulo dok ogamo dog Daudi ni, “Gum obed ikomi, Daudi latina! Ibitiyo gin mapol, dok ibiloyogi ducu maber.” Ci Daudi ocito gire, ki Caulo bene odok i kabedone.