1 Camuel 25

Daudi ki Abigail

1Ka Camuel oto, ci jo Icrael ducu gucoke, gukumu pire, ci kiyike i gange ma i Rama.

Lacen Daudi dok oa ocito i tim Paran. 2Laco mo onongo tye kunu i Maon, ma tiyo tice i Karmel. Laco meno onongo lalonyo mada; tye ki romi alip adek ki dyegi alip acel. Ikare ca en obedo kangolo yer romine i Karmel. 3Nying laco meno kilwongo ni Nabal1, ki nying dakone Abigail. En dako ma ngeyo piny mada, dok mwonya bene, ento cware aye lakolo dok ger. Dogolane jo pa Kaleb. 4Ka Daudi owinyo ki i tim ni Nabal tye kangolo yer romine, 5ci ocwalo awobe apar bote. Ocikogi ni, “Wucit i Karmel bot Nabal, wucwal mota bote, 6wuwac bote ni, ‘Daudi omoti, owaco ni, kuc obed ikomi, omera, ki ikom jo me odi, ki jo ducu ma gitye boti. 7Awinyo ni itye kangolo yer romini. Ikare ducu ma lukwat gubedo i Karmel wabedo kacel kwedgi. Pe watimogi marac, dok bene pe kikwalo gin mo ki botgi. 8Peny awobeni, ci gibititi. Pieno wek awobena gunong gum boti tin, pien gubino inino me camo karama. Dong alegi imii botgi gin ma itwero nongo pirgi ki pira, an wodi Daudi.’ ”

9Ka awobe pa Daudi guo kunu, guwaco lok meno ducu bot Nabal ma kaka Daudi; ci gubedo kakurune. 10Ci Nabal odok iye bot lutic pa Daudi ni, “Daudi en anga? Anga ma wod pa Yeceni? Ikare man tye lwak lutic mapol ma gutenyo luditogi. 11Ci an dok akwany mugatina ki piina, ki ringo ma aneko pi lungol yer romina, amii bot dano mo ata ma gua kama pe angeyoni?” 12Pi lok meno awobe pa Daudi guloke gudok woko cen ci gutito lok man ducu bot Daudi. 13Daudi owaco bot jone ni, “Dano acel acel otwe pala lucwane!” Ci dano acel acel otweyo pala lucwane ki Daudi bene otweyo mere. Jo miya angwen gucito i kor Daudi, kun jo miya aryo gudong kakuru jami.

14Ento awobi mo acel otito bot Abigail dako pa Nabal kun waco ni, “Nen, Daudi ocwalo lukwena ki i tim gubino kamoto laditwa; ci en otuke ikomgi magwa, 15kun kono joni giber ikomwa, pe wabedo ki can mo, ki gin mo pe orem botwa ikare ma watye i bar kwat, ikare ducu ma wawoto kacel kwedgi. 16Gin aye gubedo celwa dyewor ki dyeceng bene ikare ducu ma wabedo kakwayo romi. 17Ber in aye inge loki, wek inen gin ma myero i tim, pien can bipoto ikom laditwa ki ikom jo me ode ducu; en tye ki gero keken, ma dano mo pe twero lok kwede.”

18Ci Abigail oa malo liwic, okwanyo mugati miya aryo, opiru kongo bwino aryo, ringo romi abic ma kitedo, nyig bel ma kicelo aduku abic, tuga olok ma otwone miya acel ki poki otini ma otwone miya aryo, ci oketogi iwi kana wek guting. 19En owaco bot awobene ni, “Wucit wutel nyima, an abibino kun alubu korwu.” Ento pe otito loke bot cware Nabal. 20Ci oito iwi kana, ocako wot, ci olor piny kama got ocego iye piny. Ci nen, Daudi ki lwake bene gitye ka lor piny gikemo en, ci en oromo kwedgi. 21Onongo Daudi owaco ni, “Kara ada abedo kagwoko lim pa laconi i tim nono, ma kun jamine mo pe orwenyo ikom wadgi. En otima marac kun an atime maber. 22Ci Lubanga myero oket can ikoma kitmeno ki makato bene, kace diki odiko aweko laco acel mo obwot ki ikom jo ma en tye kwedgini.”

23Ka Abigail oneno Daudi, ci orune, olor woko piny ki iwi kanane, opoto i ngom aryeba ic inyim Daudi. 24Oryebe piny katyene kun waco ni, “Wek bal obed ikoma keken ladita. Alegi ni iwek kong alok kwedi mot, ladita, ci iwiny loka. 25Pe ibed ka tamo lok pa Nabal, en dano ma kite rac. Kit ma nyinge tye kwede, kite bene tye kitmeno. Nabal aye nyinge, dok mingo bene oniang woko ikome. An onongo pe angeyo, ladit, pe aneno kom awobe ma icwalogi. 26Kombedi, ladita, macalo Rwot tye makwoni, ki in kikomi bene itye makwoni, dong inen ba, Rwot otyeko juki woko ni pe icit iting alii me remo kun iculu kwor ki cingi kikome. Wek lumeroki ki jo ma gimito timi marac gubed macalo ladita Nabal. 27Dong igam mot ma an latici akelo boti rwoda, wek kimii bene bot awobe ma gilubu kori. 28Tima kica pi bala, ladit; pien Rwot bimiyo odi cung matek, pien itye kalweny pi Rwot, bal mo peke ma kibinongo ikomi ikare me kwoni ducu. 29Kadi jo mapol gubin kalubu kori kun gimito neki woko, gin binongo kwoni kiboyo kome woko ikin boc pa jo makwo ma Rwot Lubangani aye gwokogi. En bibayo kwo pa lumeroki woko macalo kibayo latangdingo. 30Ikare ma Rwot dong otiyo ikomi gin ducu maber ma oloko i komini, ladita, ma dong oketi me bedo laker maloyo jo Icrael, 31ci dong pe ibibedo ki gin mo mamiyo ikumu, kadi tam marac mo ma obino pien yam pe ioyo remo nono, onyo iculu kwori in ki komi. Ikare ma Rwot bitimi ber, ci ipo pira, ladit.”

32Ci Daudi owaco bot Abigail ni, “Kipwo Rwot Lubanga pa Icrael, ma tin ocwali karwate kwedani! 33Kipwoyi bene pi tami ma olil, dok gum obed ikomi, pi ryekoni maber, ma omiyo ijuka tin, oweko pe atingo alii me oyo remo, ki pi culu kwora kekena ki cinga kikome! 34Ada, kit ma Rwot Lubanga pa Icrael tye makwoni, en dong ojuka, pe atimi marac. Kono in pe irune ibino irwate kweda, i ada kono laco mo acel pe obwot ki bot Nabal diki odiko.” 35Ci Daudi ogamo gin ma Abigail okelo, ci owaco bote ni, “Cit giri ki kuc idok i odi. Atyeko winyo dogi, dok ajolo legani.”

36Abigail ka odwogo bot Nabal, onongo tye kacamo karamane i ode, marom ki karama pa rwot kulu. Cwinye obedo yom matek pien onongo omer woko tutwal, omiyo Abigail pe otito lok mo bote nio ka piny oru. 37Odiko ka kongo bwino dong oware woko ki i wiye, en otito lok ducu bote. Kom Nabal oto woko lirut, dok kome bene akweya ogoyo woko. 38Ka nino okato apar, ci Rwot ogoyo Nabal oto woko.

39Ka Daudi owinyo ni Nabal dong oto woko, ci owaco ni, “Kipwo Rwot ma oculu kwora pi anywar mayam alimo ki bot Nabal, dok ojuka pe atimo bal mo. Rwot odwoko bal pa Nabal i wiye gire!”

Ci Daudi ocwalo kwena me cako cunane ikom Abigail wek obed dakone. 40Ka lutic pa Daudi guo bot Abigail i Karmel, ci guwaco bote ni, “Daudi ocwalowa boti ni wacit kwedi wek icit ibed dakone.” 41Ci Abigail oa malo oryebe piny i ngom, kun waco ni, “Nen, an angecane ma lalwok tyen lutic pa ladita.” 42Abigail orune oito iwi kanane, ocako wot i kor lukwena pa Daudi kacel ki anyirane abic ma konye, ci odoko dakone.

43Onongo Daudi onyomo Akinoam me Jejreel bene, ci gin aryo ducu gubedo mone. 442Ento onongo Caulo otyeko kwanyo nyare Mikal ma dako pa Daudi, omiyo bot Palti wod pa Laic ma bedo i Gallim.