1 Camuel 24

Daudi oweko Caulo obwot ki i En-gedi

1Ka Caulo odwogo ki kalubu kor jo Piliciti, ci kitito bote ni, “Daudi tye i tim En-gedi.” 2Caulo ocoko dano alip adek ma kiyerogi ki ikin mony pa jo Icrael, ci ocito kwedgi kayenyo Daudi inyim godi ma kilwongo ni Dyegi tim. 31 Ci ocito kama dwol romi tye iye inget yoo, kama boro bene tye iye; ci Caulo ongak woko i boro kakonye. Onongo Daudi ki jone bene gin tye i boro meno, ki i tyelone. 4Jo pa Daudi guwace ni, “Tin aye nino mayam Rwot owaci pire ni, ‘Nen abimiyo lameroki i cingi, in dong ibitime kit ma imito.’” Daudi oa malo okwale, ci ongolo dog bongo jor pa Caulo. 5Lacen cwiny Daudi opoto, pien oniang ni etimo bal. 62Ci owaco bot jone ni, “Lubanga okwero ni pe atim kit gin macalo man ikom rwoda ma en dano ma Rwot owiro; pe myero aket cinga ikome, pien Rwot dong owire woko.” 7Ci Daudi ojuku jone ki lok meno, en pe oye ni gulweny ikom Caulo. Caulo oa malo, okato woko ki i boro got, ci omede ki wote.

8Lacen Daudi bene oa malo, ocito i dog boro, olwongo Caulo kun waco ni, “Rwoda ki rwota!” Ka Caulo oneno ngeye, ci Daudi okulu wiye piny i ngom, omiye woro. 9Daudi owaco bot Caulo ni, “Ladita, pingo ibedo ka winyo lok pa jo ma giwaco ni atye kayenyi wek atimi rac? 10Nen, ka tin Rwot omiyi i cinga i boro man, kun onongo jo mukene guwaco bota ni aneki woko. Ento an aye aweki omiyo ibwot. Awaco ni pe atwero keto cinga ikomi, rwoda, pien in dano ma Rwot owiro. 11Dong inen, wora, nen dog jori tye i cinga en. Nen, angolo dog jori ci pe aneki. Myero dong inge dok inen atir ni, pe atye ki gin mo marac nyo roro mo i cwinya. Pe atimo bal mo ikomi, kadi ka itye kayenya ma imito neka woko. 12Ber Rwot aye ongol kop ikin an ki in, ber Rwot aye ocul kwora ikomi; ento cinga pe bigudu komi. 13Kit ma carolok pa ludongo waco ni, ‘Jo ma lubal, bal bene a ki botgi’; ento pe abiketo can ikomi. 143In rwot pa Icrael kulu ibino kalubu kor anga? Ilubu kor gwok ma oto? Kor ladep mamwa? 15Pieno Rwot Lubanga aye dong obed langolkop, en ongol kop ikin an ki in, onen kite, dok opid ma kakara, wek olara ki i cingi.”

16Ka Daudi otyeko waco lok meno ducu bot Caulo, ci Caulo openyo ni, “Meno dwoni bo, Daudi, latina?” Ci ocako koko kun waco bot Daudi ni, 17“In cwinyi leng kato cwinya woko, pien itima maber kun an atimi marac. 18Tin dong inyutu woko kamaleng kit ma itima kwede maber, en aye omiyo pe ineka ikare ma Rwot omiya woko i cingi. 19Ada, ka dano mo onongo kom lameroke owec, ci biweko bwot ma pe oketo can ikome? Myero Rwot omiyi mot maber, kit macalo tin itimo kwede ikomani. 20Tin dong angeyo ada ni, in ibibedo rwot, dok ker me Icrael bimoko matek i cingi. 21Dong ikwonga kwong ki nying Rwot ni, pe ibijwero likwaya ma gin lubu ngeya woko, dok pe ibijwayo nyinga woko ki i dogola pa kwara.” 22Ci Daudi okwongo kwong kit ma Caulo onongo mitoni. Lacen Caulo odok paco, ento Daudi ki jone gudok i ka kanegi.