1 Camuel 23

Daudi obedo i Keila

1Kitito bot Daudi ni “Jo Piliciti gitye kalweny ikom jo Keila, gin yako kalgi woko ki i laro moyo.” 2Pieno Daudi openyo dog Rwot ni, “Acit alweny ikom jo Piliciti meno?” Ci Rwot ogamo dog Daudi ni, “Cit ilweny ikom jo Piliciti wek ilar jo Keila.” 3Ento jo pa Daudi guwaco bote ni, “Nen, kany i Juda watye kabedo ki lworo madwong. Pe bedo rac mada ka dok wacito i Keila kalweny ki mony pa jo Piliciti?” 4Ci Daudi dok openyo dog Rwot odoco. Ci Rwot owaco bote ni, “A malo, icit i Keila pien abimiyo jo Piliciti i cingi.” 5Daudi ki jone gucito i Keila, gulwenyo ikom jo Piliciti, gudwogo cen ki dyangi, ma guyako ki guneko lwak jo mapol. Kitmeno Daudi olaro jo Keila.

6Ikare ma Abiatar wod pa Akimelek ringo laro bot Daudi i Keila, en ocito ki epod i cinge.

7Kitito bot Caulo ni Daudi dong ocito i Keila. Ci Caulo ogamo ni, “Lubanga dong otyeko miyo Daudi woko i cinga, pien odonyo i taun matye ki dogola ma kicego ki rii, ci oloro iye wiye kekene.” 8Ci Caulo olwongo lwak ducu kalweny wek gucit i Keila ka rumu wi Daudi ki jone kunu. 9Daudi oniang ni Caulo tye kapiro lok marac ikome, ci owaco bot ajwaka Abiatar ni, “Kel epod kany.” 10Ci Daudi olego ni, “Ai Rwot Lubanga pa Icrael, awinyo ni Caulo tye kayenyo yo me bino Keila wek etyek gang man woko pira. 11Ci dong apenyo ni, jo Keila gin bimiya i cing Caulo? Caulo bibino, kit ma awinyoni? Ai Rwot Lubanga pa Icrael, abako doga boti, tita ba.” Ci Rwot owaco bote ni, “En bibino.” 12Daudi dok openyo ni, “Jo Keila gibimiya ki jona i cing Caulo?” Ci Rwot ogamo ni, “Gin bimiyo in icing Caulo.” 13Ci Daudi ki jo ma gitye bote, dano maromo miya abicel, gua woko ki i Keila, guket, gucito kama gin romo wot iye. Ka dok kitito bot Caulo ni, Daudi dong oringo woko ki i Keila, ci pe dong ocito kunu.

Daudi obedo i tim i lobo godi

14Daudi obedo kakane i dye tim, i lobo godi ma i tim Jip. Ci Caulo obedo kayenye jwijwi, ento Lubanga pe omiye i cinge.

15Ikare ca, onongo Daudi bedo i Korec matye i tim Jip. Daudi obedo ki lworo pien onongo Caulo tye kayenye me aneka. 16Ci Yonacan wod pa Caulo obino bote, ojingo cwinye i nying Lubanga kun waco bote ni, 17“Pe ilwor, pien cing wora pe bipoto ikomi. Ibibedo rwot maloyo Icrael, an abibedo lalub kori. Wora Caulo bene ngeyo kumeno.” 181Ci gin aryoni ducu guketo gicikegi inyim Rwot. Lacen Daudi odong i Korec, ci Yonacan odok paco. 192

Jo Jip gucito bot Caulo i Gibea, guwaco bote ni, “Daudi tye kakane ikinwa, i Korec, ikom got Kakila ma i Jecimon tung kupiny. 20In rwot bin dong, kit macalo cwinyi mito binoni, ci wan aye wabimiyo en i cingi.” 21Caulo ogamo ni, “Rwot aye omii ki wun gum pien kica omakowu ikoma. 22Wun wucit wupeny kakare maber wek wunge kabedo ma en bedo iye, ki ngat ma oneno en kunu; pien kitito bota ni en kwiri mada. 23Kong wucit wunen, wungi kabedo ducu ma en maro kane iye, wek wudwog ma dong wuniang ma atir. Ka dong abicito kunu kacel kwedwu. Teke en tye i lobo man kamo, ci abiyenye ki ikin kaka ducu ma gitye i Juda.” 24Ci gua gukwongo nyim Caulo gucito i Jip.

Ikare meno onongo Daudi ki jone gitye i Maon, i Araba macok ki Jecimon, tung kupiny. 25Caulo ocito kacel ki jone kayenye, ento gitito bot Daudi, omiyo ocito obedo i lung matut ikin godi ma i tim Maon. Ka Caulo owinyo pire, ci olubu kor Daudi wa kunu. 26Caulo woto rabo nget lung tungcel kun Daudi ki jone onongo girabo nget lung tungcel. Daudi orune me a woko ki kanget Caulo, pien onongo jo pa Caulo gunyiko cok ki Daudi ki jone wek kimakgi woko. 27Ci lakwena mo dok obino bot Caulo ma waco ni, “Rune ibin oyoto, pien jo Piliciti gubino ka monyo lobo.” 28Caulo oa woko ki kalubu kor Daudi, ocito kalweny ki jo Piliciti; ma omiyo kicako nying kabedonu ni, Got me Bwot. 29Daudi oa ki kunu, ocito obedo i En-gedi kama en okane iye.