1 Camuel 22

Neko ajwaki pa Lubanga

11

Daudi oa woko ki kunu, ocito i boro got matye Adulam. Ka omegine guwinyo pire, ki jo mukene me dogola pa kwarogi, ci gucito bote. 2Wa ki dano ducu ma kidiyogi, dano ma gucamo banya, ki dano ma piny oloyogi, gucoke bote, ci Daudi odoko ladit ma loyogi, dano macok romo miya angwen.

3Daudi oa ki kunu, ocito i Mijpa ma i lobo Moab. Ci owaco bot rwot me Moab ni, “Alegi iwek wora ki maa gubed boti, nio ka abingeyo gin ma Lubanga bitiyo ikoma.” 4Ci Daudi owekogi bot rwot me Moab, ci gubedo kunu pi kare ducu ma Daudi tye ka kane i godi.

5Lanebi Gad obino bot Daudi ci owace ni, “Pe ibed ka kane i godi, a woko, icit i lobo Juda.” Ma omiyo Daudi oa woko ki kunu, ocito i bunga Keret.

6Inino mo acel Caulo onongo tye i Gibea, ite yat ananga ma i kabedo mutinge malo. Ka Caulo obedo piny kunu ki tonge i cinge, kun lutice ducu gucung cok kwede, owinyo ni kinongo kom Daudi ki jo ma gitye kwede. 7Ci owaco bot lutice ma gucung ingete ni, “Tin wuwiny, wun jo pa Benjamin, Wutamo ni wod pa Yece bimiyo poto me apura bot ngat acel acel ikinwu, ki poto olok? En biketowu ducu wubedo lulo dano alip nyo lulo dano miya? 8Man aye gin ma omiyo wun ducu wupiro lok ikoma? Pe tye ngat mo ma otito bota ni woda ocike ki wod pa Yece. Pe tye ngat mo ma cwinye paro pira. Ngati mo ma otita ni woda orubu cwiny dano mayam latica wek oliba, macalo en tye katimo inino man.” 92Doeg ma Laedom ogamo doge ki kama ocung ki iye kanget lutic pa Caulo ni, “An aye aneno wod pa Yece ka cito i Nob bot Akimelek wod pa Akitub, 10ci Akimelek openyo dog Rwot pire, dok omiye cam, ki pala lucwan pa Goliac ma Lapiliciti.”

11Rwot Caulo ocwalo kwena pi lwongo ajwaka Akimelek wod pa Akitub ki ludogola pa kwarone ducu, gin ajwaki pa Lubanga ducu ma gitye i Nob; ci gin ducu gubino bot Caulo. 12Caulo owaco ni, “Dong iwiny, in wod pa Akitub.” En ogamo ni, “An atye ene, rwoda.” 13Caulo openye ni, “Pingo wupiro lok ikoma, in ki wod pa Yece, dok imiye cam ki pala lucwan, ka dok ipenyo dog Rwot pire, omiyo obino kalweny ikoma ki kaliba, macalo en tye katimo ikareni?” 14Akimelek ogamo dog rwot ni, “Rwot, anga ma ikin lutici ma lagen macalo Daudi? En obedo cwar nyari bene, dok ladit pa lugwok kwoni, dano ma kiworo mada i odi! 15Tin aye tyen mukwongo ma apenyo kwede dog Lubanga pire? Pe kumeno, ladit rwot, pe itam lok mo marac ikoma nyo ikom jo me dogola pa kwara, pien an pe angeyo lok mo wa ki acel ikom lok ma iwaconi.” 16Rwot Caulo owace ni, “Ibito ada, Akimelek, in kacel ki jo me dogolawu ducu.” 17Ci Caulo owaco bot jo ma gigwoke ma gucung cok kwede ni, “Wunek ajwaki pa Rwot woko, pien guribo cinggi ki Daudi. Gin ngeyo ni Daudi olwi woko, ci pe gutito bota.” Ento lutic pa rwot gukwero gudu kom ajwaki pa Rwot. 18Caulo dok owaco bot Doeg ma Laedom ni, “In aye inek ajwaki magi.” Ci Doeg ma Laedom oneko ajwaki ducu. Inino meno oneko dano pyere aboro wiye abic ma guruku epod me bongo camanini ma ajwaki pa Lubanga girukuni. 19Caulo dok omiyo kineko dano ducu ma i Nob ma taun madit pa ajwaki. Kityekogi woko ducu ki pala lucwan, co ki mon, lutino adunu ki lutino lukere ma pud dot, kacel ki twoni dyangi ki kana ki romigu.

20Ento ngat acel ki ikin awobe pa Akimelek wod pa Akitub obwot, nyinge Abiatar. Oringo olubu kor Daudi. 21En otito bot Daudi, kit ma Caulo oneko kwede ajwaki pa Rwot. 22Daudi owaco bot Abiatar ni, “Onongo yam angeyo loke wa inino ca ma aneno Doeg ma Laedom kunu. Inino meno aniang ni en bitito bot Caulo. An aye akelo to man ikom dogola pa kwarowu. 23Dong ibed kweda, pe ilwor, pien ngat ma mito neka nongo mito neko in bene. Ka ibedo kweda ci abigwoki maber.”