1 Camuel 21

Daudi oringo woko ki bot Caulo

11

Daudi ocito i Nob bot Akimelek ma ajwaka pa Lubanga, Akimelek obino kajolo wi Daudi ki myelkom kun penye ni, “Pingo itye keni ma ngat acel mo pe kacel kwedi?” 2Daudi ogamo dog ajwaka Akimelek ni, “Rwot Caulo ocika ki lok mo kun waco bota ni, ‘Pe iwek ngat mo onge lok ma acwali pireni, ki lok ma aciki kwede.’ Pieno dong acike ki jona pi kabedo ma abirwate kwedgi iye. 3Kombedi itye ki gin ango i cingi? Miya mugati abic, nyo gin mo keken matye boti.” 4Ajwaka odok iye bot Daudi ni, “Pe tye mugati mo me nino ducuni i cinga, ento atye ki mugati maleng. Kace gin awobeni pe gubutu ki mon gi i kin kareni, ci atwero mini.” 5Daudi ogamo dog ajwaka ni, “Me adane, gin pe gibutu ki mon gi ikare ducu ka wacito kamo iwot. Pimeno ka komgi dong bedo leng i wotgi me nino ducu, ci kombedi dong komgi pe twero bedo maleng makato ma kun tin wacito i lok ma pire teki?” 62Kitmeno ajwaka omiye mugati maleng; pien onongo mugati mukene peke bote, kono mugati me aketa inyim Lubanga keken aye kikwanyo ki inyim Rwot, ka kidwoko wange ki mugati manyen ma pud lyet inino meno kikome ma kikwanyoni.

7Laco mo ma ikin lutic pa Caulo onongo tye kunu inino meno, ma obedo kalega inyim Rwot. Nyinge Doeg, Laedom, ma ladit pa lukwat pa Caulo.

8Daudi dok owaco bot Akimelek ni, “Itye ki pala lucwan nyo tong mo kany? Pe akelo kadi pala lucwan kadi wa jami lweny mo, pien or pa rwot obedo me oyotoyot tutwal.” 93Ajwaka ogamo kun waco ni, “Pala lucwan pa Goliac ma Lapiliciti mayam ineko i nota Ela aye tye kany, nen, tye ma kiboyo kome woko ki bongo kiketo inge epod. En ene; ka imito terone, ci ter do, pien mukene peke, enu keken aye tye kany.” Daudi owaco ni, “Miya, pe tye pala lucwan mo maber makato meno.”

10Daudi oa woko ki kunu inino meno kun ringo ki bot Caulo, ocito bot Akic, rwot me Gat. 114Lutic pa Akic guwaco bote ni, “Man aye Daudi ma rwot me loboni. Yam mon guwero kun gimyelo kwede ma giwero ni, ‘Caulo oneko mere dano alip, ento Daudi oneko alip apar.’” 125

Daudi okano lok meno i cwinye, ci obedo ki lworo madwong ikom Akic, rwot me Gat. 136 Ci Daudi oloko kit bedone woko inyimgi pi lworo. Ocako poro bange woko ikin gi macalo lapoya, kun bedo kagoro kom kika me dogola ma i dog taun madit, dok weko laa doge mol i tike. 14Ci Akic owaco bot lutice ni, “Nenu, laconi lapoya; pingo dok wukelo bota kany? 15An lupoya nok anoka bota bo, en ma omiyo wukelo laco man kanyutu apoyane inyima? Wumito ni laco man odony wa i oda?”