1 Camuel 20

Yonacan okonyo Daudi

1Daudi olwi oringo woko ki i Nayot ma i Rama, ocito bot Yonacan ci owaco ni, “An atimo gin ango? Aroco gin ango? Abalo gin ango inyim woru ma omiyo en mito nekani?” 2Yonacan ogamo ni, “Meno pe twero time! Pe myero ito. Nen; wora pe tiyo gin mo madit nyo matidi ma pe otito bota; ci lok ango mamiyo wora munga lok man? Pe tye kitmeno.” 3Ento Daudi odok iye ni, “Woru ngeyo maber ni dong ayomo cwinyi; dok en tamo ni, ‘Pe kiwek Yonacan onge lok man, wek pe obed ki kumu.’ Ento me adane, macalo Rwot tye makwo, dok macalo in bene i tye makwoni, an dong acok ki to.” 4Yonacan dok owaco bot Daudi ni, “Gin ducu ma iwaco abitiyo piri.” 51Daudi ogamo dog Yonacan ni, “Nen, diki kibikwero karama me por dwe manyen; an pe myero akeng bedo ki rwot i dog cam. Ento wek kong acit, akane woko i bar nio wa inino me adeke iwi otyeno. 6Ka woru bipenyo pira, ci iwac ni, ‘Daudi openya matek ni kiyene me cito wa i ganggi Beterekem oyotoyot, pien timo gitum tye ma bedo kunu i dogolagi mwaka ki mwaka.’ 7Kace ogamo ni, ‘Ber,’ ci abibedo maber; ento ka obedo ki kiniga, ci ber inge ni tim marac dong otyeko moko i cwinye. 8Ma omiyo in myero itima ber, pien dong iketo gicike maleng ikin in ki an. Ento ka roc mo tye ikoma, ci in kikomi aye ineka, pingo iweko apoto i cing woru?” 9Yonacan ogamo ni, “Pe twero time ikomi! Kace angeyo ni tim marac dong otyeko moko i cwiny wora, ci pe atito boti?” 10Daudi dok owaco bot Yonacan ni, “Anga mono ma dong bitita ka woru ogami lok ki gero?” 11Ci Yonacan owaco bot Daudi ni, “Bin wek wacit i bar.” Ci gin aryo ducu gucito i bar.

12Yonacan owaco bot Daudi ni, “Rwot Lubanga pa Icrael obed caden ikinwa! Ka dong atyeko ngeyo tam pa wora, diki kaonyo, nyo inino me adeke, nen, ka tame ber ikomi in Daudi, ci abicwalo lok atito boti. 13Ento ka wora mito timi marac, Rwot myero oket can ikoma kitmeno ki makato bene ka pe atito loke boti ci acwali woko cen wek icit giri maber. Rwot aye obed kwedi kit mayam obedo ki worani. 14Kace pud atye makwo, ci ibed kweda ki mar pa Rwot ma pe lokeni, wek pe ato. 152Dok pe ikwany mari woko ki ikom jo me oda matwal. Kace Rwot bikwanyo lumeroki ducu ki i lobo, 16pe iwek gicikewa wan kwedi otur. Kace otur, Rwot biculu kwor ikomi.” 17Ci Yonacan dok omiyo Daudi okwongo kwong kun ocike kwede pi mare, pien Yonacan onongo maro Daudi kit ma maro kwede kwone kekene.

18Yonacan dok owaco bot Daudi ni, “Diki karama me por dwe. In dong ibibedo peke, ci kom bedoni bidong nono. 19Inino me adeke kibipenyo piri matek; in dong icit i kabedo kama yam ikane iye ikare ca, ci ibed inget got ma kiguruni. 20An abibayo atero adek kangete manen calo abicelo gin mo. 21Nen, abicwalo latin awobi kun awaco ni, ‘Cit kayenyo atero.’ Kace awaco bot latin awobi meno ni, ‘Nen, atero tye tung boti kany, putgi woko,’ ci in ibidwogo, pien macalo Rwot tye makwoni, nongo gin mo pe ma bitimi marac. 22Ento ka awaco bot awobi ni, ‘Nen atero tye wa inyimi kuca,’ ci pe idwog cen, pien nongo Rwot aye ocwali woko cen. 23Dok lok ma in ki an watyeko lokone, nen, Rwot tye ikin in ki an matwal.”

24Kumeno Daudi okane woko i bar. Ka kwero karama me por dwe ocake, ci rwot obedo piny kacam. 25Caulo obedo ikome me nino ducu macok ki kor ot, ka Yonacan ocung okemo rwot, ki Abneri dok obedo kanget Caulo, ento kabedo pa Daudi onongo tye nono.

26Caulo pe oloko iye gin mo inino meno, pien otamo ni, “Gin mo opoto ikom Daudi ma omiyo odoko keni, ci oweko en pe tye kakwero karama.” 27Ento inino me aryo me karama me por dwe, kom bedo pa Daudi obedo nono, ci Caulo ocako penyo wode Yonacan ni, “Pingo wod pa Yece pe obino ka cam, cake wa laworo ki tin bene?” 28Yonacan ogamo dog Caulo ni, “Daudi openya matek ni kiyene me cito Beterekem. 29Olega ni, ‘Wek acit, pien jo me dogolawa gitye katumu gitum i gang, omera ociko ni abed kunu. Kombedi, ka gum omaka inyimi, ci wek acit anen omegina.’ Pi lok meno omiyo en pe obino i dog cam boti, rwot.”

30Kiniga otugi mako Caulo ikom Yonacan cut. Ci owaco bote ni, “In i wod pa dako ma ngute oteng, ma lajemo; pe onongo an dong angeyo ni cwinyi otyeko maro wod pa Yece, ma lewice bimaki giri, ma lewice bimako wa meni bene? 31Teki wod pa Yece pud kwo iwi loboni, in pe ibibedo rwot matwal! Pieno cit ikele bota kany, pien en omyero oto.” 32Yonacan ogamo dog wone Caulo ni, “Kibineke woko pi gin ango? Otimo gin ango?” 33Ento Caulo obaye ki tong, ma omiyo Yonacan ongeyo ni cwiny wone otyeko moko pi neko Daudi. 34Yonacan oa woko ki i dog cam ki kiniga madwong, ci pe dok ocamo cam mo inino me kwer me aryone, pien cwinye obedo kakumu pi Daudi, pien wone onongo oyeto Daudi.

35Orwone Yonacan ocito i bar kama ocike iye ki Daudi, kacel ki latin awobi mo. 36Ci owaco bot awobine ni, “Ring icit iput atero ma abibayoni.” Ka awobinu obiringo, ci obayo atero ocung wa inyime. 37Ka latin awobi meno oo kama Yonacan obayo iye ateroni, Yonacan olwongo awobi meno kun waco ni, “Atero tye wa inyimi kuca.” 38Dok olwongo awobi meno kun waco ni, “Rune i tim oyoto, pe irii!” Awobi pa Yonacan ocoko atero ducu, odwogo kwedgi bot ladite. 39Ento awobini pe ongeyo iye gin mo; kono Yonacan ki Daudi aye gin ongeyo loke. 40Yonacan omiyo jamine ducu bot awobine, ocike ni, “Dong icit, idwokgi wa taun.” 41Ka awobi meno ocito, ci Daudi otugi a malo ki inget got ma kiguruni, opoto i ngom aryeba cwiny inyim Yonacan, okulu wiye piny tyen adek. Gucako noto lemgi keken gi ki mot me mar, ka gukok ki pig wanggi keken gi ento Daudi aye obedo ki kumu madwong. 42Yonacan dok owaco bot Daudi ni, “Cit giri ki kuc, macalo dong watyeko kwongo kwong kekenwa i nying Rwot, kun wawaco ni, ‘Rwot bibedo ikin an ki in, ki ikin likwaya ki likwayi matwal.’” Ka lacen Daudi oa opoke kwede, ci Yonacan odok i taun.