1 Camuel 19

Caulo otemo neko Daudi

1Caulo ocako loko ki wode Yonacan ki lutice ducu ni omyero kinek Daudi woko. Ento cwiny Yonacan wod pa Caulo onongo maro Daudi matek. 2Yonacan otito bot Daudi ni, “Wora tye kayenyo yo me neki woko; pieno omyero igwok komi diki odiko, bed ma ikane keni i mung. 3An abicito i bar, acung inget wora kama ikane iyeni, ci abiloko piri bot wora; ka aniang lok mo, ci abitito boti.” 4Yonacan oloko pi Daudi mamit bot wone Caulo kun waco ni, “Rwot, pe i tim bal ikom latici Daudi, pien pe otimo bal mo ikomi, obedo ka timi tic ducu mabeco. 5Yam odyero kwone, oneko Goliac ma Lapiliciti, ci Rwot omiyo jo Icrael oloyo loc madit. Yam ineno, cwinyi obedo yom iye. Pingo imito timo bal kun ioyo remo pa dano ma pe ki bal, pi neko Daudi nono labongo tyen lok mo?” 6Caulo owinyo dog wode Yonacan, ci okwongo kwong ni, “Macalo Rwot tye makwoni, pe dong abineko Daudi.” 7Yonacan olwongo Daudi, otito bote lok meno ducu, ci okelo Daudi bot Caulo, omede ki tic inyime kit macon.

8Lweny dok ocake. Ci Daudi ocito olwenyo ki jo Piliciti, onekogi mapol, omiyo guringo woko.

9Ikare meno cen marac dok oa ki bot Rwot opoto ikom Caulo, ikare ma en obedo i ode ki tonge i cinge, kun Daudi tye ka goyo opuk. 10Caulo oyube me guru Daudi i kor ot ki tong doki; ento Daudi ongeyo tam pa Caulo woko, ci owene woko omiyo Caulo ocobo kor ot ki tonge. Daudi oringo woko, ci obwot gire. 111

I dyewor meno Caulo ocwalo lukwena ka kuru Daudi i ode, wek enek woko odiko, ento Mikal dako pa Daudi owaco bote ni, “Ka tin dyewor pe igwoko komi, ci gibineki woko diki.” 12Kitmeno Mikal ocwalo Daudi owok ki iwang dirica, ci en oringo woko obwot gire. 13Mikal okwanyo cal apaya opyelo iwi kitanda pa Daudi, ka oketo laten wic me yer dyegi opyelo ka wiye, ka oumu woko ki bongo. 14Ka Caulo ocwalo lukwena me omo Daudi, Mikal owaco botgi ni, “Kome lit.” 15Caulo dok ocwalo lukwena kaneno Daudi kun waco ni, “Wutinge ki kitanda wukel bota, wek aneke woko.” 16Ka lukwena gudonyo i kicika, ci nen, cal apaya aye tye iwi kitanda, ki laten wic me yer dyegi ka wiye. 17Caulo openyo Mikal ni “Pingo ibwola kit man iweko lameroka ocito?” Mikal odok iye bot Caulo ni, “En owaca ni, ‘Wek aciti; ka pe, ci aneki woko.’”

18Ikare meno Daudi oringo obwot gire, ci ocito bot Camuel i Rama, otite gin ducu ma Caulo otimo ikome. Ci en kacel ki Camuel gucito gubedo i Nayot. 19Dok kitito bot Caulo ni, “Daudi tye i Nayot i Rama.” 20Ci Caulo dok ocwalo lukwena kaomo Daudi. Ka lukwena pa Caulo guneno lwak lunebi ma gitito lok pa Lubanga, kun Camuel ocung katelo wigi, ci Cwiny pa Lubanga opoto ikom lukwena pa Caulo, gin bene gucako tito lok pa Lubanga macalo lunebi. 21Ka kitito loke bot Caulo, ci dok ocwalo lukwena mukene. Gin bene gucako tito lok pa Lubanga kit macalo lunebi gititoni. Caulo dok ocwalo lukwena tyen me adeke, gin bene gutito lok pa Lubanga aye. 22Ka lacen Caulo kikome ocito i Rama, obino kama wang pii madit tye iye matye i Cekuni, ci openyo ni, “Camuel ki Daudi gitye kwene?” Ngat acel owaco ni, “Gitye i Nayot, i Rama.” 23Caulo oa ki kunu, ocito i Nayot ma i Rama. Cwiny pa Lubanga obino opoto ikome bene, obedo kawot kun tito lok pa Lubanga macalo lanebi, kun woto oo kwede wa i Nayot ma i Rama. 242En bene ocako lunyu bongone woko, otito lok pa Lubanga macalo lanebi inyim Camuel. Obutu munero inino meno dyeceng ki dyewor benebene. Ma omiyo giwaco ni, “Caulo bene odoko lanebi bo?”