1 Camuel 18

Yonacan ocike ki Daudi

1Ka dong Daudi otyeko lok ki Caulo, ci Yonacan wod pa Caulo omaro Daudi matek, macalo omaro kome kene. 2Caulo otero Daudi inino meno bote, pe dok oweko Daudi odok i gang pa wone. 3Yonacan oketo gicike ki Daudi, pien onongo maro Daudi kit macalo omaro kome kene. 4Ci olunyo jore woko ki ikome, omiyo bot Daudi kacel ki jami lwenye, macalo pala lucwane, atum ki aterone ki del pyere. 5Kama Caulo ooro Daudi iye ducu en cito, tiyo maber, ma omiyo Caulo okete me loyo lumonye. Ket man oyomo cwiny lwak ducu, dok oyomo cwiny lutic pa Caulo bene.

Nyeko ocako mako Caulo ikom Daudi

6Ka onongo gidwogo paco, ki kama Daudi oneko iye Goliac ni, ki acikari bene gidwogo gang mon gumol woko ki i taun ducu ma i Icrael ma kun giwero, gimyelo pi jolo rwot Caulo ki ajaa, ki wer me wayu pi yomcwiny, ki jami agoya me wer. 71 I wayogi mon guwero kun gileyo aleya ni, “Caulo oneko mere dano alip, ento Daudi oneko alip apar.”

8Lok man ocwero cwiny Caulo, ci kiniga omake matek tutwal. Ci owaco ni, “Mon man gubedo ka waco ni, Daudi oneko alip apar, ki tung bota giwaco ni alip keken, gin ango mukene ma en dok twero limo? Man dong odonge camo ker keken.” 9Cake ikare meno, Caulo neno Daudi agaya.

10Orwone cen marac oturu ki poto ikom Caulo, ci obedo ka poo ki lok i ode calo lapoya, kun onongo Daudi goyo opuk ikit me nino ducu. Caulo onongo tye ki tonge i cinge, 11ci obayo Daudi ki tong, pien obedo ka tamo ni, “Wek acob Daudi, adi woko i kor ot.” Ento Daudi opange oloyo tyen aryo.

12Caulo obedo ka lworo Daudi, pien Rwot onongo tye kwede, ento Rwot onongo oa woko ki bot Caulo. 13Caulo okwanyo Daudi woko ki inyime, okete me bedo ladit lalo dano alip; ci obedo katelo nyim lwak ka gicito i mony. 14Gin ducu ma Daudi tiyo en cobo maber, pien Rwot tye kwede. 15Ka Caulo oneno ni gin ducu ma Daudi tiyo cobo maber tutwal, ci obedo ka lwore. 16Ento jo Icrael ki jo Juda ducu gumaro Daudi pien obedo katelo nyimgi i lweny kama giwoto iye ducu.

Daudi onyomo nya pa Caulo

17Caulo dok owaco bot Daudi ni, “Atye ki nyara madit Merab en. Abimiyo en boti wek obed dakoni. Kono keken ni, omyero ibed oteka lwenya, kun ilwenyo matek pi Rwot.” Caulo onongo obedo ka tamo ni, “Wek cinga pe opot ikome, kono cing jo Piliciti aye opot ikome.” 18Daudi owaco ni, “An anga, ki kwarina jo mene, ki dogola pa kwaragi gin angagi ikin jo Icrael, mamiyo abedo cwar nya pa rwotni?” 19Ento ka kare me miyo Merab bot Daudi oromo, ci dok kimiyo Merab bot Adriel aye ma jo Mekola pi bedo dakone.

20Mikal nya pa Caulo omaro Daudi mada. Ka gitito bot Caulo, ci loke oyomo cwiny Caulo. 21Caulo onongo otamo ni, “Wek amii Mikal bot Daudi, wek obed owic me make, wek cing jo Piliciti aye opot ikome.” Ma omiyo Caulo dok owaco bot Daudi tyen me aryo ni, “In dong ibibedo cwar nyara.” 22Caulo oloko ki lutice bene, ocikogi ni, “Wulok ki Daudi i mung ni, ‘Nen, cwiny rwot yom ikomi, ki lutice ducu gimari; dong ibed cwar nya pa rwot.’” 23Ci lutic pa rwot guwace lok meno ducu. Daudi ogamo ni, “Lok me doko cwar nya pa rwot nen ki botwu ni tidi mono, kun an lacan, ma peya aywek?” 24Lutic pa Caulo gutito bote lok ma Daudi owaco. 25Ci dok Caulo owaco lok ni, “Wubiwaco bot Daudi ni, ‘Rwot pe mito lim me nyom. En mito del kom nyim jo Piliciti me co miya acel, wek icul kwor ikom lumerok pa rwot.’” Onongo Caulo otamo ni, jo Piliciti aye omyero gunek Daudi. 26Ka lutice gutito lok man bot Daudi, ci lok me bedo cwar nya pa rwot oyomo cwinye. Ci ma peya kare ma kimoko okato, Daudi ocito ki lwake, 27oneko jo Piliciti miya aryo, odwogo ki del kom nyimgi me co, ci omiyogi bot rwot kun mo pe orem, wek edok cwar nya pa rwot. Ci Caulo omiyo Daudi nyare Mikal me bedo dakone. 28Ento ka Caulo oneno dok oniang maber ni Rwot tye ki Daudi, dok ni jo Icrael ducu gimare, 29lworo omako Caulo ikom Daudi makato yam con, ma omiyo Caulo obedo lamerok pa Daudi cake ikare meno.

30Rwodi pa jo Piliciti dok gubino kalweny, ci ikare ducu ma gibino, nongo Daudi loyogi maber makato lutic pa Caulo mukene ducu, ma omiyo nyinge oywek matek.