1 Camuel 17

Goliac otayo jo Icrael

1Ikare meno jo Piliciti gucoko monygi kacel pi lweny. Gucoke i Coko i lobo pa Juda, ci gugony ikin Coko ki Ajeka, i Epec-damim. 2Caulo ki jo Icrael gucoke kacel, gugony i nota Ela, ci gin oyube me lweny ikom jo Piliciti. 3Lupiliciti gucung iwi got tungcel, ki jo Icrael gucung iwi got tung mukene, kun nota tye ikin gi. 4Ci twon oteka lweny mo obino ma oa ki i gony pa Lupiliciti ma nyinge Goliac, dano me Gat. Bore kato ka puti abongwen. 5Oruku otang mola i wiye, dok oruku koti mola lageng kore; pek pa koti molane onongo romo kilo pyere abicel. 6Oruku mola ma okwako tyene, kun okace ki tong alwiro mola iwi gwoke. 7Bol tonge mito rom ki rii yat me cweyo bongo; lak tonge peke romo kilo abiro, kun lamak kwote otelo nyime. 8En ocung ci odange matek iwi mony pa jo Icrael ma gurye i tyeng ni, “Kara wubino ma wurye i tyeng pi lweny pingo? Pe an Lapiliciti? Pe wun lutic pa Caulo bo? Wuyer danowu mo acel, wek en olor piny obin bota. 9Ka en twero lweny kweda ce oneka, ci wan wabibedo luticwu; ento ka an aye aloye, ce aneke, ci wun wubibedo luticwa pi tiyo tic botwa.” 10Lapiliciti meno dok owaco ni, “Atayo mony pa jo Icrael ma tin gurye i tyengi! Wumiya dano mo wek walweny kwede kacel.” 11Ka Caulo ki jo Icrael ducu guwinyo lwak lok pa Lapiliciti meno, ci cwinygi obale woko, gubedo ki lworo madwong tutwal.

Daudi obino i gony pa lumony

12Daudi obedo wod pa dano mo me Eprata ma gange tye i Beterekem i lobo Juda; nyinge Yece, yam tye ki awobene aboro. Ikare pa Caulo, onongo en dong otii woko, mwaka me dite dong dwong. 13Onongo awobe pa Yece adek ma muteggine gulubu kor Caulo i mony, nying awobene adek ma gucito i monyi gin ene: Eliab ma latin kayo, ki ma olube Abinadab, ki me adeke Cama. 14Daudi aye matidine; jo ma otegi adeki gulubu kor Caulo, 15ento Daudi obedo kawire bot Caulo, ka dok paco ka kwayo romi pa wone i Beterekem. 16Lapiliciti obedo kabino anyim ci cung kunu odiko ki otyeno pi nino pyere angwen.

17Yece owaco bot wode Daudi ni, “Ber iter nyig bel ma gicelo acelani bot omegini, maromo agwata adek, kacel ki mugati man apar, iting itergi oyot bot omegini ma gitye i gony ca. 18Dok iter cak mutwo ma olungeni apar bot laditgi me mony maloyo dano alip. Nen kit ma omegini tye kwede, ci imak gin mo idwog kwede ki botgi ma nyutuni gitye maber.”

19Ikare meno onongo Caulo ki omegi pa Daudi wa ki jo Icrael ducu gubedo i nota Ela, kun gilwenyo ki jo Piliciti. 20Daudi oa odiko con oweko romi bot lagwokone, ci ocako wot otero cam ma kiyubu kit macalo Yece ocike kwede oo i gony ma onongo mony dong cito ka rye i tyeng, kun girwayo me lweny. 21Ci jo Icrael ki jo Piliciti gurwayo cok karomo; ma mony okeme ki mony wadi. 22Daudi oweko jami i cing lagwok jami, ci ocito karye ikin mony. En omoto omegine ducu ka openyogi kit ma lweny tye kwede. 23Ka pud en tye kalok kwedgi, ci twon oteka me Gat ma ikin mony pa Lupiliciti ma nyinge Goliac otuc kamaleng inyim mony pa jo Piliciti ma guryeyo, kun loko lok marom ki macon ca, ci Daudi owinyo loke.

24Jo Icrael ducu guringo laco meno woko ka gunene, ci gubedo ki lworo matek. 25Ci lwak jo Icrael guwaco ni, “Wuneno dano man ma obinoni? Ada, en obino katayo jo Icrael. Ka ngat mo oneko, rwot bimiye doko lalonyo madit, dok bimiine nyare bene wek obed dakone, dok bimiyo jo me ot pa wone pe dong giculu mucoro.” 26Daudi owaco bot jo ma gucung kangete ni, “Gin ango ma kibitimo ka dano mo oneko Lapilicitini, wek okwany kwede cac woko ki ikom Icrael? Lapiliciti ma pe ngeyo Lubangani mono obedo anga, ma omyero obed kacayo Lubanga makwoni?” 27Ci lwak dok gudoke iye kun gitite ngo ma kibitimo ki dano ma oneke.

28Ka Eliab omin Daudi madite owinyo ka loko ki dano, kiniga omake ikome ci owaco ni, “Pingo ibino? Iweko romiwa manoki i tim bot anga? Angeyo eteni ki bwola me cwinyi; ibino kany kaneno lweny.” 29Daudi ogamo ni, “Atimo gin ango kombedi? Pud aloko aloka keken do.” 30Ci oloke openyo ngat mukene lakit peny aceli. Dano ducu gudoke iye calo ngat mukwongoni.

31Ka lok ma Daudi obedo ka lokoneni owinye, gutito bot Caulo; ci Caulo ocwalo kwena olwonge. 32Daudi owaco bot Caulo ni “Pe iwek cwiny dano mo opoti pi Lapiliciti man ladit, an abicito kalweny kwede.” 33Caulo owaco bot Daudi ni, “In pe itwero cito kalweny ki Lapiliciti man, pien in pud latin awobi, en obedo lalweny wa ikatinone.” 34Ento Daudi ogamo dog Caulo ni, “Ladit, abedo ka kwayo romi pa wora. Ka yam labwor mo obino, nyo nguu mukene, ce omako latin romo mo ki ikin romiwa, 35aryemo kore ci agoyo, alaro latin romo, akwanyo woko ki idoge. Kace otoke otinge ikoma, apoto ikome ci amako yer tike, agoyo aneko woko. 36Ladit, an aneko labwor ki nguu mukene mapol. Lapilicitini ma pe ngeyo Lubanga bibedo marom ki ngat acel ikin gi. Nen, en dong ocayo mony pa Lubanga makwo woko.” 37Ci Daudi dok owaco ni, “Rwot yam olara ki i lwet cing labwor ki nguu mukene: en bilara bene ki i cing Lapiliciti man.” Caulo owaco bot Daudi ni, “Citi. Rwot aye obed kwedi!”

38Caulo oruku Daudi ki jami lwenye, oruku otang mola i wiye, ka oruke ki koti mola. 39Daudi otweyo pala lucwan pa Caulo iwi jami lweny pa Caulo, otemo wot kwede ci pe otwero, pien onongo pe ongiyo wot kwede. Ci owaco bot Caulo ni “An pe atwero wot ki jami lweny man ducu pien pe angiyo kwede.” Ci olunyugi woko, 40ka okwanyo odoone omako i cinge, ci oyero lutino gweng abic ma olunge mapwot ki i laora kulu, opikogi i opiru kwate, ma ikicaane; ci omako latangdingone i cinge, ka onyiko cok bot Lapiliciti.

Daudi oloyo Goliac

41Lapiliciti obino onyiko cok ki Daudi ki lating kwote inyime. 42Ka Lapiliciti oneno kom Daudi, ci otugi cayone woko, pien onongo pud latin awobi, kome kwar, dano ma neno mwonya. 43Owaco bot Daudi ni, “An adoko gwok bo, ma omiyo ibino bota ki odooni?” Ka ocako ceno Daudi ki nying lwak lubangane. 44Lapiliciti dok owaco bot Daudi ni, “Bin bota ci abimiyo ringo komi bot winyo me polo ki bot nguu ma i tim.” 45Daudi bene owaco bot Lapiliciti ni, “In ibino bota ki pala lucwan, tong ki tong alwiro, ento an abino boti i nying Rwot me mony, i nying Lubanga me mony pa jo Icrael ma ibedo kacayoneni. 46Tin Rwot bimiyo in i cinga, abireti woko piny, ci angolo wii woko; dok abimiyo kom lumony pa Lupiliciti ma guto tin bot winyo me polo ki bot nguu ma wi lobo, wek lobo ducu onge ni, Lubanga tye i Icrael, 47dok wek lwak man gunge ni, Rwot pe laro dano ki pala lucwan kadi ki tong, pien lweny Rwot aye maloyo gire, ci en bimiyowu i cingwa.”

48Goliac oa obino karomo ki Daudi, ci Daudi oringo oyotoyot inyim mony ma orye i tyeng pi romo kwede. 49Ci orwako cinge i opirune, okwanyo lagweng, obayo, ocelo tur nyim Goliac. Lagweng odonyo woko i tur nyime ci opoto piny aryeba cwiny. 501

Kitmeno Daudi oloyo Goliac ki latangdingo ki lagweng, ma ocele kwede, oneke woko. Pala lucwan onongo peke i cing Daudi. 512Ci Daudi oringo, ocung iwi Goliac, owoto pala lucwan pa Goliac ki i akurane, oneke kwede, ka ongolo kwede wiye woko. Ka jo Piliciti guneno ni twon oteka lweny monygi dong oto, ci guringo woko. 52Lwak jo Icrael ki Juda gutware ki oduru gulubu kor jo Piliciti nio wa i Gat, ki i dog gang me Ekron. Omiyo Lupiliciti ma ret omakogi gupoto woko i dog yoo cake ki i Caaraim nio wa i Gat ki Ekron. 53Lacen jo Icrael gucako dwogo cen ki karyemo Lupiliciti, ci guyako gonygi. 54Daudi okwanyo wi Goliac okelo i Jerucalem, ento oketo jami lwenye i kemane.

Ginyutu Daudi bot Caulo

55Ka Caulo oneno ka Daudi cito kalweny ki Goliac, ci openyo Abneri ma ladit wi monye ni, “Abneri, latin awobini wod pa anga?” Abneri ogamo doge ni, “Macalo in ikwoni, rwot, pe angeyo.” 56Rwot dok owaco ni, “Peny pi awobi man, ni en wod pa anga?” 57Ka Daudi odwogo ki kaneko Lapiliciti, ci Abneri okwanye otere inyim Caulo, ki wi Goliac i cinge. 58Caulo openye ni, “In i wod pa anga, latin awobi?” Daudi odok iye ni, “An a wod pa latici Yece ma Labeterekem.”