1 Camuel 16

Kiwiro Daudi me bedo rwot

1Rwot owaco bot Camuel ni, “Cwinyi bikumu pi Caulo pi kare marom mene, kun an dong atyeko kwero en woko me bedo rwot pa jo Icrael? Pik moo i tung dyang, ci icit bot Yece ma jo Beterekem, pien anongo rwot pira kena ikin awobene.” 2Camuel ogamo ni, “Abiwot kunu ningning? Ka Caulo biwinyone, ci bineka woko.” Rwot owaco bote ni, “Cit ki roya kun iwaco ni, ‘Abino katyero gitum bot Rwot.’ 3Ci ilwong Yece obin i ka tumu gitum. An abinyuti gin ma myero itii. Ibiwiro pira kena dano ma abitucu nyinge boti.” 4Camuel otimo kit ma Rwot ocikeni, ocito i Beterekem. Ludongo ma i taun madit meno gucito ka jolo wiye kun komgi myel. Guwaco ni, “Ibino ki kuc bo?” 5Ci en ogamo ni, “Abino ki kuc. Abino ka tyero gitum bot Rwot. Wulonye kekenwu wubed maleng, ka wubin kacel kweda katyero gitum.” Olonyo Yece ki awobene gubedo maleng ci olwongogi i katyero gitum.

6Ka gubino, Camuel oneno kom Eliab ci otamo ni, “Ada, ngat ma Rwot biwiro ki moo tye inyime.” 7Ento Rwot owaco bot Camuel ni, “Pe ibed kaneno ber me kome nyo kit bore, pien atyeko kwero en woko; pien Rwot pe neno piny kit ma dano nenoni. Dano neno kome ki woko, ento Rwot neno cwinye.” 8Yece dok olwongo Abinadab, oweko en okato ki inyim Camuel; ci Camuel owaco ni, “Kadi man bene Rwot pe oyero.” 9Yece dok oweko Cama okato ki kangete; Camuel dok owaco ni, “Kadi man bene pe Rwot oyero.” 10Yece omiyo awobene abiro ducu gukato inyim Camuel. Ci Camuel owaco bot Yece ni, “Rwot pe oyero joni.” 11Dok openyo Yece ni, “Awobeni ducu gitye kany?” Ci en ogamo ni, “Matidine aye pud odong; ento en tye ka kwayo romi,” ci Camuel owaco bot Yece ni, “Cwal kwena kiome; pien pe wabibedo piny nio ka en oo kany.” 12Ci Yece ocwalo kwena, ci kikele. Otuc ma kome kwar, wange mwonya ma neno ber. Rwot owaco ni, “Man aye en, dong ia malo, i wire ki moo.” 13Camuel okwanyo tung dyang ma moo tye iye, owiro Daudi ki moo ki i dye omegine. Ci Cwiny pa Rwot obino ikom Daudi ki tek cake inino meno. Lacen Camuel oa odok i Rama.

Daudi ogoyo opuk pi Caulo

14Ikare meno Cwiny pa Rwot oa woko ki ikom Caulo, ci cen marac ma oa ki bot Rwot opoto ikome, obedo ka lanye. 15Lutic pa Caulo guwaco bote ni, “Nen ba, cen marac ma oa ki bot Lubanga opoto ikomi, obedo kalanyi. 16Laditwa, ber icikwa wan lutici ma watye kany wek wacit wayeny dano mo ma ladiro goyo opuk; ci ka cen marac ma a ki bot Lubanga opoto ikomi, en bigoyo opuk, miyo ibedo maber.” 17Ma omiyo Caulo ociko lutice ni, “Wun wucit wuyenya dano mo ma ngeyo goyo opuk mabere, ci wukel en bota.” 18Ngat acel ikin awobene ogamo ni, “Nen ba, aneno wod pa Yece ma Labeterekem ma ladiro goco. En laco ma oteka ma ongiyo ki lweny, ngeyo lok maber, dok nen mwonya, ki Rwot bene tye kwede.” 19Ma omiyo Caulo ocwalo lukwena bot Yece kun waco bote ni, “Cwala wodi Daudi ma lakwat romini.” 20Yece okwanyo kana me yeyo mugati, ki opiru kongo bwino, ki latin dyel, ci ocwalogi bot Caulo kacel ki wode Daudi. 21Ka Daudi ocito bot Caulo ci ocako tice, Caulo ocako mare matek tutwal, ka odoko lamak jami lwenye. 22Caulo ocwalo kwena bot Yece kun waco bote ni, “Wek Daudi obed dong katiyo tic bota, pien aneno tice, oyomo cwinya.” 23Ikare ducu ma cen marac ma a ki bot Lubanga opoto ikom Caulo, ci Daudi kwanyo opuk, cako goyone, miyo Caulo bedo maber, doko dano, ci cen marac aa woko ki ikome.