1 Camuel 15

Lweny ikom jo Amalek

11

Camuel owaco bot Caulo ni, “Rwot yam ocwala kawiro in ki moo ker me bedo rwot maloyo jo Icrael, ma omiyo i tim ber iwiny lok pa Rwot. 22Rwot me mony owaco kuman ni, ‘Abiketo can ikom jo Amalek pi gin mayam gutimo ikom jo Icrael, pien yam gulwenyo kwedgi ma gitye i yoo, ikare ma gua ki i Ejipt. 3Cit ilweny ki jo Amalek, idyergi i cing Rwot, ijwergi woko liweng ki gin ducu ma gitye kwede. Pe kica omaki ikomgi, ento inek co wa ki mon, lutino wa ki gin ma pud dot, twoni ki romi, kinaga wa ki kanagu.’”

4Caulo olwongo dano kalweny, ci okwanogi i Telaim. Jo ma giwoto ki tyen gi onongo gin romo alip miya aryo, ki jo pa Juda alip apar. 5Ka Caulo obino inyim taun madit pa jo Amalek, ci obutu i nota, okurugi iye. 6Dok Caulo owaco bot jo Kenit ni, “Wua, wucit woko ki ikin jo Amalek, wek pe atyekwu woko kacel kwedgi; pien yam kica omakowu ikom jo Icrael ducu ikare ma gua woko ki i Ejipt.” Ma omiyo jo Kenit gua woko ki ikin jo Amalek. 7Caulo oloyo jo Amalek cake ki i Kavila nio kwede wa i Cur macok ki lobo Ejipt tung kunyango. 8Omako Agag rwot pa jo Amalek otere makwo, ci odyero jo meno, ojwerogi woko ki pala lucwan. 9Ento Caulo ki lwak kica omakogi ikom Agag, ci guweko en kacel ki romigu ma gibeco, ki twoni, ki roci mucwe, ki lutino romigu, ki jami mukene ma gibeco ducu, pe guye ni myero kijwergi woko liweng. Gin ducu ma kicayo, ki gin maracune, gin aye gujwerogi woko.

Lubanga okwero Caulo me bedo rwot

10Ka dong lok pa Rwot obino bot Camuel ni, 11“Atyeko ngut pi miyo Caulo bedo rwot, pien obare woko ki kalubu kora odok woko cen, pe ocobo cika.” Ci kiniga omako Camuel, obedo ka kok bot Rwot dyewor benebene. 12Camuel oa odiko con pi rwate ki Caulo. Ka gitito bot Camuel ni, “Caulo dong owoto i Karmel, ocibo gin me poo pire kene, ci oloke okato anyim, ocito wa i Gilgal.” 13Ka Camuel oo bot Caulo, ci Caulo owaco bote ni, “Gum pa Rwot obed ikomi. Atyeko cobo cik pa Rwot.” 14Ci Camuel owaco ni, “Man dok kit koko romi ango ma awinyo ki i itani, ki koko dyangi ma awinyoni?” 15Caulo owaco ni, “Gikelogi ki bot jo Amalek, pien dano gungoyo romi ki dyangi mabecone me gitum bot Rwot Lubangani; ki mudonge wajwerogi woko ducu liweng.” 16Ento Camuel owaco bot Caulo ni, “Ling! Abititi gin ma Rwot otito bota tin dyewor.” Caulo ogamo ni, “Dong itit bota do.”

17Camuel owaco ni, “Kadi inen i wangi kekeni ni itidi, pe in aye iloyo kaka ducu ma i Icrael? Rwot yam owiri ki moo me bedo rwot pa jo Icrael. 18Rwot ocwali kun waco boti ni, ‘Cit idyera jo Amalek ma lubalo, ijwergi woko ducu liweng.’ 19Pingo yam pe iworo dog Rwot? Pingo icore ikom gin ma giyako, ki timo gin manen marac iwang Rwot?” 20Caulo owaco bot Camuel ni, “Atyeko woro dog Rwot. Acito kama kicwala iye, akelo Agag rwot me Amalek, dok ajwero jo Amalek woko ducu liweng. 21Ento dano gukwanyo romi ki twoni ki i kin gin ma kiyako, gukwanyo gin mabecone ki ikin jami ma onongo kidyero me ajwera woko liweng, gutero wek gubed gitum bot Rwot Lubangani i Gilgal.” 22Camuel ogamo ni,

“Cwiny Rwot bedo yom i gitum awanga ki gityergu

marom ki kit ma cwinye bedo yom kwede ka kiworo doge?

Nen, woro dog Rwot ber kato gitum,

winyo cik ber kato dwolo nyogi romi ma kiwango me gityer.

23Pien jemo rom ki bal me tyet,

tekwic rom ki bal me woro cal jogi.

Macalo in ikwero winyo lok pa Rwot,

en dong okwero in me bedo rwot.”

24Caulo owaco bot Camuel ni, “Apoto i bal, pien akalo wi cik pa Rwot ki wi loki, pien onongo alworo lwak, aworo doggi. 25Dong kombedi alegi ni itima kica ikom bala, ci wadok kwedi wek acit awor Rwot.” 26Camuel ogamo dog Caulo ni, “Pe abidok kacel kwedi, pien ityeko kwero lok pa Rwot woko, ki Rwot bene otyeko kwero in me bedo rwot pa jo Icrael.” 273Ka Camuel oloke me cito woko, Caulo omako dog kanyi pa Camuel, ci kanyi oyec woko. 28Camuel owaco bote ni, “Rwot dong oyeco ker pa Icrael woko ki boti tin, dong otyeko miyone bot lawoti ma en ber makato in. 29Lubanga ma en Deyo pa Icrael pe biloko goba, kadi ngut bene; en pe dano ma kono onguti.” 30Caulo owaco ni, “Apoto i bal; ento tin kong iket deyo ikoma inyim ludongo pa lwaka ki inyim jo Icrael, wek wadok kwedi, acit awor Rwot Lubangani.” 31Ma omiyo Camuel odok cen olubu kor Caulo, ci Caulo oworo Rwot.

32Camuel dok owaco ni, “Kela Agag, rwot pa jo Amalek, bota kany.” Agag ocako bino bote ma tipu kome peke kun waco ni, “Ada man aye lit pa to?” 33Camuel owaco ni, “Kit mayam pala lucwani omiyo mon gudong labongo lutinogini, kitmeno meni bene bibedo labongo latin ikin mon wade.” Ka dong Camuel ongido Agag woko matinotino inyim Rwot i Gilgal.

34Lacen Camuel odok i Rama; Caulo ocito mere i ode matye i Gibea. 35Camuel pe omedo ki neno Caulo nio wa inino ma Caulo oto iye. Ento Camuel obedo kakumu pi Caulo. Ci Rwot ongut pi keto Caulo me bedo rwot pa jo Icrael.