1 Camuel 14

Yonacan i cel gogo pa jo Piliciti

1Inino mo acel Yonacan wod pa Caulo owaco bot awobi ma tingo jami lwenye ni, “Bin wek wakat bot mony ma i cel gogo pa jo Piliciti matye loka cani.” Ento pe otito bot wone. 2Onongo Caulo ogony i agiki gang me Gibea ite yat pomegranat mayam tye i Migron. Onongo jo ma gitye kwede gin romo miya abicel, 3kacel ki Akija wod pa Akitub, omin Ikabod wod pa Finekaci ma wod pa Eli. Akija aye obedo ajwaka pa Rwot i Cilo ma ruku epod. Lwak pe gungeyo ni Yonacan ocito. 4Iwang apiding ma Yonacan obedo kayenyo yoo me kato kwede ikom mony ma i cel gogo pa jo Pilicitini, onongo tye iye got ma ocule tungcel ki got ma ocule tung mukene bene. Nying got acel Bojej ki nying mukene Cene. 5Got acel ocung ocule tung malo me apiding ma okemo Mikmac, ki mukene tung kupiny ma okemo Geba.

6Yonacan owaco bot awobi ma tingo jami lwenye ni, “Bin wek wakat bot mony ma i cel gogo pa joni ma pe gingeyo Lubanga; gwok Rwot bitiyo gin mo pirwa kunu, pien pe tye gin mo ma gengo Rwot laro dano kadi gipol onyo ginok.” 7Lating jami lwenye owaco bote ni, “Tim gin ducu ma cwinyi oteri iye. Nen, an atye kacel kwedi; kit macalo cwinyi otamo kwede, mera bene kitmeno.” 8Yonacan dok owaco ni, “Wabiwok wakato bot jo ca, ci wabinyute kenwa botgi. 9Kace guwaco ni, ‘Wukur nio ka wao botwu,’ ci wabicung giwa mot i kabedowa, pe wabiito malo botgi. 10Ento ka guwaco ni, ‘Wubin malo botwa kany,’ ci wabiito malo kunu, pien nongo Rwot dong otyeko miyogi i cingwa. Meno aye bibedo lanyut botwa.” 11Kitmeno gin aryo ducu gunyute keken gi bot mony pa jo Piliciti matye i cel gogo; ci jo Piliciti guwaco ni, “Nen, jo Ibru gibino ca, gitye kakato woko ki i bur ma gukane iye.” 12Ci co me mony ma i cel gogo gulwongo Yonacan ki lating jami lwenye kun gin waco ni, “Wubin malo botwa, ci wabinyutu gin mo botwu.” Yonacan owaco bot lating jami lwenye ni, “Bin ilub kora, pien Rwot otyeko miyogi i cing jo Icrael.”

13Ka dong Yonacan ocako ito malo kun cito kobo ki cinge ki tyene, ki lating jami lwenye lubu kore. Yonacan otongo Lupiliciti ci gupoto woko piny inyime, kun lating jami lwenye obedo ka nekogi ki i kore. 14I nek meno mukwongoni ma Yonacan ki lating jami lwenye gutimoni, guneko dano pyere aryo ikabedo maromo nucu eka. 15Dano gutware ki lworo madwong i gony pa jo Piliciti, mony ma gitye woko i bar, ki mony matye i gogo, kadi wa luyak bene komgi omyel. Lobo oyenge, ci twon lworo madwong ki atiba omako dano.

16Ka lukurpiny pa Caulo ma i Gibea matye i lobo Benjamin guneno lwak jo Piliciti guket gigwenye atata, gidok tungi ki tungi, 17ci Caulo owaco bot lwak ma gitye bote ni, “Kong wukwan dano wek wanen anga ma okato woko ki botwa.” Gukwano dano, ci nen, Yonacan ki lating jami lwenye onongo gipeke kunu. 18Ci Caulo owaco bot Akija ni, “Kel Canduk me Gicike kany.” Pien onongo Canduk me Gicike woto kacel ki jo Icrael ikare meno. 19Ikare ma Caulo tye kalok ki ajwaka pa Lubangani, woo obedo ka mede ameda i gony pa jo Piliciti, ma omiyo Caulo owaco bot ajwaka ni, “Wek dong obedi.” 20Caulo ki jo ducu ma gitye kwede gucako wayu, ci gucito gudonyo kalweny. Ci nen, dano acel acel ki ikin jo Piliciti cobo lawote ki pala lucwane; pien komgi obange woko tutwal. 21Jo Ibru mayam con gubedo bot jo Piliciti, mayam gumol gucito kwedgi i gonygini, guloke gudwogo cen bot jo Icrael ma gitye kacel ki Caulo ki Yonacan. 22Kitmeno wa jo Icrael mayam onongo gukane ikin godi me lobo Epraim, ka guwinyo ni jo Piliciti gitye karingo woko, gin bene guryemo korgi matek kalweny ikomgi. 23Rwot olaro jo Icrael inino meno; ci lweny omede wa inge Bet-aven.

Gin ma otime inge lweny

24Kec onuru kom jo Icrael inino meno; pien Caulo onongo okwongo kwong ki inyim dano kun waco ni, “Cen opot ikom dano mo ma ocamo cam ma peya piny oyutu, ma nongo pud atye ka culu kwor ikom lukwora.” Kitmeno pe wunen ni ngat mo obilo cam. 25Ka dano ducu gucore i bunga, gunongo moo kic orade ata wa i ngom. 26Kadi bed dano, guneno moo kic ma oton piny orade ata, ento dano mo pe oketo idoge, pien lwak gubedo ka lworo kwong pa Caulo. 27Ento Yonacan onongo pe owinyo ka wone kwongo kwong kun ciko ki dano. Kitmeno en olutu wi odoo ma onongo tye i cinge, i peda kic, ci ogwelo ki cinge onango; ci ocako winyo agonya. 28Dano mo acel ma ikin lwak owaco ni, “Woru ociko dano kun kwongo kwong matek ni, ‘Cen obed ikom dano ma ocamo cam inino man.’” Ci kadi bed kec onongo obwoyo dano woko ngat mo pe ocamo gin mo. 29Yonacan ogamo ni, “Wora okelo can i lobo. Nen kit ma wanga ogony kwede pien atyeko bilo moo kic man manok. 30Bedo ber tutwal kono onongo dano gucamo gin ma guyako ki bot lumerokgi? Pien, kono guneko jo Piliciti mapol mada.”

31Ci kineko jo Piliciti inino meno cake ki i Mikmac o wa i Aijalon. Ento kec onongo obwoyo dano mada; 32ci dano gucako mwome ikom lee ma kiyako, ci gumako romi ki twoni ki rocigu guradogi woko piny, ci lwak gucako mwodo ringone kacel ki remo. 331Ka kitito bot Caulo ni, “Nen, dano gubalo inyim Rwot pi mwodo ringo ki remo,” ci en ogamo ni, “Wutimo me dwalo doga! Wulor kidi madit tung bota kany.” 34Caulo dok owaco ni, “Wuket lok orom kin dano kun wuwaco botgi ni, ‘Dano acel acel okel twone nyo romone, wek wunekgi kany ci wucam. Pe dok wubal inyim Rwot pi mwodo ringo ki remo.’” Pimeno dano acel acel okelo twone i wor meno ci gunekogi kunu. 35Caulo ocano keno tyer pi Rwot; en aye keno tyer mukwongo ma en ocano pi Rwot.

36Caulo dok owaco ni, “Wek walubu kor jo Piliciti i dyewor, wacit wayakgi nio ka piny oru. Pe wabiweko dano mo dong ma kwo.” Dano gugamo ni, “Tim gin ma i neno ni beri.” Ento ajwaka owaco ni, “Weku kong wapeny Lubanga ki kany.” 37Ci Caulo openyo dog Lubanga ni, “Myero acit alub kor jo Piliciti? Ibimiyogi i cing jo Icrael?” Ento Lubanga pe odoke iye inino meno. 38Ci Caulo owaco ni, “Wubin kany, wun lutel wi lwak ducu, wek wungi wuniang kit ma bal obino kwede tin. 39Ci Caulo okwongo kwong ni, macalo Rwot ma laro jo Icrael tye makwoni, kadi ka bal man tye ikom woda Yonacan, ci en bito ada.” Ento pe tye ngat mo ma odoke iye ki ikin lwak. 40Dok owaco bot jo Icrael ducu ni, “Wun wubiwale wubedo tungcel, an ki Yonacan wabiwale wabedo tungcel.” Ci lwak guwaco bot Caulo ni, “Tim gin ma i neno ni ber ki tung boti.” 412 Ma omiyo Caulo owaco ni, “Ai Rwot Lubanga pa Icrael, pingo tin pe i dok ikwaca, ladita? Kace bal man tye ikoma nyo ikom Yonacan ma wodani, ai Rwot Lubanga pa Icrael, ci imii lagam ki Urim, ento ka bal man tye ikom joni Icrael, ci imii lagam ki Tumim.” Ci kwir omako Yonacan ki Caulo, kun lwak obwot. 42Caulo dok owaco ni, “Wubol kwir ikin an ki woda Yonacan,” ci kwir opoto omako Yonacan.

43Caulo dok owaco bot Yonacan ni, “Tita gin ma itimo,” ci Yonacan otito bote ni, “Abilo moo kic manok ki iwi odoo ma onongo amako i cingani. An dong atye ene, abito dong.” 44Ci Caulo owaco ni, “Lubanga omyero oket can ikoma kitmeno ki makato bene ka pe kineki woko, Yonacan.” 45Ento lwak gugamo dog Caulo ni, “Yonacan bito dong ada, ma otiyo matek me kelo ki Icrael loc man maditi? Pe twero time! Macalo Rwot tye makwoni, wa yer wiye mo acel pe bipoto i ngom, pien obedo katic kacel ki Lubanga inino man.” Ci lwak gularo Yonacan, omiyo pe kineke. 46Kitmeno Caulo oweko ryemo kor jo Piliciti, ci odok cen; ki jo Piliciti bene gudok woko i kabedogi.

Loc pa Caulo

47Ka Caulo dong otyeko camo ker pa jo Icrael me bedo rwot, en obedo kalweny ikom lumeroke ducu ma gurume. Olwenyo ikom jo Moab, jo Ammon, jo Edom, ikom luker me Joba ki ikom jo Piliciti. Kama Caulo oloke odok iye ducu, onekogi marac. 48Obedo kalweny matek, oloyo wa jo Amalek, ci olaro jo Icrael ki i cing jo mayam gubedo kayakogi.

49Caulo yam tye ki awobene Yonacan, Icivi, Malkicua. Nying anyirane ene: latin nyako mukwongo nyinge Merab ki nying matidine Mikal. 50Nying dako pa Caulo onongo Akinoam, nya pa Akimaj. Nying ladit wi monye onongo Abneri wod pa Ner, ma omin won Caulo. 51Kic en aye won Caulo, ki Ner ma won Abnerini onongo en aye wod pa Abiel.

52Lweny obedo magwa ikom jo Piliciti ikare pa Caulo ducu. Ka Caulo oneno dano mo ma oteka lweny, ci kelo en, bedo ikin lumonye.