1 Camuel 13

Lweny ki jo Piliciti

1Caulo onongo dong pe dano matidi ikare ma ocamo ker, mwaka me dite nongo romo pyere adek; ci en oloyo jo Icrael pi mwaka pyere angwen wiye aryo.

2Caulo oyero jo Icrael alip adek; ci jo alip aryo gubedo bote i Mikmac ki i lobo godi me Betel, ki alip acel gubedo bot Yonacan i Gibea i lobo Benjamin. Jo mudonge en ocwalogi woko paco, ma ngat acel acel odok i kemane.

3Yonacan oloyo mony pa jo Piliciti ki i cel gogo matye i Geba, ci jo Piliciti guwinyo pire. Caulo okutu tum okwange oromo lobo ducu kun waco ni, “Wek jo Ibru ducu guwiny.” 4Ci jo Icrael ducu guwinyo ni, Caulo oloyo mony pa jo Piliciti ki i cel gogo, dok bene ni, nying jo Icrael odoko ngwe lituny bot jo Piliciti. Ci kilwongo lwak gucoke bot Caulo i Gilgal.

5Jo Piliciti gurwayo mony kalweny ki jo Icrael ki gadigadi lweny alip pyere adek, ki wegi aguragura alip abicel, ki lwak mony madwong macalo kweyo me dog nam. Ci gubino guguru gonygi i Mikmac matye inget Bet-aven tung kunyango. 6Ka jo Icrael guneno ni dong kidingogi matek ma dong gitye marac tutwal, ci dano gukane i boro ki i bur, ki ikin godi ki i lyel ki i bur piigu. 7Jo mogo gungolo kulu Jordan, gucito wa i lobo Gad ki Gilead. Onongo Caulo pud tye i Gilgal, ci lwak ducu gilubu kore ki myelkom. 81

Gukure pi nino abiro ma onongo Camuel ocikoni; ento Camuel pe obino i Gilgal, ci lwak ocako ket woko ki bot Caulo. 9Ma omiyo Caulo owaco ni, “Wukela gitum awanga kany, ki gityer me berbedo.” Ci otyero gitum awanga.

10Ka onongo pud otyeko tyero gitum awanga atyeka, ci nen, Camuel otugi bino cut. Ka Caulo okato woko karwate kwede ki mote. 11Ci Camuel openyo en ni, “Ibedo katimo gin ango?” Ci Caulo ogamo ni, “Ka aneno ni dano gucako ket woko ki bota, dok bene pe ibino inino ma onongo icikoni, kun jo Piliciti dong gurwayo woko cok ki Mikmac, 12ci atamo ni, ‘Jo Piliciti dong gibipoto ikoma ki i Gilgal kany, ma peya atango cinga akwayo Rwot’; ci dong atamo pira kena katyero gitum awanga.” 13Ci Camuel owaco bot Caulo ni, “Itimo gin me mingo keken. In pe igwoko cik pa Rwot Lubangani mayam ociki kwede; kono onongo igwoko, kono Lubanga omoko keri me loyo Icrael matwal. 142Ento kombedi keri dong pe bicung; Rwot dong otyeko yero dano ma bitimo gin ma cwinye mito. Dok Rwot oketo en me bedo laker maloyo lwake, pien in pe igwoko gin ma Rwot yam ociki kwede.” 15Ci Camuel oa malo, ki i Gilgal ocito i Gibea i lobo pa jo Benjamin.

Caulo okwano wel dano ma gitye bote, ci guromo miya abicel. 16Caulo ki wode Yonacan ki jo ma gitye bote gubedo i Geba i lobo pa jo Benjamin, ento jo Piliciti gugony i Mikmac. 17Luyak gua ki i gony pa jo Piliciti buca mony adek; buca acel odok tung Opra ma i lobo Cual, 18buca mukene odok tung Bet-koron, ki buca mukene odok tung wang lobo ma neno piny i nota Jeboim ma tung tim ata.

19Ikare meno onongo latet mo pe i nongo i lobo Icrael ducu, pien yam jo Piliciti guwaco ni, “Pe wawek jo Ibru gutet pala lucwangi nyo tonggi pirgi ken gi.” 20Ento dano acel acel ki ikin jo Icrael obedo kacito bot jo Piliciti kapako lak kweri dyange, nyo kweri kidima, nyo latong nyo pala kace. 21Ci gingolo wel cule bedo cekel aryo ma nyige pi lak kweri dyang ki pi kidima, ka dok cekel acel pi pako lak latong ki pi como dim. 22Kitmeno omiyo ikare me lweny pala lucwan nyo tong pe kinongo i cing dano mo ki ikin jo ma gitye bot Caulo ki Yonacan. Ento Caulo ki wode Yonacan onongo gire gitye ki meggi. 23Ci jo ma gitye i cel gogo mony pa jo Piliciti gumol gukato woko, gucito iwang apiding me Mikmac me gwokone.